Hoseya 3:1 - Bhibhiliya Nya Guage

¹ Pfhumu Nungungulu a di nyi embela, khuye: Indra gambe uya haladzana ni nyamayi moyo a haladzwago khu pari yago, ambari olu a gu gibhayi. Mu haladze nga idzo Pfhumu a golago khidzo sanana sa Israyeli, ambari ulo avo va mu pfhuraredego va gola vambe vanungungulu ni gu tsakela sibwandzalati nya dziuvha.

Hoseya 3:1 Iomraidhean Croise

2 Samuweli 6:19

A di kabanisela vathu vatshavbo ni gidzemo gyatshavbo gya na Israyeli, gukhugela ga vama kala ga vanyamayi, moyo ni moyo, a mana gipandre nya gibaba, gitsuwu nya nyama ni dziuvha nya gubange. Khavbo avbo, vathu va di phalalega, muthu ni muthu a hongola gaya gwaye.

2 Dzipfhumu 13:23

Aholu Pfhumu Nungungulu a di va pwela gisiro, a va girela wuhindzi, a va tsetselela khu lihaladzo laye nya pwanano a giridego ni Abrahama, Isaki ni Jakobe; a si dzumeli gu va mbembisa ni gu va dzudzuga hwindzo ni khovbe yaye.

1 Dzikoronika 16:3

Khavbo avbo, a di kabanisela vatshavbo va na Israyeli, vama ni vanyamayi, moyo ni moyo a mana gipandre nya gibaba ni gitsuwu nya nyama ni sibaba nya dziuvha nya gubange.

Nehemiya 9:31

Ambari khu kharato, khu kotani nya wuhindzi wago nya wungi, kha wa va diga va mbembisa muphelo, ambari gu va pfhurarela, kholu Uwe, U Nungungulu U gu ni wuhindzi ni gu pwela wusiwana.

Dzindzimo 123:2

Kha nga sithumi nya vama si virelago gu tshudwa khu mune wawe niso nya vanyamayi, si virelago gu tshudwa khu pfhumugadzi yawe, kharato nethu ha gu khedzisela uwe Pfhumu Nungungulu wathu, na hi gu lirela gukhethu u hi pwela wusiwana.

Ekisodha 32:6

Khu mindru gakone, ni dzimindru, va di ningela dzimhamba nya miphaso nya guvbiswe ni dzimhamba nya gubonge. Vathu va di khala vbavbatshi va hodza, va sela, va khuga va hana, va gu ghiya.

Gizimba 2:5

Nyi hodziseni khu sitsatsa nya dzikhure, mu nyi nengedzisa khu makandzu nya gutshambe, kholu nyi ngufa khu lihaladzo.

Isaya 45:22

Wuyani avbo gwangu, mu na ta vbanyiswa enu mwatshavbo mutago khu mahegiso nya litigo; kholu eni kheni Nungungulu, mwalo mumbe.

Jeremiya 3:20

Pfhumu Nungungulu a ngu ganela, khuye: “Libango lanu enu va na Israyeli, kholu mwa gu fanana ni nyamayi a gumba tumbega ga mwama waye, enu nenu kha mwa tumbegani gwangu.

Jeremiya 31:20

Ina kamwe Efrayimi khandri uye gyanana gyangu nya gigodwa, gani? Gyanana gi godwago khu monyo wangu, gikhati nya gingi mapimo yangu kha ma digi gu mu alakanya; ni monyo wangu wa gu salala mbeli gwaye, khu guralo, nyi na mu pwela wuhindzi; a ngu ganela Pfhumu Nungungulu.

Hoseya 11:8

Nyi na dzi kodza kharini gu gu diga, uwe Efrayimi? Nyi na dzi kodza kharini gu gu ningela mandzani ga vambe, uwe Israyeli? Nyi na dzi kodza kharini gu mu gira kha idzo nyi nga girago khidzo lidhoropa la Adima? Gu mi girani nga idzo nyi giredego va Zebhoyimi? Khu ndrani nya monyo wangu gwa gu vila, nyi tala khu wuhindzi nyi gu pwela gisiro.

Hoseya 2:5

Kholu a gumba si diga eni nyi na mu tshulela dzitshalu, nyi mu tshiya kha nga litshigu a velegidwego khilo, a fanana ni giwula, a vbindrugedza a khala mafu nya gihala, nyi mu songa khu lidora.

Hoseya 4:11

Wubhayi, vhinya ya gale ni wadwa, si ngu songa mapimo.

Hoseya 7:5

Litshigu nya buzo wa mufumeli wathu, vathangeli va di vbindrugedza va khala vadwali, khu gu leva khu vhinya, va nga selago gumogo ni sidambane.

Amosi 2:8

Va gu lala bambe nya giluvelo ni giluvelo vbatshani guambala va wandredego va nya mangava navo. Nyumbani gwa vanungungulu vawe, va gu sela vbinyu ya vale va livbisidwego khu mangava.

Amosi 6:6

Enu mu selago vbinyu khu mikanvu, mu tola mafura nya lisima, gambe kha mu khathali khu gumbembiswa ga Josefa.

Mikeya 7:7

Gasi eni, nyi na tumba Pfhumu Nungungulu; nyi na namarela ga Nungungulu a gu muvbulugisi wangu; kholu Nungungulu wangu a na nyipwa.

Zakariya 1:16

Khu guralo, Pfhumu Nungungulu, a ngu ganela kharati, khuye: “Eni nyi na wuya nyaluphye Jerusalema na nyi tade khu gisiro; nyumba yangu yi na vbahedzwa umo, a ngu ganela Pfhumu Nungungulu nya Tshivba Yatshavbo, ni ngodzi nya gupime khiyo, yi na thawuludzwa Jerusalema.”

Matewu 26:50

Jesu a di mu wudzisa, khuye: “Ama sawena uwe, ginani u dzudego uta gira?” Khavbo avbo, va diya mu mola.

1 Vakorinto 10:21

Enu kha mu dzi kodzi gu sela gikombe nya phaso wa Pfhumu, mu wuya khavbo muta sela gambe gikombe nya miphaso nya vanungungulu nya malipha. Kha mu dzi kodzi gu hodza mbiyani nya Mhamba ya Pfhumu, mu wuya khavbo mu hodza gambe mbiyani nya dzimhamba nya vanungungulu nya malipha.

1 Vakorinto 10:7

Mu nga khozelini sithombe nya vanungungulu nya malipha kha nga vambe vababe va nga si khozelago, kha nga gu lovidwego omu nya Milowo nya Guage, gupwani: “Vathu va di khala vbavbatshi va hodza ni gu sela, va khuga va hana.”

1 Pedro 4:3

Gale enu mu luzide gikhati nya gingi khu gu girani esi va nya mayigo va si golago gu gira. Gikhati gyogyo, enu mu di gu vbanya wubhayini, ni gudogolela nya givili, ni wubewudzi, ni limidzo, ni guleva, ni gunyenyeza gwatshavbo nya gukhozele vanungungulu nya malipha.

Valamuli 10:16

Khavbo avbo, va di khungumulela vanungungulu nyamba phasa gilo va nga bani varomo vbakari gwawe, va khozela Pfhumu Nungungulu; uye a di vbisega ngudzu khu kotani ya Israyeli.

Valamuli 9:27

Va di duga va hongola mahangeni gwawe vaya havela dziuvha, va dzi gamela va gira wadwa; va di gira mibuzo nya gunengele. Va bela nyumbani ga nungungulu wawe, va hodza, va sela, va hembulula Abhimeleki.