1 Johane 2:1 - Bhibhiliya Nya Guage

¹ Vanavangu, nya gu mi lovelani esi, gasi mu si giri gighoho. Aholu muthu a gu ghoha, hi na ni muemeli mbeli ga Babe: Khu Jesu Kristo, a gu mwalo gihoso.

1 Johane 2:1 Iomraidhean Croise

Dzindzimo 4:4

Thavani mu nga ghohi gambe, pimisani khu myonyoni gwanu na mu lade mu dzi rudzisa.

Ezekiyeli 3:21

Aholu, wa gu kawuka muthu nya gululame a si giri guvivba, khu lisine uye a na vbanya kholu a nga dzumela gukawukwa, gasi uwe u na vbulugisa hefemulo wago.

Zakariya 9:9

Nengela ngudzu uwe nyamahegyane wa Siyoni; womba kulungwane nya gutsake uwe nyamahegyane wa Jerusalema; wona, Mufumeli wago a nguta gwago, uye a lulamide gambe Muvbanyisi, gisiwana, a nguta na khilede buru, avbo nya giburwana, gyanana nya buru nya ngadzi.

Luka 10:22

Satshavbo nyi ningidwe khu Babe wangu. Mwalo a mutigo khu mani Mwamana vbavbandze ga Babe ekha, gambe mwalo a mutigo khu mani Babe vbavbandze ga Mwanaye ekha, ni wule Mwamana a dzinago gu mu tulela.”

Johane 10:15

Kha nga olu Babe a nyitigo, eni neni nyi ngu muti Babe wangu; gambe nyi ngu ningela womi khu gufela dzinvuta dzangu.

Johane 13:33

Vanavangu, nyi ngari nanu gikhatinyana gegi. Mu na nyi vbwetani; kha nga nyi nga ganelago ga Vajudha, nyi ngu mi embelani nenu, kheni: Iyo nyi hongolago, enu kha mu dzi kodzi guya.

Johane 14:16

Eni nyi na lomba ga Babe, a mi rumela mumbe Muphasedzeli a gu Liphuvbo nya lisine a nata khalago nanu gikhati gyatshavbo.

Johane 14:6

Jesu a di khuye: “Eni kheni ndzila, ni lisine, ni guvbanya. Mwalo a vbohago ga Babe nyamba yiswa kheni.

Johane 21:5

Khavbo avbo, Jesu a di khuye: “Vanavangu, mu na ni ndzandzi nya guhodze, gani?” Va di mu hakha, khavo: “Ahihi.”

Johane 5:14

Hwane nya isoso, Jesu a diya mu mana Nyumbani ga Nungungulu, a mu embela, khuye: “U vbanyisidwe, u nga ghohi gambe, gasi u si dugeledwi khu mambe madwali nya guvbindre aya.”

Johane 5:36

Gasi eni nyi na ni wufakazi nya guvbindre wa Johane, kholu mithumo nyi ningidwego gu gira khu Babe, yi ngu fakaza gu khiyo Babe a nyi rumede.

Johane 6:27

Mu nga thumelini guhodza, gule gu dzi kodzago guvbela, aholu thumelani gule gu ningago guvbanya nya gupindruge, ugo mu na ningwago khu Mwamana wa Muthu; kholu khuye oyu a nga ningwago gifungo khuye mune Babe Nungungulu.”

Johane 8:11

A di hakha, khuye: “Mwalo, Pfhumu.” Jesu a di ganela, khuye: “Eni neni kha nyi gu giri gilo. Indra basi, aholu gukhugela muhuno u nga engedzi gambe gughoha.”]

Mithumo 7:52

Khu wevbini muprofeti wa gale v ngamba mu tutumisa vababe vanu? Va songide vale va nga hegula gutivisa lipfhumba nya gute ga muthu nya ululamenga mu danga enu mu gu mu songa.

Varoma 5:10

Uye Nungungulu, na hi ngari valala vaye a hi wonego na hi lulamide khu kotani nya gufe ga Kristo, hi ngu khodwa gukhethu, ngudzungudzu olu, hi tshanganisidwego naye, hi na vbanyiswa khu womi wa Mwanaye.

Varoma 6:15

Hi na khethu ginani olu? Hi na dzi ningedzela gighohoni khu gukhethu kha hi ngu gu rumwa gambe khu Nayo, ha gu rumwa khu wuhigo wa Nungungulu, gani? Khandridzo, gima kha hi na gira kharato.

Varoma 8:34

Khu mani a na va ningago nandru? Khu Jesu Kristo, a gu uye a ngafago a wuga, a khadego khu nyamudye ga Nungungulu a lombelela khu ethu, gani?

1 Vakorinto 15:34

Digani mavbanyelo nya guvivbe, vbanyani khu ndruda kha nga edzi a dzinago khidzo Nungungulu! Kholu, vbakari gwanu vomo va si mutigo Nungungulu. Nya gu ganela esi khu gufela gu mi thela dzitshoni.

2 Vakorinto 5:21

Uye a ngamba ghoha, Nungungulu a mu giride gighohi khu kotani yathu, gasi, khu gutshanganiswa ni uye, hi kodze gu hakhwa gwadi khu Nungungulu.

Vagalatiya 4:19

Vanavangu, nyi ngu simama gupwa wuvi kha nga nyamayi a lumwago khu enu, kala litshigu Kristo a na gu vbelelago guwumbwa myonyoni gwanu;

Vaefeso 2:18

Khu ga Kristo, ethu hatshavbo hi tshanganisidwe khu Liphuvbo la limwedo, hi gu tuledwa kharati ndzila nya guvbohe ga Babe.

Vaefeso 4:26

Mwa gu mana gigaradzo monyoni, dzi woneleni, mu nga digi gugaradzega gwanu gu khala gighoho. Likhulo lanu li nga hweli kala mu gu pfoledwa khu lidambo mu ngari nalo.

1 Thimoti 2:5

kholu womo Nungungulu moyo basi, ni Mutshanganisi moyo a tshanganisago Nungungulu ni vathu, khu Jesu Kristo a gu muthu nuye,

1 Thimoti 3:14

Nya gu gu lovela silo sesi na nyi gu tumba gukheni nyi nata khu guvbiredza nyita wonana nago.

Vahebheru 9:24

Kholu Kristo kha bela Makhuvini nya Wulanga nya Guage Ngudzu nya gugirwe khu mandza nya vathu a gu giyeyedzo nya Wulanga nya Guage nya lisine. Uye bede ndzadzini gwabune, umo a guromo olu a lombelela khu ethu mbeli ga Nungungulu.

Jakobe 1:27

Wukhodwa nya lisine wu lulamidego mahoni ga Nungungulu Babe, khu ogu: Guya holela sigulungu ni dzinoni gusanisekani gwawe, ni gumba dzi nyenyezisa khu silo nya guvivbe sa mafuni momu.

Jakobe 3:9

Khu lidimi, hi ngu rungudza Nungungulu a gu Babe wathu, khu ilo gambe, hi ngu vala vathu va giridwego khu mufananiso wa Nungungulu.

1 Pedro 2:22

Uye gima kha gira giwono, gambe mwalo a mu pwidego na gu ganela guvivba khu kanani gwaye.

1 Pedro 3:18

Kristo nuye fude gumogo basi khu kotani nya sighoho, na gufela enu. Muthu nya wadi afela va nya guvivba, gasi gu va yisa ga Nungungulu. Uye fude khu givili, aholu wusidwe khu Liphuvbo nya Guage.

1 Johane 3:18

Vandriyangu, lihaladzo lathu li nga khali basi nya guganele ni mabhulo. Li na khale lihaladzo nya lisine, li dzi yeyedza khu mithumo.

1 Johane 3:5

Enu mu ngu dzitini gukhenu Kristo a di dzi wonegisa gasi guta dusa sighoho sathu, nari gu uye mwalo gighoho.

1 Johane 3:7

Vanavangu, mu nga dzumeli mu sengwa khu muthu! Oyu a girago esi nya lisine lulamide, kha nga nuye Kristo a lulamidego.

1 Johane 4:4

Vanavangu, enu mwa gu lumba Nungungulu. Mu va pade vaprofeti nya malipha. Kholu, Liphuvbo mu gu nalo enu, li na ni tshivba guvbindra liphuvbo la vale va lumbago litigo leli.

1 Johane 5:17

Guvivba gwatshavbo gighoho, aholu, somo sighoho si si yisigo gufani.

1 Johane 5:21

Vanavangu, dzi woneleni ga vanungungulu nya malipha.

3 Johane 1:4

Gi mwalo gi nyi tsakisago guvbindra gupwa gupwani sanana sangu si ngu vbanya khu gu landra lisine.