Indrani kamwe mwabune mu ya dzi vbwetela mwasi, gani evbini mu na ya wu manago, ambari ulo, kha mu na vbunguledwa mithumo yanu mu na hengudwani tengo wamoyo nya sitini kha nga gikhati mu nga bani muri ni mwasi.”
Avo va na khala kha nga mavivi nya gubange, va na tsaganiswa khu nilo. Avo kha va na dzi vbulugisa tshivbani nya malavbelavbe nya nilo; ma na bani ma siri magala nya guworwe khu muthu, ambari nilo nya gukhale vbafuvbi u wora.
Kha nga malavbelavbe nya nilo ma vbisago dzitshava ni mwasi nya gubange, kharato nugo, mikhamba yaye yi na hina ni senge saye si na vbuvba kha nga kudzudzwane, kholu va yeyiside Nayo wa Pfhumu Nungungulu, nya Tshivba Yatshavbo, ni gu bomba magana ya uye a Agidego wa Israyeli.
Gudzuma nya sikingo sawe, gu fanana ni ligwaha nya dzikareta dzi gimbilago dzitshokani nya sigomo; avo va gu ndraga kha nga malavbelavbe nya nilo wa gu bani wu gu khondra wu vbisago mwasi wa thembweni, kha nga libutho nya vathu nya tshivba va nga dongisedwa gu dwana nyimbi.
Lihundzu la Jakobe, li na khala nilo; lihundzu la Josefe li na khala malavbelavbe; lihundzu la Esawu li na bani liri mavivi, va na rothana khu gyawe va dagarela; mwalo a na tshalago gambe wa nyumbani ga Esawu, kholu Pfhumu Nungungulu a ganede.