Jakobe 5:7 - Bhibhiliya Nya Guage

⁷ Khu guralo, vandriyangu, timiselani kala Pfhumu yi wuya. Wonani edzi mulimi a timiselago khidzo, kala lithembwe laye li ninga mihandro nya yadi. Uye a gu timisela, a gu virela ndzadzi nya guphele ni eyi nya guhegise.

Jakobe 5:7 Iomraidhean Croise

Jeremiya 5:24

Kha va alakanya khu myonyoni gwawe, khavo: Hongoleni hi ninga githawo Pfhumu Nungungulu wathu, Uye gikhati nya guenele a hi wiselago ndzadzi nya nango nya gu yale ni gu vidzwa dzimbewu, a vegidego dzisemana nya guvbwere dzi gumba vbindra.

Hoseya 6:3

Hongoleni hi muti Pfhumu Nungungulu, hi na dzi garadze khu gu vbweta gu muti. Uye a nata gu fanana ni Wuronga, a nata avbo gwathu kha nga ndzadzi nya gilimo, ndzadzi nya maronga yi naganisago mafu, kha na tandrega guta hi phasa.

Joyele 2:23

Enu vathu va Siyoni, tsakani mu nengela ga Pfhumu Nungungulu wanu, kholu uye a na mi ninga muhevbudzi nya gululame ni gu wisa ndzadzi khu gikhati ni nango yi vbwetegago, khu ngima nya guhegule.

Zakariya 10:1

Lombani ndzadzi ga Pfhumu Nungungulu gikhatini nya gilimo, kholu Uye khuye a girago mabara ni gulasa ni gu wisa dzindzadzi nya dzikhongolo, yi nonisa wulime, a ninga ga moyo ni moyo mihandro ya thembweni gwaye.

Matewu 16:27

Kholu Mwamana wa Muthu a nata ni dzingilozi dza Nungungulu, na tade khu gidhumo gya Babe waye, ata ninga moyo ni moyo, tshatshazelo waye gukhedza khu mithumo yaye.

Matewu 16:28

Khu lisine nyi ngu mi embelani nya gukheni: Vomo hi gu navo avba va na gumba linga lufu, kala va gu wona Mwamana wa Muthu na guta ni mufumo waye.”

Matewu 24:27

Kholu, kha nga ndzadzi yi lasago, yi wenengedza litigo latshavbo, gukhugela Khugadambo kala Pfoladambo, kharato nugo gu na girega gikhati a na tago Mwamana wa Muthu.

Matewu 24:44

Khu kharato, enu nenu khalani na mu dongide, kholu Mwamana wa Muthu anata gikhati mu na gumba gi lindrela.

Luka 18:8

Nyi ngu mi embelani, khu lisine, kheni: A na dzegela gu si lamula. Ina gikhati a na wuyago Mwamana wa Muthu, a nata mana gukhodwa tigoni, gani?”

Luka 21:27

Khavbo avbo, va na wona Mwamana wa Muthu na gu tshiga khu vbakari nya lipfhi, na tade khu tshivba nya yikhongolo ni gidhumo.

Luka 8:15

Yile yi nga thegela wulimeni nya wadi khu vale nya gu, na va ma pwide, va ma hakha khu monyo nya wadi nya gululame, va ma vegedza nyamba rereka kala va gu thela mihandro.

Johane 21:22

Jesu a di hakha, khuye: “Nya gu dzina gukheni a vbanye kala nyi gu wuya, ginani gi gu garadzago? Uwe nyi landre basi.”

Johane 21:23

Khavbo avbo, ma di phalalega, vbakari ga vandriyaye, malipha nya gupwani mupizane wule kha na ngafa. Jesu khandri a di khuye: Kha nafa, aholu, “Nya gu dzina gukheni a vbanye kala nyi gu wuya, ginani gi gu garadzago?”

Varoma 15:4

Kholu satshavbo si guromo omu nya Milowo nya Guage si lovedwe gu khala gihevbudzo gwathu, gasi hi mane gutumba khu kotani nya gutimisele hi gu manago umo nya Milowo nya Guage.

Varoma 2:7

A na ninga guvbanya nya gupindruge vale va dzi garadzago khu guthuma mithumo nya gululame, vale va mu dhumisago ni gu mu rungudza na va gu dwanela gu mana womi nyamba vbela.

1 Vakorinto 1:7

khu kharato, gi mwalo giningwa nya wuhigo gi mi kenelelago, enu mu guromo vbakari nya gukhevisele guwuya ga Pfhumu yathu Jesu Kristo.

Vagalatiya 5:5

Gasi ethu hi na ni gutumba gukhethu Kristo a na hi hakha; khiso hi tumbago khu tshivba nya Liphuvbo nya Guage hi yi manago khu gukhodwa.

Vagalatiya 6:9

Hi nga garali khu gu gira esi nya sadi. Kholu, ha gumba rereka, hi na vbwera khu gikhati gyakone.

Dhewuteronome 11:14

nyi na wisa ndzadzi tigoni gwanu khu gikhati gi vbwetegago, ndzadzi nya maronga ni ndzadzi nya girame, mu kodze guvbwera tirigu yanu, gasi mu mane vbinyu nya yiphya ni mafura.

Vakolosi 1:11

Ha gu lomba ga Nungungulu a mi tiyisa khu tshivba yaye nya yikhongolo, mu kodze gutsarama siloni satshavbo khu gutimisela ni gutsaka.

1 Vatesalonika 1:3

Hi ngu mati gwadi mavbanyelo nya gukhodwe gwanu, ni gu dzi garadza gwanu khu lihaladzo, ni gutiya gutumbani gwanu mu gu nago khu Pfhumu yathu Jesu Kristo, mbeli ga Nungungulu Babe wathu.

1 Vatesalonika 2:19

Gikhati Pfhumu yathu Jesu Kristo a na gutago, khu mani a na khalago gutumba gwathu, ni gutsaka gwathu, ni ndronga yathu nya wudhumo mbeli gwaye, vbavbandze ga enu?

1 Vatesalonika 3:13

Khu guralo, myonyo yanu yi na bani yiri gululamani nya gwadi, khavbo mu na gu kodzago guya emani mbeli ga Nungungulu, Babe wathu, na mu agide, muri mwalo nandru, gikhati Pfhumu yathu Jesu Kristo a na gu wuyago ni sihathwa saye satshavbo.

Vahebheru 6:15

Abrahama a di timisela, a si mana kharati esi Nungungulu a nga mu tumbisago.

Jakobe 4:11

Vandriyangu, mu nga ganelelani guvivba khu gyanu. Oyu a ganelago guvivba khu ndriyaye mwendro gu mu lamula, a ngu ganela guvivba khu nayo, a wu lamula. Uwe wa gu lamula nayo, gu yeyedza gupwani khuri muthu u landrisago nayo, aholu u muthu u lamulago nayo.

Jakobe 5:10

Vandriyangu, alakanyani vaprofeti va nga ganela khu lina la Pfhumu. Va gireni giwonelo nya gutimisele gikhati nya sisaniso.

Jakobe 5:3

Ndralama ni parata yanu si pfhurede. Gupfhurela gogu gu na khala fakazi nya gu mi wugele kha nga nilo, gu hodza sivili sanu. Enu, mu wungedzede dzithomba ga matshigu yaya nya guhegise.

2 Pedro 3:4

khavo: “Uye tumbiside gukhuye a na wuya, khandridzo, womo hayi olu? Vababe vathu va fude, satshavbo si ngari idzosaye gukhugela guvangwa nya mafu.”