2 Samuweli 6:21 - Bhibhiliya Nya Guage

²¹ Aholu, Dhavhidhe a di embela Mikali, khuye: “Eni nyi di hana mbeli ga Pfhumu Nungungulu, Uye a nyi hathidego wulangani ga babe wago, ni ndranga yaye yatshavbo, a nyi emisa gu thangela vathu va Pfhumu Nungungulu, a gu va na Israyeli, nyi na ni fanelo gu tsaka.

2 Samuweli 6:21 Iomraidhean Croise

2 Samuweli 5:2

Gukhugela matshigu ya gale, na nga gu fuma Sawule, khuwe u nga bani nu thangela va na Israyeli gu ya dwana nyimbi, Pfhumu Nungungulu nuye a di gu embede, khuye: “Uwe u na havisa vathu vangu va na Israyeli, u na khala muthangeli wawe.

2 Samuweli 6:14

Dhavhidhe a di hana khu tshivba yaye yatshavbo mbeli ga Pfhumu Nungungulu na ambade efodhe nya seda.

2 Samuweli 6:16

Avbo Ngasa ya Pfhumu Nungungulu yi nga belago Dhoropani, Mikali, nyamahegyane wa Sawule a di gu holelela khu vbagihogotunu a wona mufumeli Dhavhidhe na gu ndragandraga a hana mbeli ga Pfhumu Nungungulu, uye a di swireka monyoni gwaye.

2 Samuweli 6:22

Nyi nga na gu engedza nyi dzi nogisa ngudzu nyi dzi thesa vbavbatshi gu wonani gwangu, aholu nyi na zundzwa khu sithumi sesi nya vanyamayi u si ganedego.”

2 Samuweli 6:5

Dhavhidhe gumogo ni vatshavbo va na Israyeli, va di nengela mbeli ga Pfhumu Nungungulu, khu mafumbu yatshavbo nya siwombawomba nya dzingoma, nya gugirwe khu misimbo nya safira, mitandrandra, sitendre, singomana, sitshatsharo nya dzisimbi, dzitsholi ni sitoliyo.

2 Samuweli 7:8

Khu guralo, u na embela isoso githumi gyangu Dhavhidhe, khuwe: Pfhumu Nungungulu nya Tshivba Yatshavbo a ngu ganela kharati, khuye: Nyi gu duside khu wuhaviseloni nya guhavise dzinvuta, gasi u khale muthangeli wa vathu vangu, a gu va na Israyeli.

1 Dzikoronika 15:29

Avbo va nga belago ni Ngasa nya Gidzumeledzwano Dhoropani ga Dhavhidhe, Mikali, nyamahegyane wa Sawule, a di khedzisela khu vbagihogotunu a wona mufumeli Dhavhidhe na gu hana ni gu tsaka, uye a di mu sola khu monyoni gwaye.

Mithumo 13:22

Nungungulu, na duside Sawule vbagikhalotunu nya wufumu, a di va tulela gu hatha Dhavhidhe kha nga mufumeli wawe. Khuye a nga mu thulago, khuye: ‘Nyi mane Dhavhidhe, mwamana wa Jese, mwamana a tsakisago monyo wangu, a nga londrowodzago guhaladza gwangu gwatshavbo.’

1 Vakorinto 10:31

Khu kharato, gani mwa gu hodza, gani mwa gu sela, ni gevbini gimbe gilo mu girago, satshavbo girelani gu rungudza Nungungulu.

1 Samuweli 13:14

Olu mufumo wago kha wu naya mbeli. Pfhumu Nungungulu a dzi hathede muthu a tsakiswago khuye, gambe a mu vegide gu khala muthangeli wa vathu vaye, kholu uwe khwa landrisa esi Pfhumu Nungungulu a gu leletedego.

1 Samuweli 15:28

Samuweli a di mu embela, khuye: “Muhuno Pfhumu Nungungulu pferude mufumo wago gasi gu a wu ningela ga mumbe nya wadi guvbindra uwe.

1 Samuweli 16:1

Pfhumu Nungungulu a di embela Samuweli, khuye: “Kala lini nu nga gulila khu Sawule. Avbo eni nyi mu nyenyidego gasi a si fumeli gambe Israyeli? Olu tadza gigasi gyago khu mafura uta; nyi na gu rumela ga Jese wa Bhetlehema, kholu vbakari nya sanana saye, nyi hathide moyo gu khala mufumeli.”

1 Samuweli 16:12

Khavbo avbo, a di rumela gu vaya mu rana va mu embela a bela. A diri lidzaha nya mburi ni maho nya gutsakise ni ndzudzu nya gufuvilanyane. Pfhumu Nungungulu a di embela Samuweli, khuye: “Khuga u mu todza, kholu khuye oyu.”