2 Dzipfhumu 11:4 - Bhibhiliya Nya Guage

⁴ Khu mwaga nya livbandre na wuvili, Joyadha a di rumela gu ya rana vathangeli nya sikwata nya lizana, dzindruna gumogo ni vawoneleli, a bela gumogo navo Nyumbani ga Pfhumu Nungungulu, a gira navo gidzumeledzwano, a va sambanyisa Nyumbani ga Pfhumu Nungungulu, a va yeyedza gyanana gya mufumeli.

2 Dzipfhumu 11:4 Iomraidhean Croise

Genesi 50:25

Josefe a di sambanyisa sanana sa Israyeli a si embela, khuye: “Khu lisine, Nungungulu avbo a na guta mi holela, mu na rwala khavba marambo yangu mu hongola navo.”

2 Samuweli 20:23

Jowabhi a diri muthangeli nya nyimbi yatshavbo ya na Israyeli, gasi Bhenaya, mwamana wa Joyadha, a di emisidwe gu thangela Vakereti ni Vapeleti.

2 Samuweli 8:18

Bhenaya, mwamana wa Joyadha, a diri muthangeli nya Vakereti ni Vapeleti; gasi sanana sa Dhavhidhe, si diri dzindruna dza mufumeli.

1 Dzipfhumu 14:27

Mufumeli Robhowamo, a di gira sitshangu nya sugu gasi gu tshikhedza iso si nga dzegwago, a si ningela mandzani ga dzindruna nya nyimbi dzi nga bani dzi wonelela nyangwa ya mufumeli.

1 Dzipfhumu 18:10

Nyi ngu sambanya khu Pfhumu Nungungulu wago a vbanyago kheni, li mwalo litigo ambari mufumo omu mune wangu a ngamba rumela vathu gu gu vbweta, aholu va ta mu tivisa gukhavo kha va gu mana. Uye a di gurumedza mifumo ni mayigo, gu sambanya gukhavo uwe u mwalo iyo gwawe.

2 Dzipfhumu 11:17

Joyadha a di gira gidzumeledzwano ni Pfhumu Nungungulu, mufumeli gumogo ni vathu gasi va khala vathu va Pfhumu Nungungulu, a di gira gambe gidzumeledzwano ni mufumeli ni vathu.

2 Dzipfhumu 11:19

A di dzega vathangeli nya sikwata nya lizana (100), dzindruna, vawoneleli ni vathu vatshavbo va tigoni, va duga ni mufumeli khu Nyumbani ga Pfhumu Nungungulu va mu gimbidzisa khu ndzila yi belago khu mwanya nya vawoneleli, va bela nyumbani ga mufumeli; mufumeli Jowasi a di khala vbagikhalotunu nya dzipfhumu.

2 Dzipfhumu 11:3

Jeyosebha khade naye a sihala Nyumbani ga Pfhumu Nungungulu, livbandre na moyo myaga, Ataliya na gu fuma tigoni.

2 Dzipfhumu 11:9

Khu guralo, vathangeli nya sikwata nya lizana va di gira kharato kha nga guleletela ga muphasi nya mhamba Joyadha; moyo ni moyo a di dzega vathu vaye, vatshavbo va belago thumoni khu Sabhadho, ni ava va nga bani va duga khu litshigu nya Sabhadho; va dita ga muphasi nya mhamba Joyadha.

2 Dzipfhumu 12:7

Khavbo avbo, mufumeli Jowasi a di rana muphasi nya mhamba Joyadha ni vambe vaphasi nya mhamba ata va embela, khuye: “Khu ginani mu si gu lulamisigo malufa nya Nyumba? Olu mu nga dzegi gambe gyuma gya valongo vanu, aholu gi ningeleni gi lulamisela malufa.”

2 Dzipfhumu 23:3

Mufumeli a di khuga a ema nyangwani, a wusedza gidzumeledzwano mbeli ga Pfhumu Nungungulu, gukhuye a na landrela Pfhumu Nungungulu a landrisa Milayo yaye, magana yaye ni sileletelo saye khu monyo waye watshavbo ni hefemulo waye watshavbo a tiyisa magana nya gidzumeledzwano gegi, ma nga bani ma lovidwe libhukuni mule; vathu vatshavbo va di hungega ga gidzumeledzwano gegi.

1 Dzikoronika 9:13

gumogo ni vandriyawe va nga bani vari vathangeli va dzinyumbani nya guvelegwe gwawe, vatshavbo va diri likhumi na livbandre na mavili mazana ni livbandre na limwedo magumi (1.760) vama nya tshivba, gasi gu gira thumo watshavbo wa Nyumbani ga Nungungulu.

2 Dzikoronika 15:12

Va di gira gidzumeledzwano nya guvbwete Pfhumu Nungungulu wa vababe wawe, khu monyo wawe watshavbo ni hefemulo wawe watshavbo.

2 Dzikoronika 29:10

Khidzo kharato, monyo wangu olu wu pimisago gu gira gidzumeledzwano ni Pfhumu Nungungulu wa Israyeli, gasi a ndreyise vbakari gwathu likhulo laye.

Nehemiya 10:29

Vambe vathu va diri vaphasi nya mhamba, va na Levhi, vawoneleli nya dzinyangwa, vaembeleli, vasayisi va Nyumbani ga Nungungulu ni vatshavbo vale va nga bani va dugela mayigwana ya vbafuvbi, vata namarela vbamilayotunu ya Nungungulu, ni gu vagadzi vawe ni sanana sawe nya sikhwathana nesi nya vanyamahegyane ni vatshavbo avo va nga bani na vari ni tanga nya guti ni gu pima.

Nehemiya 5:12

Khu guralo, avo va di ganela, khavo: “Ina, hi na va bweledzela silo sawe, gimwalo hi na gu va dzegela. Hi na gira iso u ganedego.” Eni nyi di ranisa vaphasi nya mhamba nyita va sambanyisa gasi va gire iso va tumbisidego.

Mithumo 5:24

Na va pwide magana yaya, muthangeli nya Nyumba ya Nungungulu gumogo ni vakhongolo nya vaphasi nya mhamba, va di liwuga ngudzu va gu dzi wudzisa avo vamune, khavo: “Gu na bani ari ginani silo sesi.”

Mithumo 5:26

A di hongola muthangeli nya Nyumba ya Nungungulu ni dzindruna dzaye vaya va dzega nyamba va gurumedza khu tshivba, kholu va di gu thava gu pfarwa khu siwindri khu vathu.

Josuwa 24:25

Khu kharati, litshigu lile Josuwa a di gira gidzumeledzwano ni vathu a gi vega kha nga sileletelo ni fanelo tigoni ga Sikemi.

1 Samuweli 18:3

Jonatane ni Dhavhidhe va di gira gidzumeledzwano nya wupari, kholu Jonatane, a di gu gola Dhavhidhe kha nga idzo a golago khidzo hefemulo waye.

1 Samuweli 23:18

Va vavili va di gira gisambanyo mbeli ga Pfhumu Nungungulu. Khavbo avbo, Janatane a di hongola gaya, aholu Dhavhidhe a di khala Horesa.