Ekisodha 24:8 - Bhibhiliya Nya Guage

⁸ Khu guralo, Mosi a di dzega novba a gu mitegedzela khuwo vathu, khuye: “Owu khu novba nya gidzumeledzwano egi Pfhumu Nungungulu a hungidego nanu khu magana yatshavbo yaya.”

Ekisodha 24:8 Iomraidhean Croise

1 Dzipfhumu 8:21

Nyi dongisede wulanga nya guvege avbo Ngasa nya Gidzumeledzwano egi Pfhumu Nungungulu a giridego ni vababe vathu, gikhati a va dusidego khu tigoni ga Egipito.”

1 Dzipfhumu 8:9

Umo nya Ngasa nya Gidzumeledzwano gu diri mwalo gimbe gilo, vbavbandze nya siwindri sa sivili si nga vegwago umo khu Mosi, na vari gigomoni ga Horebhi, avbo Pfhumu Nungungulu a nga girago gidzumeledzwano ni sanana sa Israyeli, gikhatini va nga dugago khu tigoni ga Egipito.

Dzindzimo 78:36

Aholu magana yawe ma di si tumbegi, satshavbo va nga bani va ganela a diri sa malipha.

Ekisodha 24:6

Mosi a di vbungula wumbe novba dzikhalini, wumbe a mitegedzela khuwo giluvelo.

Isaya 52:15

Kharato nugo a na samadzisa mayigo nya mangi, ni vafumeli va na sega magana khu mahungu yaye; kholu iso va ngamba tiviswa va na si wona, niso va ngamba sipwa, va na si pima.

Jeremiya 31:32

Aholu gi na hambana ni gile nyi giridego ni vababe vawe, litshigu nyi va pharidego khu libogo gasi gu va dusa tigoni ga Egipito; aholu avo va digide gidzumeledzwano gyangu, khu guralo, eni nyi di hambana navo; a ngu ganela Pfhumu Nungungulu.

Ezekiyeli 16:8

Khu hwane nya ugo, nyi di vbindra khu vbafuvbi gwago, nyi di gu khedza nyi gu wona gukheni u diri ni tanga nya guenele gu liti lihaladzo; khavbo avbo, nyi di thawuludza gifenengelo, nyi fenengedza wumbwiri wago. Nyi di gira gisambanyo ni gu hunga gidzumeledzwano nago gasi gu gu dzega; a ngu ganela Mune Pfhumu Nungungulu.

Ezekiyeli 36:25

Khu guralo, nyi na mitegedzela mati nya gukatege vbatshani gwanu, mu agani; nyi na mi agisani gunyenyezani gwanu gwatshavbo mu nga dzi nyenyezisa khu sifananiso sanu.

Levhi 8:30

Khavbo avbo, Mosi a di dzega gambe mafura nya gutodze ni novba wu nga bani wuri vbatshani nya giluvelo a gu mitegedzela khiso Aroni ni dzingandzu dzaye, a mitegedzela gambe sanana saye ni dzingandzu dzawe; a di agisa Aroni, ni dzingandzu dzaye, a agisa sanana saye gumogo ni dzingandzu dzawe.

Agewu 2:5

Kha nga gidzumeledzwano nyi giridego nanu, gikhati mu dugidego khu tigoni ga Egipito, Liphuvbo langu li ngu vbanya vbakari gwanu; mu nga thavi gilo.

Zakariya 9:11

Gasi uwe, khu kotani nya novba nya gidzumeledzwano gyangu nago, nyi na tshudzisa sibotshwa sago khu namboni nyambana mati.

Matewu 26:28

Kholu owu novba wangu, novba nya gidzumeledzwano giphya wu na vbaladzedwago va nya gutala, gasi gutsetseledwa sighoho.

Marko 14:24

a di va embela, khuye: “Owu novba wangu; novba nya gidzumeledzwano nya giphya, wu na vbaladzedwago va nya gutala.

Luka 22:20

[Hwane nya gilalelo, a di dzega gikombe, a gira idzosaye, khuye: “Gikombe gegi khya gidzumeledzwano nya giphya gi tiyiswago khu novba wangu, wu na vbaladzedwago enu.]

1 Vakorinto 11:25

Khu magirelo ya mamowo, guhegisani nya gilalelo a di dzega gikombe a ganela, khuye: “Gikombe gegi khu gidzumeledzwano nya giphya gi nga tiyiswa khu novba wangu; gikhati gyatshavbo mu selago gikombe gegi, selani na mu gu nyi alakanya.”

Vaefeso 1:7

Guvbanya ha gu gu mana khavbo gwaye, khu novba waye hi mane gu tshulega ni gu divaledwa sighoho sathu khu gutala nya wuhigo waye,

Dhewuteronome 5:2

Pfhumu Nungungulu wathu, giride gidzumeledzwano ni ethu gigomoni ga Horebhi.

Vahebheru 10:29

A gu bani ari guralo, ginani gi na gu dugelelago ga vale va nyenyago Mwamana wa Nungungulu, va gira gilo nya nyalidede, Novba nya gidzumeledzwano gya Nungungulu va handzidwego khuwo? Ginani gi na gu dugelelago ga vale va valago Liphuvbo nya Guage a gu gifefe nya wuhigo?

Vahebheru 13:20

Khu guralo, Nungungulu nya gurule, khu novba nya gidzumeledzwano nya gupindruge wuside khu ga vafudego Pfhumu yathu Jesu Kristo, a khadego Muhavisi nya khongolo nya tshambi.

Josuwa 24:25

Khu kharati, litshigu lile Josuwa a di gira gidzumeledzwano ni vathu a gi vega kha nga sileletelo ni fanelo tigoni ga Sikemi.

1 Pedro 1:2

Enu mu hathidwe khu guhaladza gwa Nungungulu Babe, mu giridwe vathu va Nungungulu khu tshivba nya Liphuvbo laye, gasi mu yingela Jesu Kristo ni gu mitegedzedwa khu Novba waye. Wuhigo ni gurula gu na tadzisedwe avbo gwanu.