1 Dzipfhumu 9:15 - Bhibhiliya Nya Guage

¹⁵ Owu khu sasamedzo nya mithumo yatshavbo nya gibhalu yi thumidwego khu guruma ga mufumeli Solomoni, gasi guvbaha Nyumba ya Pfhumu Nungungulu, ni nyumba yaye nya wufumu, Milo ni likhokhola la Jerusalema, gumogo gambe ni Hazori, Megidhu ni Gezeri.

1 Dzipfhumu 9:15 Iomraidhean Croise

2 Samuweli 5:9

Khu guralo, Dhavhidhe a di khala ndrani nya likhokhola a li rana khuye Didhoropa la Dhavhidhe; Dhavhidhe a di vbaha maphuvbo yatshavbo nya likhokhola, gukhugela Milo kala ndrani gakone.

1 Dzipfhumu 11:27

Givangelo gi nga mu girago a wugela mufumeli, khegi: Solomoni a di gu vbaha likhokhola li ranwago pwani Milo, gasi gu tshikedzela libhiyo nya lidhoropa la babe waye Dhavhidhe.

1 Dzipfhumu 12:4

“Babe wago a hi lemedzide khu mithumo nya gulemele; gasi uwe olu hi vbevbugisele ga mithumo yoyo nya wugumbi hi rwegidwego khu babe wago, ni kanga yoyu nya gulemele a hi handzegidego magatani gwathu, ethu hi na gu thumela.”

1 Dzipfhumu 3:1

Solomoni a di gira wulongo ni Faro, mufumeli wa Egipito, a dzegana ni nyamahegyane wa Faro, a khala mwangadzi waye, a mu resa Dhoropani ga Dhavhidhe, kala a vbedza guvbaha nyumba yaye, ni Nyumba ya Pfhumu Nungungulu, gumogo ni libhiyo li dzundrulugelago Jerusalema.

1 Dzipfhumu 4:12

Bhahana, mwamana wa Aliyudhi, ndruna nya gipandre gya Tahanaki, Migidhu ni litigo latshavbo la Bheti-Seyani li guromo vbafuvbi ni lidhoropa la Saritani, khogani ga Jezireyeli, gukhugela Bheti-Seyani kala Abheli-Meyola, khu tshatugo wa Jokimiyani;

1 Dzipfhumu 5:13

Mufumeli Solomoni a di rana tigoni gwatshavbo gwa Israyeli, magumararu magumi mazana (30.000) vama nya gibhalu.

1 Dzipfhumu 6:38

Khu mwaga nya likhumi na moyo, khu ngima nya Bhuli, a gu ngima nya livbandre na miraru, yi di vbela gu vbahwa nyumba yeyi khu maphuvbo yaye yatshavbo, ni satshavbo iso si nga bani si hungidwe; Solomoni vbahide nyumba yeyi khu livbandre na mivili myaga.

1 Dzipfhumu 9:10

Hwane nya magumavili myaga, avbo Solomoni a nga vbedzago guvbaha dzinyumba dza dzimbili, Nyumba ya Pfhumu Nungungulu ni nyumba nya wufumu,

1 Dzipfhumu 9:21

sanana sawe si nga bani si tshade tigoni mule hwane gwawe, avo va na Israyeli va ngamba va kodza gu va mbembisela muphelo, vatshavbo vava, Solomoni a di va gurumedza gu thuma gibhalu, ni gu va gira sithumi kala na muhuno.

1 Dzipfhumu 9:24

Gikhati nyamahegyane wa Faro, ngadza Solomoni, a nga khugago khu Dhoropani ga Dhavhidhe, a ta bela nyumbani gwaye a nga vbahedwago khu Solomoni; Solomoni a di vbaha Milo.

2 Dzipfhumu 12:20

Sithumi saye si di mu wugela si mu songa nyumbani ga Milo ndzilani yi yago Sila.

2 Dzipfhumu 15:29

Matshiguni ya Peka, mufumeli wa Israyeli, a dita Tigalati-Pileseri, mufumeli wa Asiriya, ata wandra Iyoni ni Abheli-Bheti-Mahaka, Janowa, ni Kedhesi, Hazori, Gileyadhi ni Galileya, ni litigo latshavbo la Nafitali, a vbagela vavbanyi vaye a va yisa Asiriya.

2 Dzipfhumu 9:27

Avbo Akaziya, mufumeli wa Judha, a nga wonago esi, a di tutuma khu ndzila yi thononago Bheti-Hagani. Aholu Jewu a di mu landra a mu lundra, khuye: “Mu songeni nuye karetani gwaye.” Va di mu bayisa na gu gwela Guri, gu khadego vbafuvbi ni Ibhileyamu, a thava a tutumela Megidhu aya fela iyoyo.

1 Dzikoronika 20:4

Khu hwane nya esi, gu manegide nyimbi tigoni ga Gezeri nya gudwane ni Vafilisitiya; khavbo avbo, Sibhekayi, Muhusu a di songa sipayi, a nga bani ari moyo nya vama vava nya vadandrangulu; ni Vafilisitiya va di khoziswa.

2 Dzikoronika 35:22

Aholu Josiya kha nga thendregedza a bwelela; gima kha nga yingisa magana ya Neko, ayo ma nga bani ma duga khu kanani ga Nungungulu, a di ta dwana naye kovani wa Megidho.

2 Dzikoronika 8:1

Hwane nya magumavili myaga, Solomoni a di vbedza guvbaha Nyumba ya Pfhumu Nungungulu gumogo ni nyumba yaye nya wufumu;

Dzindzimo 51:18

Kategisa gwadi Siyoni khu wuhindzi wago; vbahedza nyaluphye mabhiyo ya Jerusalema.

Zakariya 12:11

Khu litshigu lolo, gu na pwala huwa nya yikhongolo Jerusalema, kha nga huwa ya Hadhadhi-Rimoni, kovani ga Megidho.

Josuwa 10:33

Khavbo avbo, Howamu, mufumeli wa Gezeri, a di hongola aya phasedzela Lakisi; aholu Josuwa a di sasela gumogo ni vathu vaye nyamba tshala ni moyo.

Josuwa 11:1

Avbo Jabini, mufumeli wa Hazori, a nga pwago mahungu yaya, a di rumela myango ga Jobhabhi, mufumeli wa Madhoni, ni ga mufumeli wa Siniromi, ni ga mufumeli wa Akisafi,

Josuwa 16:10

Khu guralo, va na Efrayimi kha va nga dzi kodza gu tutumisa Vakhanani va nga bani va vbanya tigoni ga Gezeri. Khu guralo, kala na muhuno Vakhanani va nga gu simama gu vbanya tigoni mule, aholu va gu gurumedzwa gu livba gikhaba.

Josuwa 16:3

li relela li thonona Muhwadambo, vbinganoni wa Jafeti, kala vbinganoni wa Bheti-Horoni wa vbavbatshi kala Gezeri wu ya vbelela phwani.

Josuwa 17:11

Kholu tigoni ga Isakari ni Aseri, Manasi a di ningwa Bheti-Seyani gumogo ni madhoropa yaye; Ibhileyamu gumogo ni madhoropa yaye; vavbanyi va Dhori gumogo ni madhoropa yawe; vavbanyi va Eni-Dhori gumogo ni madhoropa yawe; vavbanyi va Tahanaki gumogo ni madhoropa yawe ni vavbanyi va Megidhu gumogo ni madhoropa yawe; a gu malanga mararu.

Josuwa 19:36

Adhama, Rama, Hazori,

Josuwa 21:21

Va di ningwa Sikemi, lidhoropa nya wuthavelo nya sighevenga, ni mayigwana yaye gigomoni ga Efrayimi, ni Gezeri ni mayigwana yaye,

Valamuli 1:29

Lihundzu la na Efrayimi kha la nga tutumisa Vakhanani va nga bani va khala tigoni ga Gezeri, ava, va di simama guvbanya mule, vbakari ga va na Efrayimi.

Valamuli 4:2

Pfhumu Nungungulu a di va ningela mandzani ga Jabhimi, mufumeli wa Khanani, a nga bani na gu fuma dhoropani ga Hazori. Sisera a diri ndruna yaye nya nyimbi, uye a di gu vbanyela tigoni ga Haroseti-Hagoyimi.

Valamuli 5:19

Gu dita vafumeli va ta dwana, vafumeli Vakhanani va dita dwana Tahanaki, vbafuvbi ni mati ya Megidho; aholu kha mana phango nya parata.

Valamuli 9:20

Aholu a gu bani na siri kharato, gu na duge nilo khavbo ga Abhimeleki wu na gumbembisago vatshavbo vavbanyi va Bheti-Milo, wu mbembisa gambe ni Abhimeleki.

Valamuli 9:6

Khavbo avbo, vavbanyi vatshavbo va Sikemi ni vatshavbo va Bheti-Milo; va di tombana vaya emisa Abhimeleki gu khala mufumeli, vbafuvbi ni nguhu nya wukhongolo wu guromo vbafuvbi ni Sikemi.