Genesi 17:1 - Bhibhiliya Nya Guage

¹ Abrama a diri ni livbandre na mama magumi ni livbandre na mina (99) myaga nya guvelegwe gwaye, Pfhumu Nungungulu a di dzi wonegisa gwaye a gu mu embela, khuye: “Eni kheni Nungungulu nya Tshivba Yatshavbo. Gimbila mbeli gwangu nu lulamide.

Genesi 17:1 Iomraidhean Croise

Genesi 12:1

Pfhumu Nungungulu a di embela Abrama, khuye: “Diga litigo lago, la valongo vago ni ndranga ya babe wago, u hongola ga litigo nyi na gu nonedzago.

Genesi 12:7

Pfhumu Nungungulu a di dzi wonegisa ga Abrama a mu embela, khuye: “Nyi na ninga litigo leli situgulwana sago.” Abrama a di vbaha vbale giluvelo gya Pfhumu Nungungulu a nga dzi wonegisago gwaye.

Genesi 16:16

Abrama a diri ni livbandre na mararu magumi ni livbandre na moyo (86) myaga gikhati Agari a velegidego Ismayeli.

Genesi 18:1

Pfhumu Nungungulu a di dzi wonegisa avbo ga Abrahama vbafuvbi ni miguhu ya Mambre, na khade mwanyani nya tshatsha waye, ni vbakari nya mihani.

Genesi 18:14

Ina gyomo gilo a gi tandregago Pfhumu Nungungulu, gani? Khu matshigu nya nga aya, mwaga wutago, nyi na wuya gambe khavba, Sara a na bani nari ni gyanana nya gikhwathana.

Genesi 24:40

Uye a di nyi hakha, khuye: Pfhumu Nungungulu a nyi thangelago dzindzilani gwangu gwatshavbo, a na rumela Ngilozi yaye yi gu bangaladza gasi lendro lago li mane mihandro hi yi vbwetago; u na dzegela gyanana gyangu nyamayi nya lihundzu langu, wa ndrangani ga babe wangu.

Genesi 26:2

Pfhumu Nungungulu a di dzi wonegisa gwaye a mu embela, khuye: “U nga releli tigoni ga Egipito, khala tigoni nyi na gu nonedzago.

Genesi 28:3

Nungungulu nya Tshivba Yatshavbo a na gu kategise, a gu dandrisa ni gu gu andrisa gasi u khale talo nya mahundzu!

Genesi 35:11

A di engedza gambe a mu embela, khuye: Eni kheni Nungungulu nya Tshivba Yatshavbo; uwe u na andra u velegelana, khavbo gwago gu na velegwa dhudhudhu nya mayigo ni vathu nya gutale ngudzu;

Genesi 43:14

Nungungulu nya Tshivba Yatshavbo a na mi gire mu mane wuhindzi ga mwama yoyo, gasi mu kodze gu wuya ni ndriyanu a tshadego, gumogo ni Bhejami. Gasi eni, gwa gu vbwetega gupwani, nyi dzegedwa sanana sangu, basi nyi na kheni ginani, nyi na dzegedwe.”

Genesi 46:3

Khavbo avbo, Nungungulu a di engedza, khuye: Eni kheni Nungungulu wa babe wago; u nga kanakani gu relela tigoni ga Egipito, kholu nyi na ya gu gira iyo litigo nya likhongolo.

Genesi 48:15

A di kategisa Josefa, a ganela, khuye: Nungungulu, oyu vababe vangu Abrahama ni Isaki va gimbidego khu dzindzila dzaye, Nungungulu, oyu a nyi sayisidego gukhugela guvelegwani gwangu kala litshigu la muhuno;

Genesi 48:3

A di ganela ga Josefa, khuye: Nungungulu nya Tshivba Yatshavbo a dzi wonegiside gwangu nari guwonegelani, tigoni ga Khanani, a nyi kategisa,

Genesi 5:22

Hwane nya gu na velegide Metusalema, Enoki vbanyide gipimo nya mazana mararu (300) myaga na gu landrisa gugola gwa Nungungulu, a di velega talo nya sanana nya vama ni vanyamayi.

Genesi 5:24

Enoki a di landrisa gugola ga Nungungulu gikhati gyatshavbo, a di mwalalega nyamba wonwa gambe. Kholu Nungungulu a di mu dzega aya khala naye.

Genesi 6:9

Aya khu matimo ya Nowa. Matshiguni gwaye, Nowa a diri uye basi muthu nya lisine nya gululame mafuni, a di gu landrisa gugola ga Nungungulu gikhati gyatshavbo.

1 Dzipfhumu 2:4

Khu kharato,Pfhumu Nungungulu a na tadzisa magana a ganedego avbo gwangu, khuye: Sanana sago, sa gu vegedza dzindzila dzawe, va gimbila khu ndzila nya gululame mbeli gwangu, khu monyo wawe watshavbo ni hefemulo wawe watshavbo, gima kha gu na hamugega muthu wa nyumbani gwago, nya gute khale vbagikhalotunu gwangu nya wufumu wa na Israyeli.

1 Dzipfhumu 3:6

Solomoni a di hakha, khuye: “U girede wuhindzi nya wadi ga githumi gyago babe wangu, Dhavhidhe; kholu gimbide nago khu lisine ni gululama, ni monyo nya gurule mbeli gwago, u mu ningide wuhigo wago nya wukhongolo, khu gu mu ninga gyanana gi khadego vbagikhalotunu gwaye nya wufumu, kha nga u si wonago muhuno.

1 Dzipfhumu 8:25

Gasi, olu, Pfhumu Nungungulu wa Israyeli, tadzisa iso u ganedego ga githumi gyago, babe wangu Dhavhidhe, u nga ganelago, khuwe: Gima kha gu na hamugega nyumbani gwago muthu nya livelego lago, a na gu fumelago va na Israyeli khu Lina langu, sanana sago sa gu dzi garadza khu gu landrisa dzindzila dzawe, va gimbila mbeli gwangu kha nga idzo uwe u nga gimbilago khidzo mbeli gwangu.

2 Dzipfhumu 20:3

“Dundruga Pfhumu Nungungulu, idzo eni nyi gu thumedego khidzo, nyi gimbide gwadi mbeli gwago, khu lisine ni monyo wu lulamidego, nyi gira gwadi mbeli gwago.” Ezekhiya, a di lila khu wuvi waye watshavbo.

Joba 1:1

Tigoni ga Huzi a di romo mwama moyo nya gupwani khu Joba. A diri muthu nya gululame a nga bani a nyenya gighoho, a ninga githawo Nungungulu.

Joba 11:7

Ina u ngu yela guti sihalo wa Nungungulu ni guvbelela ga uye nya Tshivba Yatshavbo, gani?

Dzindzimo 115:3

Nungungulu wathu womo ndzadzini a ngu gira silo satshavbo khu gugola gwaye.

Dzindzimo 116:9

Khu guralo, nyi na gimbila mbeli ga Pfhumu Nungungulu, tigoni nya vathu va vbanyago.

Dzindzimo 25:14

Pfhumu Nungungulu a gu tulela guti sihalo waye vale va mu thavago, a va tivisa gidzumeledzwano gyaye.

Ekisodha 6:3

Nyi dzi wonegiside ga Abrahama, ga Isaki ni ga Jakobe, kha nga Nungungulu nya Tshivba Yatshavbo, aholu, khu lina langu nya Pfhumu Nungungulu kha nya tidwa gwadi.

Mavingu 10:9

Uye a lulamidego a gu gimbila na tiyide, aholu uye a gimbilago khu dzindzila nya guwegele, a na tugudwa.

Isaya 38:3

a ganela, khuye: “Dundruga Pfhumu Nungungulu, idzo nyi vbanyidego khidzo khu gutumbega ni monyo wu agidego, ni gu thuma mithumo nya gululame mbeli gwago.” Ezekhiya a di lila khu wuvi waye watshavbo.

Jeremiya 32:17

Oh! Uwe Pfhumu Nungungulu wangu, khuwe u giridego ndzadzini ni mafuni khu tshivba yago nya yikhongolo ni libogo lago nya guthawuluge; avbo gwago gimwalo gi si kodzegigo.

Mikeya 6:8

Uwe muthu, Uye a gu nonedzide iso si gu sadi, iso Pfhumu Nungungulu a si vbwetago gukhuye u si gira khu esi: Gira iso si lulamidego, gola wuwadi, u gimbila khu gu dzi nogisa mbeli ga Nungungulu wago.

Mitengo 11:23

Khu guralo, Pfhumu Nungungulu a di phindrula Mosi, khuye: “Ina tshivba ya Pfhumu Nungungulu yi di vbunguga, gani? Olu u na wona wabune gukhuwe esi nyi gu embelago si na girega mwendro kha si na girega.”

Mitengo 24:16

magana ya muthu a yingisago mahungu ya Nungungulu, oyu a gu pimago guti gwa Uye a Khusegidego Ngudzu, uye a wonago Nungungulu nya Tshivba Yatshavbo, uye a dzi nogisago aholu na ma tulegide maho yaye.

Matewu 19:26

Jesu a di khedzisa gwadi vatshavbo, a va embela, khuye: “Ga vathu kha si kodzegi, aholu ga Nungungulu satshavbo si ngu kodzega.”

Matewu 5:48

Khu kharato, lulamani mulisineni kha nga Babe wanu wa Ndzadzini a lulamidego.

Luka 1:6

Vatshavbo va vavili va di lulamide mahoni ga Nungungulu; va di gu landrisa milayo ni siguruvedzo sa Pfhumu khu ndruda yatshavbo, guvbanyani gwawe, gima kha va manwa vari ni gihoso.

Mithumo 23:1

Pawulo, na khuside maho a khedzisa madhota nya phatha, a di ganela, khuye: “Vandruye, nyi vbanyide khu gu tshulega mahingigedzoni gwangu gwatshavbo mbeli gwa Nungungulu kala litshigu la muhuno.”

Mithumo 24:16

Khu kharato, eni neni nyi ngu dzi garadza matshigu yatshavbo gu khala nyiri muthu nya monyo nya gululame mbeli gwa Nungungulu ni ga vathu vatshavbo.

Vaefeso 3:20

Ga Uye a gu na ni tshivba nya gugire guvbindra satshavbo esi hi mu lombago, ambari ni esi hi alakanyago, khu tshivba Yaye yi thumago ndrani gwathu.

Dhewuteronome 10:17

Kholu, Pfhumu Nungungulu wanu, Nungungulu nya vanungungulu ni Pfhumu nya dzipfhumu, Nungungulu nya khongolo, nya tshivba, nya guthavisege, a si hatheligo vathu, gambe a si dzumeligo gu rengeledwa;

Dhewuteronome 18:13

Uwe gu vbwetega gu khala na wu lulamide mbeli ga Pfhumu Nungungulu wago.

Dhewuteronome 30:20

U na gola Pfhumu Nungungulu wago, U mu yingisa ni gu namarela avbo gwaye; kholu Uye khuye guvbanya gwago ni gulapha nya matshigu yago, gasi u fela guvbanya ga litigo eli Pfhumu Nungungulu a sambanyidego ga vababe vago, Abrahama, Isaki ni Jakobe.

Vafilipi 4:13

Nyi ngu kodza gupala satshavbo tshivbani ya wule a nyi tiyisago.

Vahebheru 12:28

Khu guralo, hongoleni hi bonge, kholu, hi hakhide Mufumo wa ndzadzini, owu wu si kodzigo gu kutsungwa. Hongoleni hi bonge, hi khozela Nungungulu khu magirelo nya gu mu tsakise ni githawo.

Vahebheru 7:25

Khu guralo, uye a ngu dzi kodza gu vbanyisa, olu ni gikhati gyatshavbo, vale va hidzimelago ga Nungungulu khu uye, kholu a ngu vbanya kala gupindruga gasi gu lombelela khu avo ga Nungungulu.