Jeremiya 11:10 - Bhibhiliya Nya Guage

¹⁰ Va bwelelede ga sihevbulo nya guvivbe sa vababe vawe, va ngamba dzina gu yingisa magana yangu; va khozela vanungungulu nya malipha; nyumba ya Judha ni Israyeli va yeyiside gidzumeledzwano nyi giridego ni vababe vawe.

Jeremiya 11:10 Iomraidhean Croise

Dzindzimo 78:57

Kha va tumbega, va di mu wugela, kha nga vababe vawe, va di penga kha nga giholoma, nya gukhwandrwe khu wulaho nya guwegele.

Isaya 24:5

Kholu mafu ma nyenyezide khu kotani ya vavbanyi vaye, kholu va yeyiside milayo ni gu hambanisa sileletelo, va kavila gidzumeledzwano nya gupindruge.

Jeremiya 13:10

Vathu vava nya guvivbedwe khu monyo, va si dzumeligo gu yingisa magana yangu, va gimbilago khu dzindzila dzi godwago khu myonyo yawe, ni gu landrisela vanungungulu nya valombo, va va khozela ni gu va thumela, va noga mbeli gwawe, va na fanana ni libhandri leli li si phasigo gilo.

Jeremiya 17:23

Aholu avo kha va nyi yingisa, va di bangisa mihungo, va si landrisi ni gu hakha gulaya gwangu.

Jeremiya 22:9

Khavbo avbo, va na ningwa phindrulo, pwani: “Kholu va nga diga gidzumeledzwano va hungidego ni Pfhumu Nungungulu wawe, va ya khozela vambe vanungungulu ni gu va thumela.”

Jeremiya 31:32

Aholu gi na hambana ni gile nyi giridego ni vababe vawe, litshigu nyi va pharidego khu libogo gasi gu va dusa tigoni ga Egipito; aholu avo va digide gidzumeledzwano gyangu, khu guralo, eni nyi di hambana navo; a ngu ganela Pfhumu Nungungulu.

Jeremiya 44:16

“Magana u hi embelago nya gukhuwe ma guta khu ga Pfhumu Nungungulu, ethu gima kha hi na gu yingisa!

Jeremiya 44:5

Aholu, avo kha va nyi yingisa, ambari gu phuphuta ndzeve yawe va vbindrugedza mavbanyelo nya guvivbe, mwendro gu diga gu vbisela libani vambe vanungungulu nyamba phasa gilo.

Jeremiya 7:28

U na va embela esi, khuwe: Litigo leli, kha li yingisi lito la Pfhumu Nungungulu wawe, ambari gu dzumela gu kawukwa; lisine li fuvide myonyoni gwawe.

Jeremiya 9:6

Va gu vbanya vbakari nya guvivbe; khu kotani nya isoso, kha va khathali khu Eni; a ngu ganela Pfhumu Nungungulu.

Ezekiyeli 16:59

Mune Pfhumu Nungungulu a ngu ganela kharati, khuye: “Nyi na gu tsayisa gukhedza khu mithumo yago u giridego; kholu u yeyiside gisambanyo gyangu, u funya gidzumeledzwano gyangu.

Ezekiyeli 44:7

Gu diga nya yimbe mithumo yago nya wuyeyisi, u reside va nya mayigo nyamba hana wugwera, va si khathaligo khu Eni, va ta bela wulangani gwangu nya miphaso, gasi va nyenyezisa nyumbani gwangu, gikhati mu ningelago guhodza, mafura ni novba; khu kharato enu mu di fanyani gidzumeledzwano gyangu khu guvivba gwanu gwatshavbo.

Ezekiyeli 5:6

Khu guralo, khu kotani nya guvivbe gwaye wugede milayo yangu, gumogo ni sileletelo sangu, a gira guvivba guvbindra ni mayigo nya vaakelane vaye. Kholu uye yeyiside milayo yangu, a si landrisi sileletelo sangu.”

Hoseya 6:4

Ginani nyi yelago gu gira khu uwe Efrayimi? Ginani nyi yelago gu gira khu uwe Judha? Kholu lihaladzo lanu la gu fanana ni mapfhi nya Wuronga, ni thondrwane nya dzimindru si vbiredzago gu mwalalega.

Hoseya 6:7

Avo va pide gidzumeledzwano kha nga Adhamu, va si tumbegi avbo gwangu.

Hoseya 7:16

Ambari olu va vbindrugedzago va wuya, kha va wuyi ga uye a Khusegidego Ngudzu; va gu fanana ni wulaho nya guwegele. Vathangeli vawe va na songwa khu matshari, kholu khu maganani gwawe gu di duga magana nya gu dzi khusedze. Khu guralo, va na khala gihegiso tigoni gwatshavbo gwa Egipito.

Levhi 26:15

mwa gu kanyisa sileletelo sangu, ni gumba girani milayo yangu, mu kala mu vboha avbo nyamba sayisa milayo yangu yatshavbo, mu pila gidzumeledzwano gyangu;

Sofoniya 1:6

ni vale va ndreyago va diga gu landra Pfhumu Nungungulu, vale va si theligo kotani khu Uye, ambari gu mu wudzisa wusingalagadzi.

Zakariya 1:4

Mu nga girini kha nga vababe vanu, va nga huweledwa khu vaprofeti nya guhegule, va nga ganela gwawe, khavo: Pfhumu Nungungulu nya Tshivba Yatshavbo, a ngu ganela kharati, khuye: Vbindrugedzani, mu diga dzindzila dzanu nya guvivbe ni mithumo yanu nya gunyenyeze. Aholu avo kha va nyi yingisa, gambe gima kha va thela kota khu eni, a ngu ganela Pfhumu Nungungulu.

Zakariya 7:11

Aholu, avo kha va dzina gu nyi yingisa, va di hatha gu nyi pfhurarela, va nyi wugela, va tshika dzindzeve dzawe gasi va sipwi magana yangu.

Zakariya 7:13

Avbo nyi nga va ranago, avo kha va nyi yingisa, avo navo va di nyi rana, Eni neni nyi si va yingisi; a ngu ganela Pfhumu Nungungulu nya Tshivba Yatshavbo.

Dhewuteronome 31:16

Khavbo avbo, Pfhumu Nungungulu a di embela Mosi, khuye: Wona gukhuwe u ngu hadza guya lala gumogo ni vavelegi vago; gasi vathu vava va na khala maphuphulu, va landrela vambe vanungungulu nya malipha va tigoni va yago umo, va na nyi diga, va hambanisa gidzumeledzwano nyi giridego navo.

Dhewuteronome 9:7

Alakanyani, gambe mu nga divalini gukhenu mu goroside Pfhumu Nungungulu wanu, giwulani; gukhugela litshigu mu dugidego khu tigoni ga Egipito kala mu vboha ga wulanga wowu, mu di wugela Pfhumu Nungungulu;

Vahebheru 8:9

Egi kha gi fanani ni gidzumeledzwano nyi nga hungago ni vababe vawe, litshigu nyi nga va phara khu mandza nyi va dusa tigoni ga Egipito. Avo kha va tumbega ga gidzumeledzwano nyi nga girago navo. Khu guralo, eni nyi di va nyenya, a ngu ganela Pfhumu.

Valamuli 2:11

Khavbo avbo, va na Israyeli va di gira guvivba mahoni ga Pfhumu Nungungulu, va khozela vanungungulu nya Vabhahali.

Valamuli 2:17

Ambari khu isoso, kha va nga yingisa valamuli vawe, aholu va di dzi ningedzela gu gira wubhayi ni vambe vanungungulu va va khidzimela. Va di vbiredza gu ndreya ndzilani va nga bani va gimbila khiyo vababe vawe, va nga bani va yingisa sileletelo sa Pfhumu Nungungulu, va si giri kha nga avo.

Valamuli 2:19

Aholu gikhati afago mulamuli wule, avo va di bwelela gambe vaya gira guvivba guvbindra vavelegi vawe, va landrisela vambe vanungungulu, va noga mbeli gwawe, va va khozela; kha va nga hambana ni mithumo yawe nyambasi yadi, ni dzindzila dzawe nya guwegele.

1 Samuweli 15:11

“Nyi ngu dzi laya kholu nyi nga emisa Sawule gu khala mufumeli, kholu a nyi wugede, a si landrisi sileletelo sangu.” Samuweli a di vbisega ngudzu, wutshigu watshavbo a lila ga Pfhumu Nungungulu.