1 Pedro 3:4 - Bhibhiliya Nya Guage

⁴ Aholu, wumburi wanu wu na khale khu myonyoni gwanu, kholu, khuwo wumbiri nyamba vbela, wumburi nya liphuvbo nya gurule, nya ndruda, khiso si gu na ni lisima ga Nungungulu.

1 Pedro 3:4 Iomraidhean Croise

Dzindzimo 131:2

Nyi manide gurula ni gu hefemula; gu fanana ni gyanana gi sengedzedwago khu mayi wagyo, nyi rudzisa hefemulo wangu gu fanana ni gyanana gi mamidego gi khura.

Dzindzimo 147:6

Pfhumu Nungungulu a ngu khusedza va nya gusolega, a gu tshisa vbavbatshi va nya myonyo nya guvivbe.

Dzindzimo 149:4

Kholu Pfhumu Nungungulu a ngu tsakiswa khu vathu vaye; va nya gusolega, a gu va ninga wuzundzo nya gupale.

Dzindzimo 25:9

A ngu gimbidzisa va nya gusolega khu nayo, a hevbudza va nya gurula ndzila yaye.

Dzindzimo 45:13

Nyamahegyane nya gumbure ngudzu, gyanana gya Mufumeli a ngu bela nyumbani nya wufumu; na ambade guambala nya gumburisedwe khu ndralama.

Dzindzimo 51:6

Uwe u ngu gola muthu nya lisine monyoni gwaye, u ngu nyi hevbudza guti sihaloni nya hefemulo wangu.

Isaya 11:4

aholu, a na lamula sisiwana khu nayo, a pila mahungu ya va nya gu dzi nogisa va tigoni khu gululama; a na veta litigo khu lipitso nya magana yaye, khu furugedzo wa kanani gwaye, a na songa va nya guvivba.

Isaya 29:19

Va nya gurula va na mana gunengela ga Pfhumu Nungungulu, sisiwana ni vahamugi vbakari nya vathu, va na nengela va ghiya ga Nyaguage wa Israyeli.

Isaya 57:15

Kholu a gu ganela kharati, wule a Khusegidego, a guromo vbatshani ngudzu, a vbanyago kala gupindruga; uye a gu ni lina li Agidego, khuye: “Eni nya gu vbanyela wulanga wu agidego wu guromo vbatshani ngudzu, aholu nya gu vbanya gambe gumogo ni avo va khuvekidego ni vale va vbedego tshivba, gasi gu tiyisa vale va vbedego tshivba ni gu tiyisa myonyo ya vale va khuvegidego.

Isaya 61:1

Liphuvbo la Mune, Pfhumu Nungungulu lomo avbo gwangu, kholu Pfhumu Nungungulu a nyi todzide khu mafura, a nyi wumbela gasi nyi huwelela mahungu maphya ga avo va vbedego tshivba; a nyi rumide guya hawulugisa avo va gu ni myonyo yi khuvekidego, ni gu huwelela gutshulega ga dzikhumbi, ni gu dusa vale va khothedwego mapasoni;

Jeremiya 51:59

Aya khu magana ma rumedwego khu muprofeti Jeremiya ga Seraya, mwamana wa Neriya, mwamana wa Mahaseya gikhati va nga bani va gu hongola Bhabhiloni ni Zedhekiya, mufumeli wa Judha, khu mwaga nya wu na nya gufume gwaye. Seraya a diri muthangeli nya dzighadhi.

Matewu 11:29

Rwalani pingwi wangu, mu hevbula kheni nyi gu ni monyo nya gurule nuwo nya gu dzi sodzise, gasi mu mane gutangala nya mihefemulo yanu.

Matewu 21:5

“Embelani nyamahegyane wa Siyoni. Khenu khedza Mufumeli wago, a gu telago khu gurula, na khilede giburwana, gyanana nya buru.”

Matewu 23:26

Gikhumuwe, mufarisi, guphela handza ndrani nya mbiya ni khokho, gasi vbavbandze gakone gu kodza nugo guaga.

Matewu 5:5

Va kategide va nya gurula, kholu va na hodza thomba nya litigo.

Luka 11:40

Sipumbu nenu, ina uye a nga girago liphuvbo la vbavbandze khandruye saye wa moyo a nga girago liphuvbo la ndrani, gani?

Luka 16:15

Jesu a di khuye: “Enu mwa guvbweta gu zundzwa kha nga vathu nya ndruda, vbakari nya vathu, aholu Nungungulu a ngu wona myonyo yanu. Kholu iso si khusegidego mahoni nya vathu si nyenyezide mahoni ga Nungungulu.

Varoma 1:23

Va digide gu rungudza Nungungulu nya gupindruge, va gu khozela sifananiso nya vathu vafago, kala va gu khozela ni sifananiso nya sinyoni, nya dzinyoga ni simbe sirengo si khwirirago khu lididi.

Varoma 2:29

Mujudha nya lisine khu wule a gu Mujudha khu monyoni gwaye, a nuwo wugwera nya lisine khu wule wu hanwago monyoni, wu hanwago maningano khu edzi li lombago khidzo Liphuvbo, nasiri khu edzi wu lombago khidzo nayo nya gulowe. Khuye oyu a rungudzwago khu Nungungulu, ambari a si rungudzwi khu vathu.

Varoma 6:6

Hi ngu dziti gwadi gukhethu muthu wathu wa gale fude gumogo ni Kristo vbagihambanotunu, gasi gu pfhungumudwa guvivba gwatshavbo hi nga bani hiri nago, hifela gu tshulega wugumbini nya gighoho.

Varoma 7:22

Livhaloni gwangu, nya gu dzipwa na nyi gu gola gu landrisa milayo ya Nungungulu.

2 Vakorinto 10:1

Eni, Pawulo, nya gu bani nyiri vbakari gwanu, nya gu dzi vbevbugisa, nya gu bani nyiri hwindzo, nya gu dzi lemedza. Nyi ngu mi lomba khu Kristo, oyu a nga dzi vega vbavbatshi ni gu dzi sodzisa.

2 Vakorinto 4:16

Khu guralo, kha hi garali. Ambari saye gi hagalago givili gyathu, hefemulo wathu, wa guya na wu gu wusedzwa nyaluphye khu litshigu ni litshigu.

Vagalatiya 5:23

gu dzi rudzisa, gu hunga monyo. Mwalo Nayo wu dzi kodzago gu wugela silo nya nga esi.

Vaefeso 4:2

Vbanyani gikhati gyatshavbo khu gu dzi sodzisa ni gurula, ni gutimisela. Mu yeyedzana, kharato, lihaladzo vbakari gwanu.

Vakolosi 3:12

Enu mu vathu va Nungungulu, kholu uye a ngu mi haladza, gambe a mi hathide. Khu kharato, gu vbwetega muri ni monyo nya gupwele wusiwana, nya ndruda, nya gu dzi nogise, nya gurule ni gutimisela.

Vakolosi 3:3

kholu enu mu fude ni Kristo, guvbanya gwanu gu sihidwe gumogo ni Kristo ga Nungungulu.

1 Vatesalonika 4:11

Dwanelani guvbanya khu gurula, vbedzani mwabune sigaradzo sanu, thumani gasi mu mane guvbanya, nga edzi hi nga mi hevbudzani khidzo.

2 Vatesalonika 3:12

Vathu vovo, hi ngu va khongotela ni gu va laya khu lina la Pfhumu yathu Jesu Kristo, gukhethu va na thume khu gurula, va hodze guhodza nya lithonga lawe.

1 Thimoti 2:2

khu vafumeli ni vathangeli nya mufumo gasi hi vbanye khu gurula, hi khalega gwadi, khu githawo gyatshavbo ni gululama.

2 Thimoti 2:25

Gu vbwetega u kodza gu kawuka valala vaye khu gwadi, gasi Nungungulu, a gu dzina saye, a va ninge mapimo nya gulandre lisine.

Tito 3:2

Va laye va si ganeli guvivba khu muthu, aholu, va khale khu gurula ni wuwadi, vari ni mavbanyelo nya yadi ga vathu vatshavbo.

Jakobe 1:21

Khu guralo, digani sihena satshavbo nya gunyenyeze, ni mavbanyelo yatshavbo nya guvivbe. Hakhani khu gurula Mahungu ya Nungungulu a yalago myonyoni gwanu, aya ma dzi kodzago gu mi vbanyisa.

1 Pedro 1:23

Khu tshivba nya magana nya guvbanye nya gupindruge ya Nungungulu, enu mu velegidwe nyaluphye khu Babe a sifigo, nasiri khu vababe nya gufe.

1 Pedro 3:15

Aholu rungudzani Kristo kha nga Pfhumu myonyoni gwanu, khalani na mu dongide gasi gu ningani phindrulo ni wevbini a na gu mi wudzisago khu mahungu nya gitumbo nya gukhodwe mu gu nago.

1 Samuweli 16:7

Aholu, Pfhumu Nungungulu a di embela Samuweli, khuye: U nga tsakiswi khu wumburi waye, ambari khu giyemo gyaye, kholu kha nya mu hatha; Pfhumu Nungungulu kha woni kha nga mawonelo nya vathu. Muthu a gu wona iso sa vbavbandze, aholu, Pfhumu Nungungulu a gu wona monyo.