Jeremiya 12:14 - Bhibhiliya Nya Guage

¹⁴ Khu mahungu ya vaakelane vangu vatshavbo nya guvivbedwe khu monyo, avo va nga phangago thomba yangu nyi nga tshiyelago vathu vangu va na Israyeli, Pfhumu Nungungulu a ngu ganela kharati, khuye: “Nyi na va dusa tigoni gwawe, ni linyumba la na Judha nyi na li dusa nilo vbakari gwawe.”

Jeremiya 12:14 Iomraidhean Croise

Dzindzimo 105:15

“Mu nga khuhi sihathwa sangu, mu nga tshanisini vaprofeti vangu!”

Dzindzimo 106:47

Uwe Pfhumu Nungungulu wathu, hi vbanyise, hi tshanganise U hi dusa vbakari ga va nya mayigo, gasi hi kodze gu rungudza lina lago nya gukatege, hi gu dhumisa na hi tsakide.

Jeremiya 2:3

Gikhati gyogyo Israyeli a diri vathu va phasedwego Nungungulu gambe a diri mihandro nya guhegule nya guvbwere gwaye, vatshavbo va nga bani va mi sasela, va di gu dzi vangela nandru, va thegedwa khu libango; a ngu ganela Pfhumu Nungungulu.

Jeremiya 25:9

wonani nya gukhenu nyi na mi rumelani mahundzu yatshavbo ya phuvbo ga Wuronga, a ngu ganela Pfhumu Nungungulu, nyi ramba ni githumi gyangu Nabhukodhonosori, mufumeli wa Bhabhiloni, nyi mu leletela gu sasela litigo ni vavbanyi vaye, ni mayigwana yatshavbo ya vbafuvbyana gwanu. Yatshavbo nyi na ma mbembisela muphelo, nyi mi vbindrugedza mu na khala gisamadziso nya guthise ni gihegiso, ni marumbi nyamba vbela.

Jeremiya 3:18

Khu matshigu yoyo, Vajudha ni va na Israyeli, va na gimbila gumogo, na va guta khu tigoni ga Wuronga gasi gu hongola ga litigo nyi ningidego vababe vawe gu khala thomba yawe.

Jeremiya 32:37

Wonani nya gukhenu nyi na va tombanisa va wuya khu mayigoni gwatshavbo nyi va phalalegisedego umo khu kotani nya likhulo langu, likhulo ni giviti gyatshavbo; nyi na va wuyisa wulangani wowu vata vbanya khu gurula ni gukhadzisega.

Jeremiya 48:1

Khu mahungu ya Mowabhi, Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Libango ga va na Nebhu, kholu lidhoropa lawe li khungumudwe.” Va na Kiriyatayimi, va padwe va modwa; likhokhola lawe li khungumudwe li thedwa dzitshoni.

Jeremiya 48:47

Pfhumu Nungungulu a ngu ganela, khuye: Khu guhegisani, nyi na wuyisa vatshavbo va vbagedwego va na Mowabhi. Ogu khu gu hegisa nya gulamudwe ga Mowabhi.

Jeremiya 49:1

Mayelano khu va na Amoni. Pfhumu Nungungulu a ngu ganela kharati, khuye: Ina kamwe uwe Israyeli, u mwalo sanana, gani? U mwalo avo va na gu tshalago va hodza thomba yago, gani? Khu ginani Malikani a fumedego Gadhi, ni gu vathu vaye va khala madhoropani gwago?

Jeremiya 49:7

Khu kotani ga Edhomi. Pfhumu Nungungulu nya Tshivba Yatshavbo, a ngu ganela kharati, khuye: “Ina kamwe, gu mwalo gambe guti tigoni ga Temani, gani? Ina va nya mapimo kha va nga gu ninga gambe wusingalagadzi, gani? Guti gwawe gu fuvide, gani?

Ezekiyeli 28:25

Mune Pfhumu Nungungulu, a ngu ganela kharati, khuye: Gikhati eni nyi na tombanisago va na Israyeli khu vbakari nya mayigo va phalalegedego umo, nyi na nonedza va na Israyeli wuwadi wangu mbeli ga mambe mayigo, khavbo avbo va na bwelela tigoni gwawe, litigo nyi li ningedego ga githumi gyangu Jakobe.

Ezekiyeli 28:26

Avo va na vbanya mule na va tshulegide, va na vbaha dzinyumba dzawe ni gu yala miuvha; va na vbanya khu gurula gikhati nyi na tsayisago vaakelane vawe vatshavbo va va giredego guvivba. Khavbo avbo, avo va na nyiti gukhavo kheni Pfhumu Nungungulu wawe.

Ezekiyeli 36:24

Kholu nyi na mi dusani vbakari ga va nya mayigo, nyi mi tombanisa khu mayigoni gwatshavbo, nyi mi wuyisa tigoni gwanu nya mavelego.

Ezekiyeli 36:5

Khu guralo, Mune Pfhumu Nungungulu, a ngu ganela kharati, khuye: Khu guvbisega nya monyo wangu, nyi ganede ga mayigo ma tshadego ni Edhomi watshavbo. Avo khu gutsaka ni guvivba nya myonyo yawe, va di wandra litigo langu, li khala thomba yawe, gasi va phanga mitshambi yawe.

Ezekiyeli 37:21

Khu guralo, va embele, khuwe: Mune Pfhumu Nungungulu, a ngu ganela kharati, khuye: Nyi na dusa sanana sa Israyeli khu mayigoni va thavedego umo, nyi na va tombanisa khu maphuvbo yatshavbo, nyi va resa tigoni gwawe nya mavelego.

Zakariya 1:15

Gambe nyi ngupwa likhulo nya likhongolo ngudzu khu kotani nya mayigo ma guromo gukhadzisegani; kholu avbo eni nyi nga bani nyi gorogide vbadugwana khu kotani nya vathu vangu, ayo ma di engedzela gu gira guvivba.

Zakariya 2:8

Kholu Pfhumu Nungungulu nya Tshivba Yatshavbo, a ngu ganela kharati, khuye: Hwane nya gu na nyi rumede ga mayigo ma mu phangidego; kholu wule a mu kuhago a gu kuha ndzololwane nya liso laye.

Dhewuteronome 28:63

Kha nga olu Pfhumu Nungungulu a tsakago khu gu mi kategisa, a mi andrisa, khidzo gambe kharato Pfhumu Nungungulu a na tsaka khu gu mi pfhungumula ni gu mi mbembisa; a nenu mu na duswa ga litigo mu yago ga ilo guya li fumela.

Dhewuteronome 30:3

khavbo, Pfhumu Nungungulu wago, a na gu wuyisago khu wugumbitunu, a gu pwela gisiro, a gu tombanisa nyaluphye khu ga mayigo ayo a nga bani a gu phalalegisede umo Pfhumu Nungungulu wago.