2 Dzipfhumu 6:12 - Bhibhiliya Nya Guage

¹² Moyo nya sithumi saye a di mu embela, khuye: “Ahihi, mufumeli ni mune wangu; muprofeti Elizewu a guromo tigoni ga Israyeli, khuye a tivisago ga mufumeli wa Israyeli, magana yatshavbo u ganelago ambari ni ayo u ganedego nuri khu makhuvini gwago.”

2 Dzipfhumu 6:12 Iomraidhean Croise

2 Dzipfhumu 5:26

Aholu Elizewu a di mu embela, khuye: “Gasi hefemulo wangu wu diri mwalo nago gikhati mwama wule a nga tshiga khu karetani gwaye a gu khinga, gani? Khigyo gikhati gyakone u nga yela gu dzega parata, dzingandzu, miolivha, vhinya, dzinvuta, dzimombe ni sithumi nya vama ni vanyamayi, gani?”

2 Dzipfhumu 5:3

Uye a di embela mune waye, khuye: “Naripwani pfhumu yangu yi ngu hongola ga muprofeti a guromo Samariya, uye a di hadza guhawuluga sokono yaye.”

2 Dzipfhumu 5:8

Aholu avbo Elizewu, muthu wa Nungungulu a nga pwago gupwani, mufumeli wa Israyeli a pferude dzingandzu dzaye, a di rumela guya embela mufumeli, khuye: “Khu ginani u nga pferulago dzingandzu dzago? Mu dige ate avbo gwangu, uye a na kodza gu dziti gukhuye tigoni ga Israyeli womo muprofeti.”

2 Dzipfhumu 6:11

Mufumeli wa Siriya a di vbisega monyoni, a rana vathu vaye ata va embela, khuye: “Nga nyi embelani, gasi khu mani vbakari gwanu a emago mufumeli wa Israyeli?”

2 Dzipfhumu 6:13

Uye a di hakha, khuye: “Indra u ya wona avbo a guromo, gasi nyi rumela vathu va ya mu mola.” Va di mu tivisa, khavo: “Womo Dhotani.”

Ekisodha 8:3

Tsongo wu na tala khu vanyakhele nya vangi va na gu litago va ya bela ni nyumbani gwago, ni makhuvini u lalago umo, dawuni gwago ni dzinyumbani nya dzindruna dzago, ga vathu va tigoni gwago, ni matindzaloni u vawulelago umo mikati kala ni somboni sago nya gusugele umo.

Mavingu 21:30

Mwalo muthu a gengedego ni mapimo ambari wusingalagadzi, a vbindrago Pfhumu Nungungulu.

Muhevbudzi 10:20

U nga lembi mufumeli, ambari khu mahingigedzoni, gambe u nga lembi gitetema, ambari na wu lade makhuvini gwago; kholu sinyoni si nga rwala mahungu yago, si ma phalalegisa kala ma vboha dzindzeveni gwawe.

Isaya 29:15

Libango ga vathu vale va sihago makungo yawe, va sihela Pfhumu Nungungulu, va gira mithumo yawe mugidemani, na va gu ganela, khavo: “Khu mani a na gu hi wonago, khu mani a hitigo?”

Isaya 8:10

Ambari mwa gu hungani gikungo, gi na pfhungumudwa, ambari mwa gu lugani mano, kha mu na dugelela, kholu Nungungulu a na ni ethu.

Dhaniyeli 2:47

Mufumeli a di embela Dhaniyeli, khuye: “Kha nyi kanakani nyi ngu tiyisa gukheni Nungungulu wanu, Nungungulu nya vanungungulu, ni Pfhumu nya vafumeli, khuye a tugulago iso si sihadego, kholu u kodzide gu nyi tshamusela sihalo yoyu.”

Amosi 3:7

Khu lisine, Pfhumu Nungungulu, kha na gira gilo nyamba phela khu gu ninga giwoniso ga sithumi saye, a gu vaprofeti.