Isaya 22:12 - Bhibhiliya Nya Guage

¹² Ga litshigu lolo, Mune, Pfhumu Nungungulu nya Tshivba Yatshavbo, a ngu mi ramba gu muta lila, ni gutsikwila, mu vbalula ndzudzu hungoni ni gu ambala myendra nya silendra.

Isaya 22:12 Iomraidhean Croise

2 Dzikoronika 35:25

Jeremiya a di emba ndzimo nya gulile Josiya. Vatshavbo vaembeleli nya vama ni vanyamayi, gililoni gwawe, va di ganela khu Josiya, va nga gu simama gu embelela ndzimo yoyo kala na muhuno; owu wu khade nari nayo tigoni ga na Israyeli. Dzindzimo dzedzi nya gililo dzi lovidwe umo nya Libhuku nya gililo.

Ezira 9:3

Na nyi pwide silo nya nga esi, nyi di pferula dzingandzu dzangu ni gifenengelo gyangu nyi vbalula ni ndzudzu wa hungoni gwangu ni giledzu gyangu, nyi khala vbavbatshi na nyi tade khu guswihala.

Nehemiya 9:9

U wonide gusaniseka ga vababe vathu tigoni ga Egipito, U pwide huwa yawe vbafuvbi ni yiphwa nya Gufuvile.

Joba 1:20

Khavbo avbo, Joba a di khuga a ema, a pferula dzingandzu dzaye, a vbalula ndzudzu hungoni, a thega vbavbatshi khu khovbe, a lombelela,

Muhevbudzi 3:11

Silo satshavbo Nungungulu a si vegede gikhati gyaye; na vegide gambe myonyoni gwawe gu alakanya dzinango nyamba vbela; ambari kharato, mwalo muthu a wutigo thumo wu giridwego khu Nungungulu gukhugela guphela kala mahegiso.

Muhevbudzi 3:4

gikhati nya gulile, ni gikhati nya guhege; gikhati nya wuvi, ni gikhati nya gughiye khu gutsaka;

Isaya 15:2

Vavbanyi va Bhajiti Dhibhoni va gu gwela malangani nya miphaso ya musigomoni, vaya lila; Mowabhi a ngu lila khu kotani ya Nebhu ni Medhebha. Vatshavbo va vbalude ndzudzu ni guvila giledzo.

Isaya 26:10

Muthu nya guvivbedwe khu monyo, ambari a gu tsetseledwa, kha hevbuli gululama, ambari a gu khala tigoni la va nya gululama, uye a gu gira ugo nya guvivbe, kha woni wugulu wa Pfhumu Nungungulu.

Isaya 29:1

Libango lago uwe Ariyeli! Ariyeli, lidhoropa lile Dhavhidhe a nga vegago umo lizumbo laye! Engedzelani khu mwaga ni mwaga, gu manega mibuzo.

Isaya 3:24

Wulangani nya mafura nya gunungele, gu na pwala gununga nya silo nya guhine, wulangani nya libhandri, gu na manega ngodzi; wulangani nya gulugwe ndzudzu, gu na manega likhwalu; wulangani nya guambale nya buzo, gu na ambadwa silendra; wulangani nya wumburi, gu na manega mambala nya guvbiswe khu nilo.

Isaya 32:11

Ndrendremelani enu vanyamayi mu dzipwago na mu khadzisegide; tshulani guambala gwanu, mu khala wumbwiri, mu ambala dzisaku siwununi gwanu.

Isaya 37:1

Avbo mufumeli Ezekhiya a ngapwago magana yaya, a di pferulela dzingandzu dzaye, a ambala dzisaku, aya bela Nyumbani ga Pfhumu Nungungulu.

Isaya 37:2

Khavbo avbo, mufumeli a di rumela Eliyakimi, muwoneleli wa nyumbani nya wufumu, ni Sebina, mulovi nya mahungu, ni madhota ya vaphasi nya mhamba, vatshavbo na va ambade dzisaku ni sikutitshalu, va hongola ga muprofeti Isaya, mwamana wa Amosi.

Isaya 58:3

Va gu ganela, khavo: Gwa gu phasa ginani gu hi hala ni gu dzi sodzisa, nari gu uwe khu theli kota khu ethu? Ni gu garadza hefemulo wathu mahala khu isoso? Aholu litshigu mu halago, mwa gu gira iso mu si golago, mu tshanisani sithumi sanu.

Jeremiya 16:6

Vakhongolo ni sanana va nafa tigoni momu nyamba dzingwa khu muthu; kha va na lidwa ambari gu dzi hatshela ni gu vbalula ndzudzu mihungoni gwawe.

Jeremiya 16:8

Gambe u nga beli nyumbani va girago buzo u ya hengela gu hodza ni gu sela gumogo navo.

Jeremiya 4:8

Khu guralo, ambalani silendra mu lila ni gu womba dzihuwa; kholu nilo nya likhulo la Pfhumu Nungungulu kha wa ndreya mbeli gwathu.

Jeremiya 7:29

Vbalulani ndzudzu wa hungoni gwanu mu dzudzuga hwindzo; wombani huwa ni gu lila musigomoni nya gulaphe, kholu Pfhumu Nungungulu hambanide ni gitugulwana gegi gi wusidego likhulo laye, a gi diga.

Ezekiyeli 27:31

Va na vidwa likhwalo ni gu ambala silendra khu kotani gwago; va na gu lilela khu wuvi wawe watshavbo; va gira gililo nya gikhongolo.

Dhaniyeli 5:1

Mufumeli Bhalitazari, a di gira buzo nya khongolo ngudzu a girela likhumi mazana (1.000) dzindruna dzaye, a sela navo wadwa.

Hoseya 9:1

U nga tsaki uwe Israyeli, u bhuma, u ndragandraga, u fanana ni mambe mayigo, kholu u hambanide ni Nungungulu wago, khu gu dzi ningedzela wubhayini; u rengiside lihaladzo lago khu gu gira wuphuphulu musithalani gwatshavbo nya tirigu.

Joyele 1:13

Enu vaphasi nya mhamba, ambalani silendra mu lila; wombani huwa enu mu thumelago vbagiluvelotunu; belani na mu ambade silendra, mu lila wutshigu watshavbo, enu mu thumelago Nungungulu wangu; kholu miningelo nya dzimbewu niyo nya wadwa, kha yi ningedwi gambe Nyumbani ga Nungungulu wanu.

Joyele 1:8

Lila nga nyamahegyane nya likendzi a ambadego gilendra a lilela mwama waye nya lidzaha.

Joyele 2:12

Khu guralo, olu kamwe, a ngu ganela Pfhumu Nungungulu, khuye: Vbindrugedzani mu wuye gwangu khu monyo wanu watshavbo; isoso na mu gu hala khu gu lila ni gu womba dzihuwa.

Joyele 2:17

Va na lile vaphasi nya mhamba, va thumelago Pfhumu Nungungulu, va na lile vbakari nya mwanya nya Nyumba ya Nungungulu ni giluvelo, va lombelela khavo: Uwe Pfhumu Nungungulu tsetsa vathu vago, u nga ningeli thomba yago yi khala gihegiso, va nya mayigo va gira guhaladza khiyo; kholu mambe mafumbu ma nga ganela khayo: Womo hayini Nungungulu wawe?

Amosi 8:10

Nyi na vbindrugedza mibuzo yanu yi khala gililo, ni dzindzimo dzanu dzi khala dzihuwa, musiwununi gwanu, mwatshavbo mu na hunga myendra nya silendra, mihungoni gwanu mwatshavbo mu na vbaludwa makhwalu. Litshigu lolo, li na khala na liri la gililo nya gufanane ni wule a nga fedwa khu gyanana gya gimwegyo, mahegiso gwaye nga litshigu nya wuvi.

Jona 3:6

Mahungu yaya ma di vboha dzindzeveni ga mufumeli wa Ninivha; uye a di khuga khu vbagikhalotunu gwaye nya wufumu, a tshula dzingandzu nya wufumu, a ambala dzisaku, a puluwundra ngumani.

Mikeya 1:16

Vbalulani ndzudzu hungoni, mu lila sanana sanu mu si golago; vbalulani mihungo yanu yi fanana ni uwo nya lighama, kholu sanana sanu si dzegidwe si yiswa wugumbini.

Jakobe 5:1

Olu, enu sitetema, upwani! Lilani, mu wombe dzihuwa khu kotani nya sisaniso mu na si wonago.