Isaya 21:9 - Bhibhiliya Nya Guage

⁹ Olu, wonani! Gu nguta gikwata nya vama, vakhileli nya dzikavalu khu vavili vavili. Khavbo avbo, uye a di khusa lito a ganela, khuye: Thegide! Thegide Bhabhiloni; ni sifananiso saye satshavbo nya vanungungulu nya guvatwe, si pandregede si mbambamela mafuni.”

Isaya 21:9 Iomraidhean Croise

Isaya 13:19

Bhabhiloni, oyu a gu mburi ga mifumo yatshavbo, lidhoropa nya matshandza ya Vakalidhiya ni wuzundzo wawe, li na fanana ni Sodhoma ni Ghomora, ayo Nungungulu a nga ma mbembisago.

Isaya 14:4

mu na emba ndzimo yeyi nya gutsorodzele mufumeli wa Bhabhiloni, khenu: Mutshanisi thegede hayi! Ni dzihanyi dzaye dzi vbede kharini!

Isaya 2:18

Sifananiso satshavbo nya vanungungulu nya malipha si na khungumuledwa muphelo.

Isaya 21:7

A gu wona vathu na va khilede dzikavalu na vari vavili vavili, ni vama na va khilede siburwana mwendro dzingameriya, a na va khedze gwadi a dzi wonela gwadi.”

Isaya 47:5

Khala vbavbatshi huwe kape, u bela vbakari nya gidema, uwe nyamahegyane wa Vakalidhiya, kholu gima khu na ranwa gambe pfhumugadzi nya mifumo.

Isaya 47:9

Aholu sigaradzo sa sivili, si na gu dugelela khu litshigu limwedo; u na fedwa khu sanana sago ni gu khala noni; si na gu garadzela ngudzu. Ambari nuri ni mirendre nya gutale ni wuloyi nya tshivba.

Isaya 48:14

Tshanganani enu mwatshavbo, mu yingise! Khu mani vbakari nya vanungungulu vovo, a tivisidego silo sesi? Pfhumu Nungungulu gode Kiro, a na gira guhaladza gwaye vbatshani ga Bhabhiloni, gyandza gyaye gi na dwana ni Vakalidhiya.

Jeremiya 50:29

Rambani vatshavbo va kodzago gu khwandra siholoma; va na hekhe litigo la Bhabhiloni, va li randrela gu si dugi ni wa gu duga. Va bweledzeleni gukhedza khu mithumo yawe, satshavbo a mi giredego mu gireleni nuye kharalo; kholu a dzi khusedzide a wugela Pfhumu Nungungulu, Gihathwa gya Israyeli.

Jeremiya 50:38

Gu na manega gambe lihani, li vbwisa mitsongo yawe yi khala gihala nyambana mati! Kholu tigoni gwawe gu tade khu vanungungulu nya sifananiso si hambanisago mapimo nya vathu vawe.

Jeremiya 50:42

na va dongide wulaho ni sighalala; na vari ni gigaha nyamba tsetsa muthu, ligwaha lawe li na fanana ni gudzuma nya linene, va na khilela dzikavalu va fola khu dhiliza gasi guta dwana nago, uwe lidhoropa la Bhabhiloni.

Jeremiya 50:9

Kholu wonani nya gukhenu eni nyi na resela Bhabhiloni mitsawa ni sidzemo sa mayigoni nya makhongolo si tago khu Wuronga, va nata wumba gikwata va dwana naye kala va mu pala; matshari yawe, ma na fanana ni ya ndrena yi gengedego ni limwedo kha li na wuya mahala.

Jeremiya 51:27

Ghwimbani ngavbya mafuni, mu womba pundru vbakari nya mayigo, mu rana mayigo ma ya mu sasela; mu mu rambela mifumo ya Ararati, Mini ni Asikinazi! Mu hatha muthangeli nya nyimbi, mu rumela dzikavalu nya gutale, dzi mu fenengedza kha nga mwamba nya dzimbera.

Jeremiya 51:44

Nyi na tsayisa Bheli, nungungulu wa Vabhabhiloni, nyi mu gosisa khu kanani gwaye, satshavbo a hodzidego. Mayigo gima kha ma na ngata tshangana gambe gwaye, ni libhiyo la Bhabhiloni li khungumudwe.

Jeremiya 51:47

Khu guralo, ma nguta matshigu nyi na gu tsayisa vanungungulu nya sifananiso nya guvatwe va Bhabhiloni; litigo latshavbo li na tala khu dzitshoni, ni vathu vatshavbo va na gu songwago, va na mbambamela vbakari gwaye.

Jeremiya 51:52

Khu guralo, ma nguta matshigu, a ngu ganela Pfhumu Nungungulu; nyi na gu khungumulelago sifananiso satshavbo nya guvatwe; vathu vatshavbo va payidwego dzimbanga, va na keta tigoni gwawe gwatshavbo.

Jeremiya 51:64

u ganela, khuwe: A na rikiswe kharati Bhabhiloni, a si wonegi gambe khu kotani nya libango nyi na gu mu rumelago. Avo va na thega.” Ma gu hegisa avba magana ya Jeremiya.

Jeremiya 51:8

Khu githugedza, Bhabhiloni thegide a khala marumbi; lilani khu uye, vbwetani rendre mu todze dzimbanga dzaye; mwendro saye a na hawuluga.

Gutuledwa 14:8

Yi di landrela yimbe ngilozi nya wuvili yi huwelela, khiyo: “Mbembide! Mbembide Bhabhiloni lidhoropa lile nya likhongolo! Uye a nga levisa mayigo yatshavbo khu vbinyu nya likhulo nya wubhemba waye.”

Gutuledwa 18:2

Yi di huwata khu tshivba khu lito nya gukhugege, khiyo: “Thegide! Thegide Bhabhiloni nya khongolo, gu vbindrugedzide gu khala wulanga nya madhimoni, phago nya maphuvbo yatshavbo nya guvivbe, ni wuthavelo nya sinyoni satshavbo nya gunyenyeze, si vengegago.

Gutuledwa 18:21

Khavbo avbo, ngilozi nya tshivba yi di khusa giwindri nya gikhongolo nya nga gitshindro yi gi rinya nondrwani, khiyo: “Khidzo kharati li na mbembiswago khidzo lidhoropa nya likhongolo la Bhabhiloni; mwalo a na li wonago gambe.