Genesi 42:15 - Bhibhiliya Nya Guage

¹⁵ Nyi na mi linga. Khu womi wa Faro, nyi ngu mi embela gukheni kha mu na nga duga tigoni momu a gumba ta ndriyanu nya nandra.

Genesi 42:15 Iomraidhean Croise

Genesi 42:12

Aholu uye a di va hakha, khuye: “Malipha! Enu mu dzude gasi guta wona gumba tiya nya litigo.”

Genesi 42:14

Josefa a di ganela gwawe, khuye: “Khidzo nyi ganedego gukheni enu mu vasoli.

Genesi 42:16

Rumelani moyo wanu guya mu dzega enu mu na khala sibotshwa; gu na wonega kharato lisine nya magana yanu. Mwa gumba girani kharalo, nyi ngu sambanya khu womi wa Faro, mu na wonwa kha nga valala.”

Genesi 42:20

Khu hwane, mu na nyi reselani ndriyanu nya nandra; kharato, khavbo ma na gu tadzisegago magana yanu, kha mu na ngafa.” Avo va di dzumela.

Genesi 42:30

“Mwama a gu mune nya litigo, a di ganela ni ethu khu wurena; a di hi wona kha nga valala nya vasoli hi yago hiya sola litigo.”

Genesi 42:34

Nyi wuyeleni ni ndriyanu nya nandra. Khavbo nyi na dzitigo gukheni kha mu ndri vasoli, ni gukheni mu vathu nya lisine. Nyi na mi ningani ndriyanu, nyi mi dzumedzisa mu gimbila tigoni mu rengani esi mu si vbwetago.”

Genesi 42:7

Josefa a di wona vandriyaye a vati, aholu a di dzi girisa gukhwatshi kha vati, a ganela navo khu tshivba, khuye: “Mwa guta khu hayi?” Avo va di hakha, khavo: “Khu tigoni ga Khanani. Ha guta renga guhodza.”

Genesi 43:3

Aholu, Judha a di hakha, khuye: “Mwama wule ganede khu tshivba yaye yatshavbo, khuye:” “Gima kha mu na nga wona khovbe yangu mwa gumba wuya ni ndriyanu.”

Genesi 43:5

Aholu wa gumba mu dzumedzisa gu hongola, ethu kha hi dzi kodzi gu bwelela eyi, kholu mwama wule, a hi embede, khuye: Mu ngati wonega mahoni gwangu mwa gumbata gumogo ni ndriyanu.

Jeremiya 5:2

Ambari sawe va gu ganela, khavo: “Hi ngu sambanya khu lina la Pfhumu Nungungulu a vbanyago.” Va gu sambanya malipha.

Jeremiya 5:7

Nyi na dzi kodza kharini gu gu divalela na nyi gu wona esi? Kholu sanana sago si nyi digide, va sambanya khu avo va gu siri vanungungulu; hwane nya gubani nyi mi ningide siningwa nya gutale, kha mwa tumbega, mu di tadzani migondro dzinyumbani nya maphuphulu mu ya tshangana iyoyo;

Dhewuteronome 6:13

U na ninga githawo Pfhumu Nungungulu wago, u mu thumela, u sambanya khu lina laye.

Jakobe 5:12

Aholu, ga satshavbo, enu vandriyangu, mu nga sambanyi khu ndzadzini, ambari khu mafu, ambari khu gimbe gilo. Ganelani basi, khenu: “Ina,” a gu bani ari ina; khenu “Ahihi,” a gu bani ari ahihi, gasi mu si ningwi nandru.

1 Samuweli 1:26

Ana a di mu embela, khuye: “Yingisa mune wangu, nyi ngu sambanya khu womi wago, eni kheni nyamayi wule nyi nga bani nyi lombelela ga Pfhumu Nungungulu vbafuvbi nago.

1 Samuweli 17:55

Avbo Sawule a nga wonago Dhavhidhe na duga gu yela Mufilisitiya, a di wudzisa Abhineri, muthangeli nya nyimbi, khuye: “Abhineri, gasi mwamana wule lidzaha la mani.” Abhineri a di mu hakha, khuye: “Nyi ngu sambanya khu lisine kha nga u vbanyago uwe pfhumu, gukheni, kha nyi muti.”

1 Samuweli 20:3

Khu guralo, Dhavhidhe a di gira gisambanyo a ganela, khuye: “Babe wago a ngu dziti gwadi gukhuye eni nyi manide wuwadi nya wukhongolo monyoni gwago, a di pimisa, khuye: Jonatane a nga siti esi gasi a si khuveki. Khu guralo, eni nyi ngu sambanya khu Pfhumu Nungungulu a vbanyago gukheni nyi womo ndzilani nya gufe.”