Dzindzimo 33:2 - Bhibhiliya Nya Guage

² Rungudzani Pfhumu Nungungulu khu gitendre, mu embelela dzindzimo khu gitendre nya likhumi dzingodzi.

Dzindzimo 33:2 Iomraidhean Croise

2 Samuweli 6:5

Dhavhidhe gumogo ni vatshavbo va na Israyeli, va di nengela mbeli ga Pfhumu Nungungulu, khu mafumbu yatshavbo nya siwombawomba nya dzingoma, nya gugirwe khu misimbo nya safira, mitandrandra, sitendre, singomana, sitshatsharo nya dzisimbi, dzitsholi ni sitoliyo.

1 Dzikoronika 15:16

Dhavhidhe a di embela vathangeli va na Levhi, gu va wumba tsawa vbakari ga va na gyawe nya vaembeleli, gasi va womba siwombawomba nya gufanane ni dzimbila, sitendre ni siphaphato nya dzisimbi, va gira ligwaha ni gutsaka.

1 Dzikoronika 15:28

Vatshavbo va na Israyeli, avo va nga bani va gu vbwelegedza Ngasa nya Gidzumeledzwano gya Pfhumu Nungungulu, va di kulungela khu gutsaka na va gu womba siphaphato ni mipundru, singomana, sitendre ni dzimbila.

1 Dzikoronika 25:3

Gasi va na Jedhutumi, sanana sa Jedhutumi si diri esi: Gedhaliya, Zeri, Jesaya, Simeyi, Hasabhiya ni Matatiya; vatshavbo va diri livbandre na moyo, va nga bani va thangedwa khu babe wawe Jedhutumi, oyu a nga bani a profeta khu gitendre, a rungudza ni gu bonga Pfhumu Nungungulu.

1 Dzikoronika 25:6

Vatshavbo va di gu thangedwa khu babe wawe gasi gu embelela Nyumbani ga Pfhumu Nungungulu va womba siphaphato nya dzisimbi, ni dzimbila ni sitendre, khu thumo wa Nyumbani gwa Nungungulu, Asafi, Jedhutumi ni Hemani na va gu leletedwa khu mufumeli.

Dzindzimo 144:9

Gwago uwe Nungungulu, eni nyi na emba ndzimo nya yiphya nyi gu dhumisa, nyi na emba nyi gu rungudza khu gitendre nya likhumi dzingodzi.

Dzindzimo 149:3

Va na dhumise lina laye khu gu hana, va embelela na va gu womba sitendre ni dzingoma.

Dzindzimo 71:22

Gasi eni nyi na gu dhumisa khu gitendre, nyi embelela gululama gwago uwe Nungungulu wangu; nyi embelela dzindzimo khu gitendre, uwe u Agidego wa Israyeli.

Dzindzimo 92:3

na gu wombwa mihwambi ni mitandrandra, na gu embeledwa khu sitendre.

Dzindzimo 92:4

Kholu, sigiro sago Pfhumu Nungungulu si ngu tsakisa; Nyi na womba kulungwane nyi tsakela thumo nya mandza yago.

Ekisodha 15:20

Khavbo avbo, Miriyamu, nyamayi nya muprofeti, ndruye wa Aroni, a di phara tandrandra mandzani, vanyamayi vatshavbo va di duga vbavbandze ni mitandrandra yawe, va hana.

Gutuledwa 14:2

Nyi dipwa gambe gudzuma ndzadzini kha nga linene, ni libara nya likhongolo, aholu dzindzeveni gwangu gu di pwala gukhwatshi lito nya hwambi wu wombwago.

Gutuledwa 5:8

Na gu hakha libhuku, sirengo sile sa sina ni madhota yale nya magumavili na mana ma di khidzima mbeli ga Nvutana, mari ni sitendre ni sikombe nya gugirwe khu ndralama na si tade khu libani, a gu milombelo nya sihathwa.