Hoseya 10:8 - Bhibhiliya Nya Guage

⁸ Malangani nya gukhugege ya Bheti-Avheni, a gu tsindza nya giwono gya Israyeli, gu na pfhungumudwa; miba ni sirangalabwa, si buga vbatshani nya siluvelo sawe. Khavbo avbo, va na embela sigomo, khavo: “Hi fenengedzeni!” Ga sigomwana, khavo: “Hi futeleni!”

Hoseya 10:8 Iomraidhean Croise

Genesi 3:8

Ga igyo gikhati, va dipwa lito la Pfhumu Nungungulu a nga bani na gu gimbila thembweni apwa gupepa nya silambo, mwama ni nyamayi va di thava va sihalela Pfhumu Nungungulu misimboni ya thembweni.

1 Dzipfhumu 13:2

A dita laledza vbagiluvelotunu khu magana ya Pfhumu Nungungulu, khuye: “Giluvelo, giluvelo! Pfhumu Nungungulu, a ngu ganela kharati, khuye: Khumo nya lihundzu la Dhavhidhe, gu na velegwa gyanana gi na ranwago pwani Josiya, uye a na songa vbatshani gwago, vaphasi nya mhamba va malangani nya sigomo va gu vbiselago libani, va na gu vbisela khu marambo nya vathu.”

1 Dzipfhumu 13:34

Egi khigyo givangelo nya gighoho nya ndranga ya Jerobhowamo, gu kala yi mbembiswa ni gu fuviswa mafuni.

1 Dzipfhumu 14:16

Israyeli a na ningedwa khu kotani nya sighoho si nga girwago khu Jerobhowamo, esi a nga gira a ghohisa khiso va na Israyeli.”

2 Dzipfhumu 23:15

Ambari ni giluvelo nigyo gi bani giri Bheteli ni wulanga nya gukhugege uwo wu nga girwago khu Jerobhowamo, mwamana wa Nebhati, uye a nga ghohisa vatshavbo va na Israyeli; gumogo ni giluvelo gyogyo, ni wulanga nya gukhugege si di khungumudwa, nyumba yakone a yi vbisa yi khala nguma, a vbisa gifananiso gya Asitaroti.

2 Dzikoronika 31:1

Hwane nya gu bani gu vbede esi, vatshavbo va na Israyeli va nga bani na vari vbale, va di khuga va hongola madhoropani ya Judha, vaya pandrelela sifananiso, va kokelela madingo nya sifananiso sa Asitaroti, va khungumulela malanga nya sigomo, ni siluvelo tigoni gwatshavbo gwa Judha, ga Bhejami, ga Efrayimi ni ga va na Manasi, kala va vbedza satshavbo. Khavbo avbo, vatshavbo va na Israyeli, va di bwelela, muthu ni muthu a hongola gaya gwaye.

Isaya 2:19

Avbo, vathu va naya sihala dziphagoni nya siwindri, ni vbavbatshi nya mavbala, khu gu thava likhulo nya guthise li tago khu ga Pfhumu Nungungulu, ni gungangamela nya wugulu waye, gikhati a na tago guta thusa litigo.

Isaya 2:21

Vathu va na bela dziphagoni nya siwindri ni mavbalani nya sigomo, khu gu thava likhulo la Pfhumu Nungungulu ni gungangamela nya wugulu waye, gikhati a na tago guta thusa litigo.

Isaya 32:13

Tigoni ga vathu vangu, gu na buga miba ni sirangalabwa; gumogo gambe ni dzinyumbani gwatshavbo gu nga bani gu tsakwa umo, dhoropani puluwundrago khu gunengela.

Isaya 34:13

Dzinyumbani gwawe nya wufumu gu na buga miba, ni makhokholani gwawe gu na buga sirangalabwa ni maheho; gu na khala gambe wuvbanyelo nya masolwa ni dzimbowa.

Hoseya 10:2

Myonyo yawe khya wudambane; khu guralo, va na rwala nandru wawe; Pfhumu Nungungulu a na kokelela sihuru sawe nya miphaso, a pandrelela sithombe sakone.

Hoseya 10:5

Vathu va vbanyago Samariya va na thuswa khu githombe nya gimombyana gya Bheti-Avheni, kholu vathu vaye, va na lila khu kotani yaye, gumogo gambe ni tsawa waye nya vaphaseli nya sifananiso va nga bani va tsaka khu wudhumo waye, kholu thomba yawe yi dusidwego, vbakari gwawe.

Hoseya 10:9

Gukhugela matshiguni ya Gibheya, uwe Israyeli u di gira sighoho, u simama gu gira kharato. Ina nyimbi kha mwa manwa khiyo tigoni ga Gibheya, khu guta vbweta va nya guvivbedwa khu monyo, gani?

Hoseya 2:6

Sanana saye kha nyi na si sayisa khu lihaladzo, kholu sanana sa wubhayini gwaye.

Hoseya 4:13

Va olovede guphasela dzitshokhani nya sigomo, va vbisa mabani musigomwanani, vbavbatshi nya misimbo nya miguhu, mikandzu ni mikanyi kholu mitsa yakone kyadi. Khu guralo sanana sanu nya vanyamahegyane si ngu khala maphuphulu, ni vagadzamwane vanu va ngu bhaya.

Hoseya 4:15

Uwe Israyeli, wa guvbweta gu gira wuphuphulu, u nga rwegi nandru va na Judha! Mu ngati Giligali, ambari gu gwelani muya Bheti-Avheni, na mu gu sambanya, khenu: Hi ngu sambanya khu Pfhumu Nungungulu a vbanyago.

Hoseya 5:8

Wombani pundru dhoropani ga Gibheya, mu womba pundru dhoropani ga Rama, laledzani khu tshivba Bheti-Avheni! Dzi woneleni enu va na Bhejami.

Hoseya 8:5

Githombe gyago nya gimombyana uwe Samariya gi ngu nyi hasimisa monyo; likhulo langu li khondride vbatshani gwawe! Kala lini na va nga gu padwa khu gu dzi agisa?

Hoseya 9:6

Kholu wonani nya gukhenu va ngu tutuma va thava gusasedwa, aholu va na tombaniswa khu Egipito, va dzingwa khu Menifisi. Thomba yawe nya parata va yi golago, yi na pfhurela yi hodzwa khu muhwa; mitshatshani gwawe, gu na buga mwasi ni miba.

Amosi 1:5

Nyi na fanyeledzela migonyo ya Dhamasiko, nyi mbembisa vavbanyi va Bhekiyati-Avheni, ni wule a pharago ndronga nya wufumu wa Bheti-Edheni; vathu va Siriya va na yiswa wugumbitunu tigoni ga Kiri, a ngu ganela Pfhumu Nungungulu.

Amosi 3:14

Khu litshigu nyi natago nyita tsayisa Israyeli khu kotani nya sighoho saye, nyi na khungumula siluvelo sa Bheteli ni dzikeho nya siluvelo dzi na pidwa dzi thega vbavbatshi.

Amosi 7:9

Malangani nya sigomo nya miphaso ya Isaki, ma na vbindrugedza ma khala marumbi, ni malangani nya miphaso ya Israyeli ma na khungumudwa; nyi na wugela nyumba ya Jerobhowamo khu matshari.”

Amosi 8:14

Vale va sambanyago khu nungungulu nya malipha wa Samariya, va ganela, khavo: “Hi ngu sambanya khu nungungulu wago, uwe Dhani; ni avo va gukhavo: Hi ngu sambanya khu ndzila yiyago Bherisebha! Vanungungulu wowo va na thega, nyamba wuga gambe.”

Mikeya 1:13

Enu vavbanyi va Lakisi, hungani mipatwa nya dzikavalu vbadzikaretatunu, (ogu khu guphela nya gughohe ga nyamahegyane wa Siyoni) kholu avbo gwanu gu manegide sighoho sa Israyeli.

Mikeya 1:5

Satshavbo si na girega khu kotani nya guyeyise ga Jakobe ni sighoho sa nyumba ya Israyeli, khu gevbini gighoho gya Jakobe? Ina khandri Samariya? Khu wevbini wulanga nya miphaso nya vanungungulu nya malipha va Judha? Khandri Jerusalema, gani?

Nahume 3:11

Uwe nuwe, Ninivha, u na leva uya sihala; u na vbweta wulanga nya gusihale, u thava valala vago.

Luka 23:30

Gikhati gyogyo va na embela sigomo, khavo: ‘Hi thegeleni.’ Va na embela sigomwana, khavo: ‘Hi sihaledzeni!’

Dhewuteronome 9:21

Khu guralo nyi di dzega gighoho gyanu, a gu gimombyana mu nga bani mu giride, nyi gi vbisa niloni, nyi gi phwatisela, nyi gi kuya gwadi, kala gi khala wuguvbi; wuguvbi wakone nyi di wu rinya gitsongwanani gi nga bani gi relela khu gigomotunu.

Gutuledwa 6:16

va di embela sigomo ni siwindri, khavo: “Hi thegeleni mu hi siha ga wule a khadego vbagikhalotunu nya wufumu, ni ga likhulo la Nvutana,

Gutuledwa 9:6

Ndrani nya migima yoyo, vathu va na dogorela gufa va gu hamuga, va na vbweta gufa, aholu, lufu li na va thava.