1 Samuweli 27:1 - Bhibhiliya Nya Guage

¹ Khu guralo, Dhavhidhe a di pimisa khu monyoni gwaye, khuye: “Limbe litshigu nyi na tshukha nyi thegela mandzani ga Sawule; kholu, gimwalo nya gyadi nyi na gi girago vbavbandze nya guthavele tigoni ga Vafilisitiya; gasi Sawule a garala khu gu nyi landrelela ga sipandre satshavbo sa Israyeli; khu kharati nyi na vbuluga mandzani gwaye.”

1 Samuweli 27:1 Iomraidhean Croise

1 Dzipfhumu 12:26

Jerobhowamo a di pimisa khu monyoni gwaye, khuye: “Olu kamwe mufumo wu na wuya nyumbani ga Dhavhidhe.

1 Dzipfhumu 12:28

Hwane nya gu bani a dzi wudziside, mufumeli a di gira simombyana sivili nya ndralama; a embela vathu, khuye: “Enu mu ngu garala khu gu gwela Jerusalema, kha mu va woni ava vanungungulu vanu, enu va na Israyeli, va nga mi dusani khu tigoni ga Egipito.”

1 Dzipfhumu 19:3

Eliya a di tedwa khu hwanga, a duga khu vbale gasi gu vbulugisa womi waye. A vboha Bherisebha wa Judha, aya tshiya iyoyo githumi gyaye.

2 Dzikoronika 25:17

Hwane nya gu bani na mane wumbe wusingalagadzi, Amaziya mufumeli wa Judha, a di rumela myango ga Jowasi, mwamana wa Jeyohakazi, mwamana wa Jewu, mufumeli wa Israyeli, a mu embela, khuye: “Delu hi ta wonana khovbe ni khovbe.”

Dzindzimo 116:11

Khu gu vbela tshivba nyi di kala nyi ganela, kheni: “Vathu vatshavbo kha va tumbegi.”

Dzindzimo 55:7

Nyi di hadza gu thavela hwindzo nyi ya khala giwulani

Ekisodha 14:12

Ina khandriso esi hi nga gu embela tigoni ga Egipito gani, gikhati hi nga khethu: Hi dige hi thumela Vagipiti. Kholu a diri tshukwana gu thumela Vagipiti guvbindra gu ta fela giwulani.”

Mavingu 13:12

Muthu a gumba mana igyo a gi dilelago, a guvbisega monyo, aholu gu tadzisega nya misuwo, simbo nya womi.

Isaya 51:12

Eni kheni kamwe nyi na gu mi tangadzisago; gasi uwe, khuwe mani, nya gukala u thava vathu va fago va hina, mwendro sanana nya vathu si na bangago gu fanana ni mwasi?

Mitengo 14:3

Khu ginani Pfhumu Nungungulu a hi residego tigoni momu gasi hi fela guta songwa khu matshari, vagadzi vathu ni sanana sathu va na modwa va tshaniswa; khandri di gwadi hi bwelela tigoni ga Egipito, gani?”

Matewu 14:31

Khavbo avbo, Jesu a di mu phara khu libogo, a mu embela, khuye: “Muthu nya gukhodwe vbadugwana, khu ginani u nga kanakanago?”

Marko 4:40

Khavbo avbo, a di va embela, khuye: “Khu ginani mu thavago ngudzu? Ina mu si gu khodwi, gani?”

2 Vakorinto 7:5

Kholu gukhugela hi vboha tigoni ga Makedhoniya, gima kha hi mani ni gikhati nya guhefemule. Kholu ha gu wona sigaradzo maphuvbo yatshavbo: Mayunga ni guhambana ni vathu, khu vbavbandze; khu ndrani gu gugaradzega nya monyo.

1 Samuweli 16:1

Pfhumu Nungungulu a di embela Samuweli, khuye: “Kala lini nu nga gulila khu Sawule. Avbo eni nyi mu nyenyidego gasi a si fumeli gambe Israyeli? Olu tadza gigasi gyago khu mafura uta; nyi na gu rumela ga Jese wa Bhetlehema, kholu vbakari nya sanana saye, nyi hathide moyo gu khala mufumeli.”

1 Samuweli 16:13

Samuweli a di dzega gigasi nya mafura a mu todza vbakari ga vandriyaye; gukhugela litshigu lile guya mbeli Liphuvbo la Pfhumu Nungungulu li di mbaka ga Dhavhidhe. Khavbo avbo, Samuweli a di khuga a hongola Rama.

1 Samuweli 20:3

Khu guralo, Dhavhidhe a di gira gisambanyo a ganela, khuye: “Babe wago a ngu dziti gwadi gukhuye eni nyi manide wuwadi nya wukhongolo monyoni gwago, a di pimisa, khuye: Jonatane a nga siti esi gasi a si khuveki. Khu guralo, eni nyi ngu sambanya khu Pfhumu Nungungulu a vbanyago gukheni nyi womo ndzilani nya gufe.”

1 Samuweli 22:5

Khu guralo, muprofeti Gadhi a di embela Dhavhidhe, khuye: “U nga khali mugusihalani; duga u bwelela Judheya.” Khavbo avbo, Dhavhidhe a di hongola khabini ga Hereti.

1 Samuweli 23:17

A mu embela, khuye: “U nga thavi, kholu gyandza gya babe wangu Sawule kha gi na gu mana; khu guralo, uwe u na fumela Israyeli, eni nyi na khala gyandza gyago, mahungu yoyo ambari babe wangu Sawule a ngu mati gwadi.”

1 Samuweli 25:30

Pfhumu Nungungulu a gu gu girela wuwadi watshavbo, a gu tumbisidego, ni gu bani a gu emiside gu khala mufumeli wa Israyeli,

1 Samuweli 26:19

Gasi olu, uwe mufumeli mune wangu, nyi ngu gu lomba u yingise magana ya githumi gyago; a gu bani nari Pfhumu a gu kutsedzelago gu dwana ni eni, Uye a na dzumele nyi mu girela ningelo nya phaso nya guhodza; aholu a gu bani nari vathu, va na vadwe mbeli ga Pfhumu Nungungulu; kholu avo muhuno va nyi tutumiside gasi eni nyi si hakhi gipandre nya thomba ya Pfhumu Nungungulu, va nyi embela, khavo: Indra uya thumela vambe vanungungulu.

1 Samuweli 29:2

Manganagana nya Vafilisitiya ma diya yoyo na mari ni sikwata nya lizana (100) niso nya likhumi mazana (1.000); gasi Dhavhidhe ni vathu vaye, a di gu landra khu hwane na vari ni Akisi.

1 Samuweli 29:3

Manganagana nya Vafilisitiya ma di ganela, khavo: “Gasi Vahebheru vava va guvbweta ginani avba.” Akisi a di va phindrula, khuye: “Ina kamwe kha mu mutini Dhavhidhe, githumi gya Sawule, mufumeli wa Israyeli, gani?” Gu ngu vbindra myaga na nyiri naye, gimwalo gihoso nyi gi manidego gwaye gukhugela litshigu a thavidego ga va na gyawe kala muhuno.