Mitengo 18:15 - Bhibhiliya Nya Guage

¹⁵ Matiwula yatshavbo nya vathu mwendro nya sirengo, va na gu resago ga Pfhumu Nungungulu, ma na lumba uwe; aholu matiwula nya vathu ni matiwula nya sirengo nyamba aga u na rumela ma dzegiswa.

Mitengo 18:15 Iomraidhean Croise

2 Dzipfhumu 12:5

Vaphasi nya mhamba va na hakha dzitsapawu dzodzo, moyo ni moyo a na hakha ga va na gyawe. Avo va na lulamisela malufa nya nyumba, mayelano khu malufa yatshavbo yi na gu bani yiri nawo.”

Nehemiya 10:37

Khu magirelo ya mamowo, hi na resa umo nya dzinyumba nya guvegedzele dzithomba dzi guromo Nyumbani ga Nungungulu wathu, ga vaphasi nya mhamba, mihandro nya wuguvbi nya guphele, nya miningelo yathu, ni mihandro nya misimbo yathu yatshavbo niyo nya wadwa nya vhinya, nya mafura, hi ningela va na Levhi mihengo nya likhumi ya mahangeni gwathu; kholu khavo va vegidwego gu hengisa madhoropani gwatshavbo satshavbo nya lithonga lathu.

Ekisodha 13:15

Kholu gikhati Faro a nga bangisa monyo waye a bomba gu hi tshula hi duga, Pfhumu Nungungulu a di songa sanana satshavbo nya matiwula sa tigoni ga Egipito. Gukhugela matiwula nya vathu kala matiwula nya sirengo. Khigyo givangelo gi nyi girago nyi paya sifuyo satshavbo nya vamatune si phelago khiso gu duga ndrani ga vamayi vawe nyi phasela Pfhumu Nungungulu, nyi dzegisa matiwula yatshavbo nya sanana sangu.

Ekisodha 13:2

“U na phasela Eni gyanana gyatshavbo nya matiwula, gyanana gyatshavbo nya guphele ndrani ga mayi waye, vbakari nya vathu va na Israyeli ni nya sirengo, gya gu lumba Eni.”

Ekisodha 22:29

U nga hweli gu dusa hwengo nya mihandro ya thembweni gwago ni ya gikhwatini gwago. U na nyi ninga matiwula nya sanana sago.

Ekisodha 34:20

Aholu matiwula nya buru, u na ma dzegisa khu nvutana, wa gumba ma dzegisa u na ma funya thamo. Matiwula nya sanana sanu mu na ma dzegisa gikhati gyatshavbo; kha mu na hidzimela vbafuvbi gwangu na mwa sa phara gilo mandzani.

Mitengo 18:16

Avo va lumbago gu dzegiswa, u na va dzegisa na vari ni tanga nya ngima moyo nya guvelegwe, mayelano khidzo u na gu dzi wona khidzo, khu tengo nya livbandre singerengere nya parata, gukhedza khu pimo wa Wulangani nya Guage, gingerengere ni gingerengere gi pimago likhumi dzigera.

Mitengo 3:13

kholu matiwula yatshavbo ma gu lumba Eni gukhugela litshigu lile nyi nga songa matiwula yatshavbo tigoni ga Egipito. Nyi phasede avbo gwangu matiwula yatshavbo ya na Israyeli, gukhugela ayo nya vathu kala nya sifuyo; ma gu lumba Eni. Eni kheni Pfhumu Nungungulu.”

Mitengo 3:46

Gasi avo nya mazana mavili ni livbandre na mavili magumi na vararu (273) nya matiwula ya na Israyeli, avo va vbindrago tengo nya Valevhi, va na dzegiswa.

Dhewuteronome 15:19

Matiwula yatshavbo ma na gu velegwago tshambini gwago nya dzimombe mwendro nya dzinvuta, ayo nya matune, u na phasela Pfhumu Nungungulu wago; matiwula ya phandroni gwago nya dzimombe, u nga tshuki u ma thumisa, ambari matiwula nya dzinvuta dzago u nga ma gayi mawoya.