Nehemiya 13:10 - Bhibhiliya Nya Guage

¹⁰ Nyi tivisidwe gambe gupwani va na Levhi ni vaembeleli va nga bani vari thumoni nya wukhozeli va digide gu ningwa miningelo yi nga bani yi va lumba, khu guralo, va khugide Jerusalema muthu ni muthu a bwelela ndrangani gwaye gu gu ni marembwe yawe, kholu va di si si mani iso nya guyele guvbanya khiso.

Nehemiya 13:10 Iomraidhean Croise

2 Dzikoronika 31:4

A di leletela vathu va vbanyago Jerusalema, gasi va ningela fanelo ya vaphasi nya mhamba ni ya va na Levhi; gasi va kodza gu dzi agisa va landrisa Nayo wa Pfhumu Nungungulu.

Nehemiya 10:37

Khu magirelo ya mamowo, hi na resa umo nya dzinyumba nya guvegedzele dzithomba dzi guromo Nyumbani ga Nungungulu wathu, ga vaphasi nya mhamba, mihandro nya wuguvbi nya guphele, nya miningelo yathu, ni mihandro nya misimbo yathu yatshavbo niyo nya wadwa nya vhinya, nya mafura, hi ningela va na Levhi mihengo nya likhumi ya mahangeni gwathu; kholu khavo va vegidwego gu hengisa madhoropani gwatshavbo satshavbo nya lithonga lathu.

Nehemiya 10:39

Kholu va na Israyeli ni va na Levhi, va na resa dzinyumbani momu mihengo nya guhegule nya wuguvbi nya mavbila, nya vbinyu niyo nya mafura; kholu khumo si guromo sombo nya gu miphaso gumogo ni vaphasi nya mhamba va thumelago umo, ni vakheviseli nya myanya ni vaembeleli. Khu kharato, hi na sayisa gwadi Nyumba ya Nungungulu wathu.

Nehemiya 12:47

Matshiguni ya Zorobhabheli ni Nehemiya, vatshavbo va diri ni fanelo nya gugire mihengo nya guphasedzele vaembeleli ni vakheviseli nya myanya khu litshigu ni litshigu; va si agisela va na Levhi, avo navo va si agisela va na Aroni.

Isaya 43:23

Kha wa nyi resela dzinvuta guta gira miningelo nya miphaso nya guvbiswe, ambari gu nyi zundza khu dzimhamba dzago; eni kha nya gu lemedza khu gu lomba miningelo nya guhodze, ambari gu gu garadza khu gu nyi vbisela libani.

Malakiya 3:8

“Ina muthu a ngu dzi kodza gu bela Nungungulu, gani? Gasi enu mwa gu nyi bela mu bwelo khavbo mu wudzisa, khenu: Ginani hi nga gu belago? Mu ngu nyi bela umo nya gipandre nya likhumi ni avbo nya miningelo mu yelago gu nyi luva khiyo!

Mitengo 35:2

Tivisa va na Israyeli gukhuwe ga thomba yawe va na ninge va na Levhi madhoropa gasi va vbahe umo, va va ninga gambe marembwe ma dzundrulugelago madhoropa yawe gasi va havise umo mitshambi yawe.

Dhewuteronome 12:19

Dzi wonele, u nga digi gu sayisa mulevhi matshigu yatshavbo nya guvbanye gwago tigoni.