Isaya 1:9 - Bhibhiliya Nya Guage

⁹ Naripwani Pfhumu Nungungulu nya Tshivba Yatshavbo kha nga hi tshiyela vambe nya gukari, va vbanya, hi di hadza gu fanana ni Sodhoma, hi fanana ni Ghomora.

Isaya 1:9 Iomraidhean Croise

Genesi 18:26

Pfhumu Nungungulu a di mu hakha, khuye: “Nya guya mana vathu nya livbandre magumi nya gululame dhoropani ga Sodhoma, nyi na tsetselela litigo latshavbo khu kotani yawe.”

Genesi 18:32

Abrahama a di ganela gambe, khuye: “Pfhumu yangu, u na nyi divalela, nyi na ganela gambe gumogo basi: Ahati wa guya mana likhumi vathu nya gululame?” Pfhumu a di hakha, khuye: “Kha nyi na mbembisa lidhoropa khu kotani nya avo nya likhumi.”

Genesi 19:24

Khavbo avbo, Pfhumu Nungungulu a di wisa madhoropani ga Sodhoma ni Ghomora, ndzadzi nya sulufa ni nilo nya gute khu ga Nungungulu.

1 Dzipfhumu 19:18

Ambari khu kharato, nyi di tshiya livbandre na mavili magumi mazana (7000) vama nya guvbanye tigoni ga Israyeli, avo va ngamba khozela nungungulu Bhahali, ni sihofu sawe si ngamba mu bhejari.”

2 Dzipfhumu 19:4

A gu dzina saye, Pfhumu Nungungulu wago, a yingiside magana ya Rabhisaki ayo a rumedwego khu mune waye, mufumeli wa Asiriya, guta vala Nungungulu a vbanyago, mwendro saye Pfhumu Nungungulu wago a na kawuka magana yaya a ma pwidego; gasi olu gira nombelo khu vathu vava vatshadego!”

Isaya 1:8

Lidhoropa la Siyoni li tshade giwulani gu fanana ni tshatsha wa mahangeni, gu fanana ni gikhwathi thembweni nya madzwani, gu fanana ni lidhoropa li randredwego khu valala.

Isaya 11:11

Ga litshigu lolo, Pfhumu a na simama gu khusedza mandza yaye, gasi gu dzegisa vathu vaye, vale va tshadego tigoni ga Asiriya, Egipito, Patrosi, Etiyopiya, Elamo, Sinari, Hamati gumogo ni sidwa sa phwani.

Isaya 11:16

Gu na manega ndzila nya yikhongolo ya vathu vaye va tshadego, vale va vbulugidego ga Asiriya, kha nga idzo gu giregidego khidzo ga va na Israyeli gudugani gwawe khu tigoni ga Egipito.

Isaya 17:6

Aholu gu na tshala gwaye vadugwana nya guvbanye, gukhwatshi khu gu bani gu havedwe wuguhu gu tshaledzela wumbe nya gukari dzitshokhani nya matamo. Wa gu kutsungwa gu tshala dzikhongoba dzimbili mwendro dzitharu khu matamoni ya vbatshani, ni dzina mwendro livbandre, khu dzitshokhani nya matamo nya gunave. A ngu ganela Pfhumu Nungungulu wa Israyeli.

Isaya 24:13

Gu na girega kharato, omu mafuni, vbakari nya mayigo yoyo, kha nga idzo va girago umo nya simbo nya olivha, mwendro gikhatini nya guvbedze guvbwera mihandro.

Isaya 24:6

Khu kotani nya isoso, guvivba gu midzide mafu, ni avo va vbanyago umo, va mane nandru; vavbanyi va tigoni va na dagarela khu nilo, gu na tshala vathu vadugwana basi.

Isaya 37:4

Mwendro saye Pfhumu Nungungulu wago, a ma pwide magana ya Rabhisaki, a rumedwego khu mune waye, mufumeli wa Asiriya, guta vala Nungungulu a vbanyago, a gu dzina saye Pfhumu Nungungulu wago, a na mu tsayisa khu magana a ma pwidego; khu guralo, olu lombelela ga Nungungulu wago khu mitshaledwa ya vathu vaye.

Isaya 46:3

Nyi yingiseni, enu sanana sa Jakobe ni mitshaledwa yatshavbo nya lihundzu la Israyeli; enu nyi mi wugaredego khu mawogo gukhugela ndrani ga mayi wanu, kala mu velegwa.

Isaya 6:13

Aholu, gwa gu bani gu na tshade gipandre nya likhumi nya vathu va tigoni, gu na simama gu pfhungumudwa; gu fanana ni simbo nya munga ni nvula, ambari wa gu wu koka gu tshala gihuru, uwo wa gu thunga, kharato nugo ga mathungedwa yoyo, gu na dandra nyaluphye vathu va Nungungulu.”

Isaya 65:8

Pfhumu Nungungulu a ngu ganela kharati, khuye: “Gwa gu bani gu ngari ni dosi gitsatsani nya dziuvha, vathu vari, khavo: Mu nga gi pili kholu gu nga guromo silo nya sadi, kharati nyi na gira khu kotani nya lihaladzo nyi gu nalo ni sithumi sangu; kha nyi na va mbembisa vatshavbo.

Jeremiya 23:14

Aholu vbakari ga vaprofeti va Jerusalema nya gu wona silo nya guthise ngudzu; va gu gira wuphuphulu gumogo ni malipha, va gu kutsedzela vale va girago guvivba, gasi va si digi guvivba gwawe; vatshavbo nya gu va wona va gu fanana ni Sodhoma, ni vavbanyi va Jerusalema, va gu fanana ni Ghomora.

Jeremiya 42:2

va di embela muprofeti Jeremiya, khavo: “Upwa gulila gwathu, u hi lombelela ga Pfhumu Nungungulu wago, khu vathu vatshavbo vava va tshadego kholu, kha nga u dzitigo, hi diri vangi, aholu hi tshade na hiri vadugwana, kha nga u si wonago;

Jeremiya 50:20

Khu matshigu yoyo ni gikhati gyogyo, a ngu ganela Pfhumu Nungungulu, va na vbweta wuvivbi wa Israyeli, va si wu mani, va vbweta sighoho sa Judha, va si si mani, kholu nyi na tsetselela vale nyi na gu va diga va vbanya.

Gililo 3:22

Ethu kha ha mbembiswa khu wuhigo wa Pfhumu Nungungulu; kholu lihaladzo laye li mwalo mahegiso.

Gililo 4:6

Tsayiso wa nyamahegyane wa tigoni gwathu wa gu vbindra tsayiso wa Sodhoma, gikhati a nga pfhungumudwa khu githugedza na siri khu tshivba nya mandza nya vathu; aholu khu gyandza gya Nungungulu. Zain

Ezekiyeli 14:22

“Aholu, gu manega va nya gukari nya mitshaledwa; sikhwathana ni sagadzyana, si na duswago umo, iso si nata gwanu, gikhati mu na wonago ndzila yawe ni mithumo yawe, mu napwa gutangadziswa khu gu alakanya guvivba nyi gu residego Jerusalema.”

Ezekiyeli 6:8

Aholu nyi na tshiya vadugwana; vambe vanu va na vbuluga gu songwa gasi va kodza guphalalegiswa va yiswa ga mambe mayigo.

Joyele 2:32

Watshavbo wule a ranago lina la Pfhumu Nungungulu a na vbanyiswa; kholu gigomoni gya Siyoni dhoropani ga Jerusalema, gu na manega gutshudziswa, kha nga edzi Pfhumu Nungungulu a ganedego khidzo, ni vbakari nya mitshaledwa va na manega vale va na gu bani va ranidwe khu Pfhumu Nungungulu.

Amosi 4:11

Nyi mbembiside va nya gukari va vbakari gwanu, kha nga idzo Nungungulu a nga mbembisago khidzo Sodhoma ni Ghomora, aholu enu nyi mi vbulugisani kha nga khuni yi duswago niloni wu khondrago; ambari khu guralo, enu kha mwa vbindrugedzani mu wuya avbo gwangu, a ngu ganela Pfhumu Nungungulu.

Habhakuka 3:2

Uwe Pfhumu Nungungulu, nyi pwide na gu ganedwa khu ndruma yago; nya gu wona sigiro sago Pfhumu Nungungulu, nya gu ndrendremela. Wusedza nyaluphye mithumo yago matshigwanaya; ma tidwa ga gikhati gegi gyathu; likhulo lago, li alakanye khu wuhindzi.

Sofoniya 2:9

Khu kharato, nyi ngu sambanya khu womi wangu, a ngu ganela Pfhumu nya Tshivba Yatshavbo, Nungungulu wa Israyeli, khu lisine, Mowabhi a na fanana ni Sodhoma, sanana sa Amoni si fanana ni Ghomora, marembwe yawe ma na tala khu miba ni siruga nya munyu, gu na vbindrugedza gu khala giwula kala gupindruga. Va na phangwa khu mitshaledwa nya vathu vangu ni mitshaledwa nya vathu vangu yi na wandra mayigo yawe ma khala thomba yawe.

Matewu 7:14

Gasi ndzila yi yisago guvbanyani yi hongide ngudzu; mwanya wakone nuwo. Vadugwana va belago khiyo.

Varoma 9:27

Isaya nuye a ngu ganela, na gu thula Israyeli, khuye. “Ambari tengo nya vathu va Israyeli wu tala kha nga fungo wa phwani, gu na vbanyiswa basi vadugwana.

Varoma 9:29

Uye gambe Isaya a di phede khu gu ganela, khuye: “Nari gupwani Pfhumu nya Tshivba Yatshavbo kha nga hi tshiyela melego, na hi mbembide kha nga Sodhoma ni Ghomora.”

Dhewuteronome 29:23

Khu guralo, mayigo yoyo yatshavbo ma na wudzisa, khayo: Khu ginani Pfhumu Nungungulu a giridego esi tigoni momu? Khu gevbini givangelo gi nga wusago likhulo nya nga eli?

2 Pedro 2:6

Nungungulu mbembiside mayigo ya Sodhoma ni Ghomora, a ma pfhungumula khu nilo, kha nga giyeyedzo nya esi si na gu giregago ga ava va nya guvivbedwa khu myonyo.

Gutuledwa 11:8

Sirumbi sawe si na khala tshandzala mudzindzilani nya lidhoropa likhongolo, li ranwago khu gipimaniso pwani Sodhoma ni Egipito, umo gambe Pfhumu yawe yi nga khokhothedwago umo.