Mithumo 3:17 - Bhibhiliya Nya Guage

¹⁷ Ambari ulo vandruye, nyi ngu dziti nya gukheni mu giride esi khu wuhangi, enu ni vafumeli vanu.

Mithumo 3:17 Iomraidhean Croise

Genesi 21:26

Khavbo avbo, Abhimeleki a di hakha, khuye: “Eni kha nyi muti khu mani a giridego isoso. Uwe gima khwa nga nyi tivisa mahungu yoyo; nya gu phela muhuno olu gu gupwa nu gu ganela isoso.”

Genesi 39:8

Josefa a di bomba, a mu embela, khuye: “Uwe u ngu dziti gukhuwe, mune wangu kha nyi henguli gilo ndrangani gwaye, ni gukhuwe vegide mandzani gwangu sigiro saye satshavbo.”

Genesi 44:15

Josefa a di va wudzisa, khuye: “Gasi ginani igyo mu giridego? Kha mu dzitini gukhenu muthu nya nga eni a ngu kodza gudhumba, gani?”

Ekisodha 32:1

Aholu, avbo vathu va nga wonago gukhavo Mosi a ngu hwela gu tshiga khu mugigomoni, va diya randrela Aroni va mu embela, khavo: “Hi wumbele vanungungulu va na gu hi thangelago mbeli, kholu Mosi a gu uye a hi dusidego tigoni ga Egipito, kha hi dziti gukhethu ginani gi mu manego.”

Mitengo 22:6

Gasi olu, hi ngu gu lomba gukhethu u ta khu guvbiredza u ta yuyutela vathu vava, kholu va na ni tshivba gu nyi vbindra. Khu guralo, eni kha nyi na dzi kodza gu va pala, ni gu va tutumisa tigoni momu, kholu nyi ngu dziti gukheni uwe, uye u mu kategisago, kategide, ni oyu u mu valago a vadwe.”

Luka 23:13

Pilato a di tshanganisa vakhongolo nya vaphasi nya mhamba, vafumeli ni vathu vatshavbo, a va embela, khuye:

Luka 23:34

Jesu a di khuye: “Baba, va tsetselele, kholu kha va giti igyo va girago.” Khavbo avbo, va di kabana dzingandzu dzaye, khu gu gira nyatumbatumbane.

Johane 15:21

Va na mi gira satshavbo sesi, khu kotani nya lina langu, kholu kha va muti wule a nyi rumedego.

Johane 16:3

Va na gira kharato kholu kha va muti, Babe wangu ni eni.

Johane 7:52

Va di mu phindrula, khavo: “Uwe nuwe u wa Galileya, gani? Khedza gwadi, u na wona nya gukhuwe mwalo muprofeti a dugelago Galileya.”

Mithumo 13:27

Vathu va Jerusalema ni vafumeli vawe, khu gumba muti Jesu, va di mu mola, va tadzisela kharato magana ya vaprofeti ma hevbudwago khu dzisabhadho dzatshavbo.

Mithumo 22:5

Khongolo nya vaphasi nya mhamba ni madhota khavo dzifakazi nya silo sesi. Nyi hakhide khu mandzani gwawe malangalila nya gulovedwe vandruye va vbanyago dhoropani ga Dhamasiko. Nyi hongode nawo gasi guya mola Vakristo nyi va resa Jerusalema va ta tsayiswa.

Mithumo 26:9

Eni neni nyi di gu pimisa gukheni gu vbwetega gu dwana khu maphuvbo yatshavbo gasi gu fuvisa lina la Jesu, Munazarenu.

Mithumo 28:21

Avo va di mu hakha, khavo: “Ethu hi si hakhi lidangalila la Judheya nya guganele khu mahungu yago. Gambe mwalo na moyo wa Judheya a ngata a resa mahungu yoyo, mwendro guta hi embela guvivba khu mahungu yago.

Mithumo 7:40

Va di embela Aroni, khavo: ‘Hi girele vanungungulu va na gu thangago mbeli gwathu; kholu kha hi siti esi si dugeledego Mosi, a nga hi dusa tigoni ga Egipito.’

Varoma 11:2

Nungungulu kha tsukula vathu vaye a va hathidego gukhugela tshiguneneni. Ina kha mu si pimi esi milowo yi ganedego khu Eliya a ngaya dilela ga Nungungulu khu mahungu ya Israyeli, gani?

1 Vakorinto 2:8

Mwalo mufumeli wa mafuni a nga gu pima guti gogo. Nari gupwani va di gu pimide, gima va sa khokhothela vbagihambanotunu Pfhumu nya wudhumo watshavbo.

2 Vakorinto 3:14

Aholu mapimo yawe ma di segegide mugidemani. Kala ni olu, va gu hevbula Milowo nya Testamenta ya gale, iyo tshalu yoyo yi nga gu va segela, kholu ya gu funungudwa basi khu ga Kristo.

Vaefeso 4:18

kholu mapimo yawe ma segegide. Va hambane ni guvbanya gwa Nungungulu khu kotani nya wuhangi ni gusegega nya myonyo yawe.

Vafilipi 1:22

Aholu ga gu wonega gupwani guvbanya mafuni momu gu ngari ni giphaso thumoni gwangu, kha nyi na giti ni egi nya guhathe.

1 Thimoti 1:13

A nyi girede esi, ambari nyi nga bani nyiri muvali, mutshanisi ni muhembululi. Ambari ulo, nyi mane wuhindzi kholu, nyi di gira khu wuhangi, gikhati nyi nga bani nyi si gu hakhi gukhodwa.