Genesi 7:11 - Bhibhiliya Nya Guage

¹¹ Mwaga Nowa a nga tshanganisago livbandre na limwedo mazana (600) myaga nya guvelegwe gwaye, khu litshigu nya likhumi na livbandre na mavili (17) nya ngima nya wuvili, mati ya guetani nya mafu ma di kowoga khu tshivba khu musifefeni satshavbo, ni dzinyangwa nya mati ya vbatshani dzi di tulega.

Genesi 7:11 Iomraidhean Croise

Genesi 1:7

Gu di girega kharato. Nungungulu a di gira ndrengelenge, a hambanisa mati ya vbavbatshi ni aya ya vbatshani nya ndrengelenge, si girega kharato.

Genesi 6:17

Eni nyi na tshisa talo nya ndrambi mafuni, gasi guta langaladza sivangwa satshavbo si vbanyago vbavbatshi nya lidambo; satshavbo si guromo mafuni si nafa.

Genesi 7:6

Nowa a diri ni livbandre na limwedo mazana (600) myaga gikhati ndrambi yi langaladzidego litigo.

Genesi 8:14

Khu litshigu nya likhumi na livbandre na mavili, nya ngima nya wuvili, mafu yatshavbo ma di bangide gwadi.

Genesi 8:2

Sifefe nya mati ya vbavbatshi ni dzinyangwa dza vbatshani dzi di segega. Ndzadzi yi di hegisa guwa, yi khamuga.

2 Dzipfhumu 7:19

Ndruna yile yi di ganedzide muthu wa Nungungulu, khiyo: “Ambari Pfhumu Nungungulu a gu tula sihogo, ina si ngu kodze gu girega isoso, khu magana yoyo, gani?” Ni uye a di mu embede, khuye: “Uwe kamwe u na si wona khu maho yago, aholu khu na si hodza.”

2 Dzipfhumu 7:2

Aholu ndruna mweyo ya mufumeli eyi a nga bani a gu khighela vbagyandzatunu gwaye, yi di phindrula muthu wa Nungungulu, khiyo: “Ambari Pfhumu Nungungulu a gu tula sihogo ndzadzini, ina silo soso si nga kodzega gu girega, gani?” Uye a di hakha, khuye: “Uwe u na si wona khu maho yago, aholu khu na nga si hodza.”

Joba 12:15

A gumba wisa ndzadzi, mafu ma gu banga, a gu tulela ndzadzi, litigo la gu taledwa.

Joba 28:4

A gu tula mighodhi malangani ma si khadwigo khu vathu, avbo ni migondro nya vathu yi si gandrigo, a gira dengeledengele avbo nya ngodzi, hwindzo ni vathu.

Joba 38:16

Ina u di nga bela sifefeni sa linene mwendro gu relela guetani nya mati, gani?

Joba 38:37

Khu mani a gu ni guti nya gu sayele mapfhi, ni gu vbaladza milamba nya mati ya ndzadzini;

Dzindzimo 33:7

Uye a di tshanganisa mati ya phwani ma khala gigomo a vega minondrwa mivbinganoni gwaye,

Dzindzimo 74:15

Uwe u tude sifefe ni mitsongo, u bangisa mitsongo nya yikhongolo.

Mavingu 3:20

Khu guti gwaye ya gu tulega milondrwa nya guete, mapfhi ma thesa thondrwane.

Isaya 24:18

Uye a na thavago lito nya tshanisa a na thegela phalani, ni uye a na dugago khu phalani, a na modwa khu lizinga; kholu sihogo sa ndzadzini si tulegide, gu tsekatseka siseketelo nya mafu.

Isaya 24:19

Mafu yatshavbo ma na pandrega, ma kabanega khu vbakari, ma kutsungwa, ma tsekatseka khu tshivba.

Jeremiya 5:22

Pfhumu Nungungulu a ngu ganela, khuye: Ina kha mu nyi thavi, gani? Ina kha mu ndrendremeli mbeli gwangu, gani? Kholu kheni nyi nga girago vbingano nya linene khu mafu, vbingano nya gukala gupindruga nyamba ndragwa. Ambari ma gu khusega mavimbi yaye li dzuma linene kha wu na ndragwa.

Jeremiya 51:16

Khu libara nya lito laye, mati ma gu dzuma ndzadzini, gu khusega mapfhi khu mahegiso nya litigo, gwa gu lasa, ya guwa ndzadzi, gu khuga dziphuvbo khu malangani gwaye.

Ezekiyeli 26:19

Kholu Mune Pfhumu Nungungulu, a ngu ganela kharati, khuye: “Gikhati nyi na gu gira lidhoropa li khala marumbi nyamba khadwa khu muthu, gikhati nyi na gu girelago nondrwa, u langaladzwa khu mati nya mangi.

Malakiya 3:10

Resani miningelo yatshavbo nya gipandre nya likhumi avba nya silo nya dzithomba dzanu, muta thela kwamani nya Nyumba ya Nungungulu gasi gu manega guhodza Nyumbani gwangu, khu hwane nya isoso nyi lingeni, mu na wonani mwendro kha nyi na mi tulelani sihogo sa ndzadzini, mwendro kha nyi na mi vbaladzelani talo nya makategwa;” a ngu ganela Pfhumu Nungungulu nya Tshivba Yatshavbo.

Matewu 24:38

Na wu si gu dugi talo nya mati, vathu va di gu hodza ni gu sela; vama va di gu dzega, vanyamayi va di gu dzegwa, kala litshigu Nowa a nga belago litaroni.

1 Vatesalonika 5:3

Gikhati vathu va ganelago, khavo: “Litigo li lade, gu mwalo gilo,” khavbo avbo gu natago, khu gipitipiti, gumbemba vbatshani gwawe. Va na khala nga nyamayi nya mimba gikhati a lumwago, kha va na vbuluga.

2 Pedro 3:6

Va hangwa gambe khu gukhavo khu mati nya talo, litigo li di pfhungumudwa.