2 Samuweli 24:13 - Bhibhiliya Nya Guage

¹³ Khu guralo, a dita Gadhi ga Dhavhidhe, ata mu pwadzela, a mu embela, khuye: “U ngu dzina gukhuwe gu manega ndzala livbandre na mivili myaga tigoni gwago; mwendro gu tutumiswa khu valala vago ndrani nya migima miraru na va gu lundra; mwendro ndrani nya matshigu mararu, gu manega tungu tigoni gwago, gani? Olu pimisa phindrulo muni nyi na gu bwelelago nayo nyi ya ninga wule a nyi rumidego.”

2 Samuweli 24:13 Iomraidhean Croise

2 Samuweli 21:1

Matshiguni ya Dhavhidhe, gu manegide ndzala yi dzegidego myaga miraru, khu mwaga ni mwaga, Dhavhidhe a di wudzisa Pfhumu Nungungulu, Pfhumu Nungungulu, a di mu embela, khuye: “Sawule ni ndranga yaye khavo va gu ni nandru nya wusongi, kholu va nga songago Vagibhiyoni.”

2 Samuweli 24:12

“Indra u ya embela Dhavhidhe, khuwe: Pfhumu Nungungulu a ngu ganela kharati, khuye: Silo siraru nyi gu ningago, hatha gimwegyo nya iso gasi u gire.”

2 Dzipfhumu 8:1

Elizewu a di ganela ga nyamayi wule a nga mu wusela gyanana gyaye nya gufe, khuye: “Khuga uwe gumogo ni mwama wago, u ya luvela ga litigo u na gu li wonago, kholu Pfhumu Nungungulu, reside ndzala ga litigo leli, yi na gu vbedzago livbandre na mivili myaga.”

1 Dzikoronika 21:12

Gani myaga miraru na guri ni ndzala, mwendro migima miraru na wu gu sasedwa khu valala vago, u paywa khu matshari yawe, mwendro matshigu mararu nya guthegedwe khu litshari la Pfhumu Nungungulu, a gu tungu nya gusonge, Ngilozi ya Pfhumu Nungungulu na yi gu mbembisa omu tigoni gwatshavbo gwa Israyeli. Alakanyela u nyi embela phindrulo nyi yelago gu ya ningela uye a nyi rumidego.”

Dzindzimo 91:6

ambari khu tungu wu phalalegago gidemani, mwendro madwali ma songago vbamihanitunu.

Ekisodha 7:25

Kharati gu di vbindra livbandre na mavili matshigu hwane nya gu Pfhumu Nungungulu na vetide tsongo.

Ezekiyeli 14:13

“Mwamana wa muthu, litigo nya gukari la gu nyi ghohela khu gumba tumbega, nyi na thawuludza libogo langu nyi li dzegela guhodza, nyi li rumela ndzala, nyi songetela vathu vaye gumogo ni sirengo saye.”

Levhi 26:20

Mu na luza tshivba khu guthuma mahala; mafu yanu kha ma na dusa dzimbewu, ni misimbo ya tigoni gwanu kha yi na dusa mihandro yaye.

Levhi 26:25

Khu kotani nya gu hambaniseni gidzumeledzwano gyangu, nyi phodza khu gu mi rumela dzinyimbi; mwa gu tshanganani madhoropani gwanu, nyi na rumela vbakari gwanu mitungu, nyi na mi ningelani mandzani ga valala vanu.

Luka 4:25

“Aholu nyi ngu mi embelani gambe, khu lisine, kheni: Matshiguni ya Eliya dzi diromo dzinoni nya dzingi tigoni ga Israyeli, gikhati yi nga segegago ndzadzi myaga miraru ni livbandre na moyo migima, yi manega, ndzala nya yikhongolo tigoni gwatshavbo.

Dhewuteronome 28:22

Pfhumu Nungungulu a na gu veta khu madwali nya gikhohola, dzedzedze, gindrendrewane, gisimba mwendro giwumbwa ni guvbisa nya guthise, ni gu hina nya dzimbewu, dzinyimbi ni mitungu yi na gu lundrago kala u fuva.

Dhewuteronome 28:25

Pfhumu Nungungulu a na gu thesa mbeli ga valala vago; khu ndzila mweyo u na duga guya dwana ni valala vago, aholu u naya tutuma mbeli gwawe khu livbandre na dzimbili dzindzila; khu guralo, u na khala gihegiso ga mayigo yatshavbo ya mafuni.

Dhewuteronome 28:27

Pfhumu Nungungulu a na gu veta khu mitungu ya tigoni ga Egipito; gumogo ni sithunya ni mbatata, ni gighwere ni gu dzi tshuvela si si kodzwigo gu halawugiswa.

Dhewuteronome 28:35

Pfhumu Nungungulu a na gu khuyusela dzikhungumudzi ni dzinyonga, a na gu veta khu sithunya nya gunyenyeze, avbo u na gumba si kodza gu si vbodzisa, gukhugela gitshinandroni kala vbatshani nya hungoni gwago.

Dhewuteronome 28:52

Va na gu randrela madhoropani gwago gwatshavbo, kala ma thega mabhiyo yago nya gulaphe tigoni gwatshavbo ni makhokhola u na bani u gu ma tumba, a na gu randrela ga litigo latshavbo eli Pfhumu Nungungulu wago a nga gu ningago.

1 Samuweli 25:17

Khu guralo, wona egi u yelago gu gira, kholu mune wathu ni ndranga yaye yatshavbo a ngu thusedzedwa khu gukhungumudwa; kholu uye muthu nya dzihanyi, mwalo a dzi kodzago gu ganela naye.