1 Samuweli 14:18 - Bhibhiliya Nya Guage

¹⁸ Sawule a di embela Ayiya, khuye: “Nyi resele ngasa ya Nungungulu, kholu khu litshigu lile yi diri ni sanana sa Israyeli.”

1 Samuweli 14:18 Iomraidhean Croise

2 Samuweli 11:11

Uriya a di mu hakha khuye, Ngasa nya Gidzumeledzwano, yomo tshatshani; va na Israyeli ni va na Judha, gumogo ni mune wangu Jowabhi, ni sithumi sa mune wangu vomo vbavbandze; eni nyi ngu yela gu bela nyumbani gwangu, nyi hodza ni gu sela, nyi lala ni mwangadzi wangu, gani? Nyi ngu sambanya avbo gwago khu hefemulo wago gukheni, gima kha nyi na nga gira nya nga isoso.

Mitengo 27:21

Uye a na ya ema mbeli ga muphasi nya mhamba, Eleyazari; muphasi nya mhamba a na wudzisa khu uye ga Pfhumu Nungungulu khu gulola solo nya guage, khu guleleta nya Urimi; khuye a na ningago lito nya gu va duga, khuye gambe a na ningago lito gukhuye va bele, uye gumogo ni va na Israyeli ni tshangano watshavbo.”

Valamuli 20:18

Va na Israyeli va di khuga va gwela Bheteli, vaya wudzisa Nungungulu, khavo: “Khu mani wa vbakari gwathu, a na gu phelago khuye a gwela guya dwana ni va na Bhejami?” Pfhumu Nungungulu a di va embela, khuye: “Va na phele khu va na Judha.”

Valamuli 20:23

Va na Israyeli, va di gwela vaya lila mbeli ga Pfhumu Nungungulu kala ni silambo, va wudzisa Pfhumu, khavo: “Hi bwelela hi ya dwana ni vandriyathu va na Bhejami, gani?” Pfhumu Nungungulu a di va embela, khuye: “Indrani mu ya dwana navo.”

1 Samuweli 14:17

Khavbo avbo, Sawule a di embela vathu a nga bani nari navo, khuye: “Sayelani vathu mu wona khu mani a hamugegago.” Va di va sayela, va wona nya gukhavo, uye a gu mwalo khu Jonatane ni muphari nya matshari yaye.

1 Samuweli 14:36

Sawule a di engedza gambe a ganela, khuye: “Hongoleni hi relela wutshigu wowu hi ya dwanisa Vafilisitiya, hi va phanga kala gudugani nya lidambo, hi si digi ni moyo basi a vbanye.” Vathu va di ganela, khavo: “Gira satshavbo u si wonago na si lulamide.”

1 Samuweli 23:9

Avbo Dhavhidhe, a nga dzitigo gukhuye Sawule a ngu luga mano nya guvbwete gu mu dhumela, a di embela Abhiyatari, khuye: “Nyi resele keka nya miphaso.”

1 Samuweli 5:2

Vafilistiya va di dzega Ngasa ya Nungungulu va yi vega nyumbani ga Dhagoni, vbafuvbi ni gifananiso gyaye.

1 Samuweli 7:1

Khavbo avbo, va dita vama va Kiriyate-Jeyarimi va ta rwala Ngasa ya Pfhumu Nungungulu va yi yisa ndrangani ga Abhinadhabhi, yi nga bani yi manega gigomwanani; va hatha mwanaye, Eleyazari gu khala musayisi nya Ngasa ya Pfhumu Nungungulu.