Dhaniyeli 2:23 - Bhibhiliya Nya Guage

²³ Eni nyi ngu gu bonga ni gu gu rungudza, uwe Nungungulu wa vababe vangu; khuwe u nyi ningidego guti ni tshivba, olu u nyi yeyedzide iso hi gu lombidego, kholu u hi tugudziside mahungu yaya ya mufumeli.

Dhaniyeli 2:23 Iomraidhean Croise

Genesi 18:17

Pfhumu Nungungulu a di ganela khu monyoni gwaye, khuye: “Nyi na sihela Abrahama esi nyi vbwetago guya gira, gani?

Genesi 31:42

Naripwani Nungungulu wa babe wangu Nungungulu Abrahama ni oyu a rungudzwago khu Isaki, kha nga nyi phasa, khu lisine nu nyi vbanganide nyambana gilo, nyi bwelela liphanga nyambana gilo mandzani. Aholu Nungungulu a wonide gusaniseka gwangu a wona mithumo ya mandza yangu, vbanova ni wutshigu a gu kawuka.”

1 Dzipfhumu 18:36

Avbo gu nga vbohago gikhati nya guningele miphaselo nya silambo, muprofeti Eliya a di hidzimela vbagiluvelotunu a ganela, khuye: “Uwe Nungungulu wa Abrahama, wa Isaki ni wa Jakobe, dzi wonegise muhuno gukhuwe, uwe khuwe, Nungungulu wa Israyeli, ni gukhuwe eni kheni githumi gyago. Wonegisa gukhuwe eni nyi giride satshavbo sesi khu guruma gwago.

1 Dzipfhumu 8:57

Uwe Pfhumu Nungungulu wathu khala ni ethu, kha nga u khadego ni vababe vathu; Uwe u nga hi digi ambari gu hi divala!

1 Dzikoronika 29:10

Khavbo avbo, Dhavhidhe a di rungudza Nungungulu, na gu wonwa khu tshangano watshavbo, khuye: U na bongwe Uwe Pfhumu Nungungulu wa babe wathu Israyeli, khu gupindruga ni gupindruga!

1 Dzikoronika 29:13

Khu guralo, olu Uwe Nungungulu wathu, ethu hi ngu gu bonga ni gu rungudza lina lago nya wudhumo.

2 Dzikoronika 20:6

a di ganela, khuye: “Oh! Pfhumu Nungungulu wa vababe vathu, ina khandri Uwe Nungungulu a guromo ndzadzini, gani? Ina khandri Uwe mufumeli nya mayigo yatshavbo, gani? Mandzani gwago, yomo tshivba ni wufumu, mwalo a dzi kodzago gu dwana nago.

Dzindzimo 21:2

U mu girede gugola nya monyo waye, khwa muma esi a nga lombago khu likana laye.

Dzindzimo 21:4

Uye a di gu lomba guvbanya, uwe u mu ningide matshigu nyamba hegisa kala gupindruga.

Dzindzimo 25:14

Pfhumu Nungungulu a gu tulela guti sihalo waye vale va mu thavago, a va tivisa gidzumeledzwano gyaye.

Dzindzimo 50:14

Ningela ga Pfhumu phaso nya gubonge, u landrisa sisambanyo u giridego ga Uye a Khusegidego ngudzu;

Ekisodha 3:15

Nungungulu a di ganela gambe ga Mosi, khuye: U na ganela kharati ga sanana sa Israyeli khuwe Pfhumu Nungungulu wa vababe vanu, Nungungulu wa Abrahama, Nungungulu wa Isaki ni Nungungulu wa Jakobe, a nyi rumede gwanu; Eli khu Lina langu kala gupindruga, nyi na alakanywa kharati khu mimela ni mimelana.

Mavingu 21:22

Muthu nya gugengele a ngu kodza gu dhumela madhoropa nya dzindrena, a pfhungumula ni makhokhola yawe va ma tumbago.

Mavingu 24:5

Muthu nya guti a na ni tshivba, ni uye nya mapimo a ngu dzi engedzela tshivba;

Mavingu 8:14

Iso si lumbago eni, khu wusingalagadzi ni guti nya lisine; eni kheni gupimisa, nyi na ni tshivba.

Muhevbudzi 7:19

Wugengeli wu ngu ninga muthu nya guti tshivba nya yingi nya guvbindre likhumi vathangeli nya sikwata nya nyimbi va dhoropani.

Muhevbudzi 9:16

Khu guralo, eni nyi di, kheni: I tshukwana gu mana guti guvbindra tshivba, ambari ulo wugengeli nya gisiwana wu ngamba thedwa kota, ni magana yaye ma ngamba yingiswa.

Muhevbudzi 9:18

Guti gu na ni giphaso guvbindra matshari nya nyimbi, aholu gighohi gimwegyo basi gi ngu kodza gu ghohetela silo nya singi nya sadi.

Isaya 12:1

Ga litshigu lolo, u na embelela, khuwe: “Nyi ngu gu bonga uwe Pfhumu Nungungulu, kholu, ambari nyi gu gorosidego, olu U duside likhulo lago avbo gwangu. Uwe u ngu nyi tangadzisa.”

Jeremiya 33:3

Nyi rane, eni nyi na gu ninga phindrulo, nyi na gu tivisa silo si sihadego, esi u si sitigo.

Dhaniyeli 1:17

Nungungulu a di ninga madzaha yaya nya mana, guti ni gu pimisa ni wugengeli nya milowo yatshavbo. Gu diga nya isoso, Dhaniyeli a di mana mapimo nya gutshamusele mafumbu yatshavbo nya siwoniso ni dzindroro.

Dhaniyeli 2:18

gasi va lomba wuhindzi ga Nungungulu wa ndzadzini gu a va pwela wusiwana a va tugudzisa sihalo yoyu gasi va si mbembiswi gumogo ni vagengeli va Bhabhiloni.

Amosi 3:7

Khu lisine, Pfhumu Nungungulu, kha na gira gilo nyamba phela khu gu ninga giwoniso ga sithumi saye, a gu vaprofeti.

Matewu 11:25

Gikhati gyogyo, Jesu a di khusa lito, khuye: “Nyi ngu gu rungudza, Baba, Pfhumu nya ndzadzi ni mafu, kholu u sihede va nya guti ni va nya gugengela silo sesi, u si yeyedza ga va nya gusolega.

Luka 10:21

Khu gikhati gyogyo, Liphuvbo nya Guage li di tadza Jesu khu litsako a gu ganela, khuye: “Nyi ngu gu rungudza, Baba, Pfhumu nya Ndzadzi ni mafu, kholu u sihede silo sesi va nya guti ni vagengeli, u si yeyedza ga va nya gusolega. Ina, Baba, kholu khiso si nga gu nengedzisago.

Johane 11:41

Khavbo avbo, va di dusa giwindri. Jesu, na khuside maho a khedza Ndzadzini, a di khuye: “Baba, nyi ngu gu bonga kholu u nga nyi yingisago.

Johane 15:15

Kha nyi mi rani gambe sithumi, kholu githumi kha gi siti iso si girwago khu pfhumu yaye; nya gu mi rana dzipari dzangu, kholu nyi mi tiviside satshavbo nyi nga si pwago ga Babe wangu.

Gutuledwa 1:1

Khugo ogu gutuledwa ga Jesu Kristo, ugo a nga ningwago khu Nungungulu, gasi a yeyedze ga sithumi saye iso si guromo vbafuvbi ni gu girega. Uye tiviside silo sesi khu ga ngilozi yaye a nga yi rumelago ga githumi gyaye Johane.

Gutuledwa 5:5

Limwedo nya madhota yale li di nyi degudzela, khilo: “U nga lili; kholu Nghala nya lihundzu la Judha a gu Melego wa Dhavhidhe, yi pade, yi ngu kodza gu tula libhuku ni gu namula sifungo saye satshavbo nya livbandre na sivili.”