Isaya 7:13 - Bhibhiliya Nya Guage

¹³ Khavbo avbo, muprofeti Isaya, a di ganela, khuye: Olu yingisani gwadi, enu lihundzu la Dhavhidhe; Ina kha mu garali khu gu hodzisa mbukuta vathu, gani? Mwa guvbweta gambe gu hodzisa mbukuta Nungungulu wangu, gani?

Isaya 7:13 Iomraidhean Croise

Genesi 30:15

Liya a di hakha, khuye: “Khwa eneledwa khu gu nyi bela mwama wangu, wa gu vbweta gambe gu nyi bela mihandro nya lihaladzo ya gyanana gyangu, gani?” Rakeli a di hakha, khuye: “Ina ka, uwe nyi ninge mihandro nya lihaladzo ya mwanago, wutshigu wa muhuno, mwama a nata lala iyo gwago.”

2 Dzikoronika 21:7

Aholu Pfhumu Nungungulu kha nga gola gupfhungumula nyumba ya Dhavhidhe, khu kotani nya gidzumeledzwano a nga bani giride naye, kholu a di ganede naye khuye, a na mu ninga sanana si na khalago mwenge nyamba tshimega kala gupindruga.

Dzindzimo 45:5

Siholoma sago si lodzidwe, si ngu hekha monyo wa valala va Mufumeli; mayigo yatshavbo ma nguta khoza avbo gwago.

Isaya 1:14

Mibuzo yanu Gumege nya Ngima ni mimbe mibuzo nya miphaso, yi ngu swihadza hefemulo wangu, yi ngu nyi lemela; nyi garade khu gusaniseka.

Isaya 1:24

Khu guralo, a ngu ganela Pfhumu Nungungulu nya Tshivba Yatshavbo, nya Dzitshivbe wa Israyeli, khuye: Wonani! Nyi na guhula likhulo langu vbatshani ga vale va nyi vengago, nyi na phodza ga valala vangu.

Isaya 22:22

Nyi na vega magatani gwaye, pfhungulo ya nyumbani nya wufumu wa Dhavhidhe; uye a gu tula, mwalo a na kodzago gu sega, a gu sega, mwalo a na kodzago gu tula.

Isaya 25:1

Uwe Pfhumu, khuwe Nungungulu wangu; nyi na khusedza ni gudhumisa lina lago, kholu u giride silo nya gusamadzise; u landriside khu gutumbega ni gutiya makungo u ma hungidego khu gale.

Isaya 43:24

Kha wa nyi rengela misimbo nya gunungele khu dzitsapawu, ambari gu nyi tsakisa khu mafura nya sifuyo nya miphaso, aholu u di nyi tshanisa khu sighoho sago, u nyi garadza khu guvivba gwago,

Isaya 63:10

Aholu avo va di mu yeyisa va swihadza Liphuvbo laye nya Guage; khu guralo, uye a di dzi gira nala wawe, uye kamwe a di dwana navo.

Isaya 7:12

Akazi a di phindrula, khuye: “Kha nyi na gira isoso, gambe, kha nyi na linga Pfhumu Nungungulu.”

Isaya 7:2

Khu guralo, ndranga ya Dhavhidhe yi di tiviswa gupwani: “Siriya hungide pwanano ni va na Efrayimi.” Khavbo avbo, monyo wa Akazi, wu di ndrendremela gumogo ni vathu vaye, gu fanana ni misimbo ya khabini ya gu bani yi kutsungwa khu phuvbo.

Jeremiya 21:12

Uwe nyumba ya Dhavhidhe! Pfhumu Nungungulu a ngu ganela kharati, khuye: Vbadzimindrutunu lamulani khu gululama, tshudzisani avo va tshaniswago, gasi likhulo langu li si dzuri nga nilo, li vbisa nyamba tshimwa khu muthu, khu kotani nya mithumo yanu nya guvivbe.

Jeremiya 44:22

Pfhumu Nungungulu garade khu gu timisela mithumo yanu nya guvivbe ni manyala yatshavbo mu nga bani mu gira; khu guralo, litigo lanu li sasedwe li khala marumbi, li khala gisamadziso ni givalo, nyamba khadwa khu muthu, kha nga mu si wonago muhuno.

Jeremiya 6:11

Khidzo kharato nyi tadego khu likhulo la Pfhumu Nungungulu; nyi garade kha nyi nga gu dzi kodza gu dzi phara. Nyi na li vbaladza likhulo lolo vbatshani ga sanana sawe si gimbilago dzindzilani numo nya mitshangano nya vathu vaphya; kholu vatshavbo mwama ni ngadzi va na modwa gumogo, vama nya vakhongolo ni avo va gumbidego, vatshavbo va na modwa.

Ezekiyeli 16:20

Gu diga isoso, u dzegide ambari ni sanana sago nya sikhwathana ni sagadzyana u nyi velegedego, u gira khiso miphaso, gasi si hodzwa khu sithombe soso. Ina khu guralo, wuphuphulu wago wu dugwana, gani?

Ezekiyeli 16:47

Khu guralo, kha wa landra dzindzila dzawe ni gu gira gunyenyeza va gu giridego avo, aholu u giride silo ya gunyenyeze ngudzu mithumoni gwago guvbindra avo.

Ezekiyeli 34:18

Ina gilo gi dugwana gu hodzani wuhaviseloni nya wadi, mu bwelo mu gandredzelani khu migondro esi si tshadego nya mahawo, gani? Ina kha si mi tsakisi gu selani mati nya guage, gani? Gu ngu lombega gu ayo ma tshadego mu ma vhilusa khu migondro, gani?

Ezekiyeli 6:9

Mayigoni momo mu na vbagedwago mu ya umo, vale va na vbulugago gu songwa va na nyi alakanya mayigoni mule va na yiswago umo guya girwa dzikhumbi; kholu va nyi swihadzide khu kota nya myonyo yawe nya wuphuphulu va hambana ni eni, maho yawe ma dogorela sifananiso sa vanungungulu vawe nya malipha; khu guhegisani, va na dzi laya vabune kamwe khu kotani nya mithumo yawe yatshavbo nya guvivbe va giridego.

Amosi 3:13

Olu, tulani dzindzeve mu yingisani esi, khu mahungu nya livelego la Jakobe, a ngu ganela Pfhumu Nungungulu nya Tshivba Yatshavbo.

Malakiya 2:17

Enu mu reride Pfhumu Nungungulu khu magana yanu; gambe mu nga guganela, khenu: “Hi mu reride khu ginani?” Kholu mu ganelago, khenu: Muthu watshavbo a ghohago a ngu golega mahoni ga Pfhumu Nungungulu, ni gukhenu, a ngu nengedziswa khu vathu vovo; mwendro avbo mu wudzisago, khenu: “Womo hayi Nungungulu nya gulamule?”

Mitengo 16:13

Ina sidugwana olu, u hi dusidego khu ga litigo li gogago mahwe ni wulombe gasi hi tafa mugiwulani momu, gani? Olu u nga gu vbweta gambe gu hi khozisa, gani?

Mitengo 16:9

Ina enu mwa gu wona nari gilo nya gidugwane olu Nungungulu wa Israyeli a mi hathidego vbakari nya tshangano wa na Israyeli, a mi hidzimisa vbafuvbi gwaye gasi mu ta thuma thumo wa Walangani nya Guage wa Pfhumu Nungungulu, ni gu ema mbeli nya tshangano kha nga vathangeli vaye, gani?

Luka 1:69

A hi resede Muvbanyisi nya tshivba, a dugelago nyumbani ya githumi gyaye Dhavhidhe.

Mithumo 7:51

Vathu va nya gu banga mihungo, nya myonyo nyamba khodwa ni dzindzeve nyamba pwa. Mu ngu bomba Liphuvbo nya Guage gikhati gyatshavbo, nga edzi va nga bani va gu gira vababe vanu.

Vahebheru 3:10

Khidzo kharato nyi nga khala giviti navo, nyi ganela, kheni: “Ava vathu nya guvivbedwe khu myonyo, kha va dzini gu landrisa dzindzila dzangu.”