2 Pedro 2:3 - Bhibhiliya Nya Guage

³ Kotani nya misuwo nya dzitsapawu, vahevbudzi vovo nya malipha va na mi kalavela, va ganela mitsheketo nya gu yi vange. Gale na dongide mulamuli wawe, ni mumbembisi wawe wugide kha na hwela.

2 Pedro 2:3 Iomraidhean Croise

Joba 6:27

Ina enu mu ngu kodzani gu rengisa gisiwana khu gu gira nyatumbatumbane, gani?

Dzindzimo 18:44

Va nya mayigo va nguta va ta khoza gwangu, avo va nga nyipwa, va di nyi yingela.

Dzindzimo 66:3

Embelani esi Nungungulu, khenu: “Sigiro sago si ngu samadzisa ngudzu! Valala vago va gu ndrendremela mbeli gwago, kholu tshivba yago yikhongolo.

Dzindzimo 81:15

Vale va vengago Pfhumu Nungungulu va di hadza gu khidzima migondroni gwangu, tsayiso wawe wi di hadza gu simama kala gupindruga.

Isaya 5:19

Avo vari, khavo: “Nungungulu a na vbiredzele gu vbedza thumo waye, gasi hi kodza gu si wona. Makungo ya Nyaguage wa Israyeli, ma na tadzisege, gasi hi ma wona.”

Isaya 56:11

Dzimbwa dzedzi makhondrobwa, kha dzi khuri; vahavisi nyamba pimisa gilo; muthu ni muthu a gu bwelela khu ndzila yaye, a dzi vbwetela iso si na gu mu ningago bhindzu.

Isaya 60:22

Lipango nya lidugwana, li na andra kala likhumi mazana (1.000), ni eli nya ligwana ngudzu, li na khala litigo nya tshivba. Eni kheni Pfhumu Nungungulu; khu gikhati givbwetegago nyi na gira satshavbo sesi si tadzisega khu guvbiredza.

Jeremiya 6:13

kholu gukhugela ga sanana kala vakhongolo, vatshavbo va gu vbweta gu ghanya. Vaprofeti ni vaphasi nya mhamba, vatshavbo sidambane.

Jeremiya 8:10

Khu guralo, nyi na ningela vagadzi vawe ga vambe vama, ni marembwe yawe ma na ningedwa ga valala vawe; kholu gukhugela sanana kala vakhongolo, vaprofeti ni vaphasi nya mhamba, moyo ni moyo wawe a dzi ningede umo nya wudambane.

Ezekiyeli 13:19

Enu mu nyi ghohede vbakari ga vathu vangu, mu girela gu mana dzitshotanyana nya sivbila ni sipandryana nya gibaba, gasi gu songani mihefemulo yi ngamba yela gu songwa, mu vegedza mihefemulo yi gu mwalo fanelo nya guvbanye, mu liphela kharati vathu vangu va yingisa malipha yanu.”

Mikeya 3:11

Vathangeli vawe va gu lamula, va gu rwega milandru vathu khu gu rengeledwa, vaphasi vawe nya mhamba va gu hevbudza khu gu vbweta gu hakha, vaprofeti va gu profeta khu gu vbweta dzitsapawu, aholu va gu dzi seketela khu Pfhumu Nungungulu, khavo: Khu lisine Pfhumu Nungungulu mwalo vbakari gwathu. Li mwalo libango li na gu hi dugelelago.

Habhakuka 3:3

Nungungulu dzude khu Temani, uye a Agidego a guta khu gigomoni ga Parani. Wudhumo waye wu fenengedzide ndzadzini ni wuzundzo waye wu tadzide mafuni.

Malakiya 1:10

Khu mani vbakari gwanu a na segago malimba nya Nyumba ya Nungungulu gasi gu si khondriswi gambe nilo nyambana fanelo vbagiluvelotunu gwangu? Kholu enu kha mu nyi salalegisi gambe, kha nyi na hakha gambe miphaselo yanu. A ngu ganela Pfhumu Nungungulu nya Tshivba Yatshavbo.

Matewu 23:14

Libango gwanu, enu vapfhadzi, vahevbudzi nya Nayo ni Vafarisi, mu phangago sifurugadzi mudzindrangani dzawe, na mu gu pfhadza gu gira milombelo nya gulaphe ngudzu. Khu kharato gulamudwa gwanu gu na bani guri gwa gulemela.

Luka 18:8

Nyi ngu mi embelani, khu lisine, kheni: A na dzegela gu si lamula. Ina gikhati a na wuyago Mwamana wa Muthu, a nata mana gukhodwa tigoni, gani?”

Luka 20:20

Va di mu riya, va mu rumela vathu nya guya mu linga. Avo va di hongola kha nga vathu nya vadi, na va lindrela gukhavo a na hoheta likana, gasi gu mu ningela mandzani ga mufumo.

Luka 22:47

Jesu na nga guganela li di vboha lidhuma nya vathu, na li gu thangedwa khu moyo nya vale nya likhumi na vavili, nya gupwani khu Judha, a nga hidzimelago ga Jesu gasi guya mu bhejari.

Johane 2:16

A di embela varengisi nya matuva, khuye: “Dusani satshavbo sesi avba. Mu nga dzegini nyumba ya Babe wangu mu yi gira nyumba nya wugwewo wanu.”

Varoma 16:18

kholu vathu nya nga avovo kha va thumeli Kristo, Pfhumu yathu, aholu va gu thumela sirumbu sawe. Va gu pfhadza vathu nya vangi khu magana yawe nya gulombele na ma tade khu wuhephi.

2 Vakorinto 2:17

Khu guralo ethu kha hi giri nga vambe va nya gutala va girago wugwewo khu mahungu ya Nungungulu. Aholu, nga sithumi sa Nungungulu, ha gu tshumayela khu Kristo, myonyo yathu na yi agide mahoni gwa Nungungulu.

Dhewuteronome 24:17

U nga hambanisi dzifanelo dza muluveli ni khulungu; gambe u nga hakhi guambala ga noni kha nga gilo nya guphariswe khu mangava.

Dhewuteronome 32:35

Guphodza ni gubweledzela sa gu lumba eni, li na vboha litshigu eli ngondro wawe wu na kwirigago; kholu mahegiso gwawe gu na vboha nyamba hwela, silo va dongisedwago si nguta khu guvbiredza.

1 Vatesalonika 2:5

Gambe mu ngu dziti nya gukhenu kha ha thumisa magana nya gutshambisele, ni gudwanela gu mana gilogyo. Nungungulu i fakazi nya isoso.

1 Vatesalonika 5:3

Gikhati vathu va ganelago, khavo: “Litigo li lade, gu mwalo gilo,” khavbo avbo gu natago, khu gipitipiti, gumbemba vbatshani gwawe. Va na khala nga nyamayi nya mimba gikhati a lumwago, kha va na vbuluga.

1 Thimoti 3:3

Oyu a si dzi ningedzeligo wadwani, ambari gudwanisa, aholu, a kodzago gu timisela, a si vegigo likhulo, a siri mugoli nya dzitsapawu.

1 Thimoti 3:8

Khu magirelo ya mamowo, Vadhiyakoni navo gu vbwetega vari vathu va zundzegago ni gu ganela lisine, va si dzi ningedzeligo wadwani, ni maalakanyo nya guvbwete wutetema,

1 Thimoti 6:5

ni guganedzana nya mahala, vathu nyambana mapimo, va guromo hwindzo ni lisine. Avo va gu dzega gukhodwa va gu gira wugwewo.

Tito 1:11

Gu vbwetega u va sege magana yawe, kholu va ngu dzuwungela dzindranga dzatshavbo va gu hevbudza esi si si yeligo na va gu dwanela gu mana dzitsapawu khu silo nya dzitshoni.

Tito 1:7

Kholu muthangeli nya Libandla, a rwadego thumo nya gusayise silo sa Nungungulu, gu vbwetega nari muthu nyambana gihoso, nyamba dzi gugumugisa, nyambana wukhusu, a si gu bewudzi, nyambana sighirimuka, a si gu pari nya wugwewo nya guvivbe.

1 Pedro 2:8

Gambe giwindri gi na gu tshunganisago vathu; giwindri gi na gu va thesago. Avo va tshunganede kholu va ngamba khodwa khu Mahungu, khiso si dongisedwego avo.

1 Pedro 5:2

Havisani gwadi tshambi wa Nungungulu wu guromo vbakari gwanu; wu sayiseni na mu tshulegide myonyo kha nga idzo a dzinago khidzo Nungungulu; nasiri khu gugurumedzwa. Mu nga thumeli gu hakha dzitsapawu. Aholu thumani khu gudzina gwanu.

2 Pedro 1:16

Kholu ethu gima kha ha mi hevbudzani silo nya gu si luge, gikhati hi nga mi tivisani Mahungu nya Yadi nya gute ga Pfhumu yathu Jesu Kristo nya gungangamele, nya gutale khu tshivba; kholu ethu hi wonide wugulu waye khu maho yathu.

2 Pedro 2:1

Matshigu ya gale, va manegide vaprofeti nya malipha vbakari nya vathu, khu kharato gambe, va na manega vahevbudzi nya malipha vbakari gwanu. Va na hevbudza sihevbudzo nya gupfhungumule, nya malipha, va na danga Muhevbudzi a nga va vbanyisago. Isoso si na va gira va mbembiswa nyamba hwela.

2 Pedro 2:9

Pfhumu a ngu mati mano nya guvbulugise khayo ava va khodwago gwaye, a ngu kodza gambe gu vega tsayisoni ava nya guvivbedwe khu myonyo, kala litshigu nya gulamudwe.

Judha 1:11

Libango lawe! Kholu va bede khu ndzila ya Kayimi. Khu kotani nya lidora ni dzitsapawu va dzi ningede gighohoni nya guvivbegya Bhalahama; va dzi mbembisa khu gu ganedza nya nga ogu ga Kora.

Judha 1:15

guta lamula vatshavbo, ni gu tsayisa vatshavbo va si thavigo Nungungulu, khu kotani nya mithumo yawe yatshavbo nya guvivbe, ni magana yawe yatshavbo nya guthise ma ganedwego khu sighohi si ngamba khodwa va nga bani na gu yuyutela khayo.”

Judha 1:16

Vathu vovo va gu ngurangura gikhati gyatshavbo ni gu singedzela vakwawe, va gu landrisela gudogorela nya myonyo yawe, va dzi khusedza, va pfhadza vakwawe.

Judha 1:4

Kholu vambe vathu nyamba khodwa va bede vbakari gwathu nyamba tidwa. Avo va gu vbindrugedza mahungu ma ganelago khu wuhigo wa Nungungulu wathu, va fela gu vhikela mavbanyelo yawe nya guvivbe. Va nyenyide gambe Jesu Kristo a gu uye basi Muhevbudzi ni Pfhumu yathu. Gale ngudzu Milowo nya Guage yi tivisidego gumbembiswa va gu hakhidego.

Judha 1:7

Gufanana ni Sodhoma ni Ghomora ni mambe madhoropa ya vbafuvbyana mule, avbo va nga dzi ningelago wubhayini ni ga gighoho nya gubhayane khu wama wawe, madhoropa yoyo, ma khade giwonelo ga vathu vatshavbo, ma gu mana tsayiso nya nilo nya gupindruge.