Mikeya 2:3 - Bhibhiliya Nya Guage

³ Khu guralo, Pfhumu Nungungulu a ngu ganela kharati, khuye: “Wonani nya gukhenu nyi ngu luga makungo, gasi gu resa libango ga vathu vovo, ilo mu na gumba dzi kodza gu vbuluga ga ilo; gambe kha mu na gimbila khu matshandza, kholu gikhati gyogyo gi na bani gi vivbide.

Mikeya 2:3 Iomraidhean Croise

Isaya 29:20

Vathu nya dzihanyi ni vatshanisi, va na fuviswa khu Pfhumu Nungungulu, gumbembiswa gambe vatshavbo va thumago guvivba,

Isaya 3:16

Pfhumu Nungungulu a ngu engedza a ganela, khuye: Kha nga olu vanyamahegyane va Siyoni va dzi gugumugisago, va gimbila na va khusedzide dzithamo, maho yawe na ma tade khu wukanganyisi, va gu gimbila gukhwatshi va di hungwa, na va gu dzumisa masindra ya mawundruni gwawe.

Isaya 5:19

Avo vari, khavo: “Nungungulu a na vbiredzele gu vbedza thumo waye, gasi hi kodza gu si wona. Makungo ya Nyaguage wa Israyeli, ma na tadzisege, gasi hi ma wona.”

Jeremiya 18:11

Gasi olu, embela vathu va na Judha ni vavbanyi va Jerusalema, khuwe: Pfhumu Nungungulu a ngu ganela kharati, khuye: “Wonani nya gukhenu nyi ngu mi dongisela dzimhango ni gikungo nya gu mi wugele; dzi woneleni olu vbindrugedzani mavbanyelo yanu nya guvivbe, muthu ni muthu a ndreya ndzilani gwaye mu lulamisa dzindzila dzanu ni sigiro sanu.”

Jeremiya 27:12

Mahungu yaya ma gu fanana nayo nya guhegule nyi ganedego ni Zedhekiya, mufumeli wa Judha, nyi nga mu embela, kheni: “Dzumelani gu hungwa kanga khu mufumeli wa Bhabhiloni, mu mu thumelani uye gumogo ni vathu vaye, gasi mu kodze guvbanya.

Jeremiya 34:17

Khu guralo, Pfhumu Nungungulu a ngu ganela kharati, khuye: “Enu kha mwa nyi yingisani gu tshula vandriyanu muwugumbini. Olu eni Pfhumu Nungungulu, nyi ngu mi embelani gukheni nyi na mi tulelani dzinyimbi dzi ta mi sasela khu matshari, mitungu ni dzindzala; mu na khala gihegiso vbakari nya mifumo yatshavbo ya mafuni.

Jeremiya 36:23

Gikhati ni gikhati Jewudhi a nga bani na gu vbedza gu hevbula malangalila mararu mwendro mana, mufumeli a di ma pila khu ngala wa mulovi a ma rinya gikhoni nya nilo, mavbya kala libhuku latshavbo li vbela khu guvbya.

Jeremiya 43:2

Azariya, mwamana wa Hosaya, ni Jowanani, mwamana wa Kareya, ni vatshavbo va nya matshandza, va di embela Jeremiya, khavo: “Malipha isoso u ganelago! Pfhumu Nungungulu wathu, kha gu rumela guta hi embela khuye, hi nga hongoli hiya khala tigoni ga Egipito.

Jeremiya 8:3

Ni vatshavbo avo va nga tshalago ga lifumbu lolo nya guvivbedwe khu monyo, va na vbweta gufa guvbindra guvbanya, malangani yatshavbo nyi na gu va lundrago vaya umo, a ngu ganela Pfhumu Nungungulu nya Tshivba Yatshavbo.

Gililo 1:14

Rwalo nya sighoho sangu wu ngu nyi lemela. Pfhumu hungide nyandra khu mandza yaye a yi handzega magatani gwangu, nyi rereka nyi vbela tshivba. Pfhumu a di nyi ningela mawogoni ga va nya tshivba nyi si kodzi gu khuga. Samec

Gililo 2:17

Pfhumu Nungungulu tadziside gwago makungo yaye; giride iso a nga bani na gu ganela khu matshiguni ya gale. Pfhungumude nyamba pwela gisiro; tsakiside valala vago khu kotani nya guthege gwago, a va engedzede tshivba. Sade

Gililo 5:5

Vasanisi vathu va gu hi sokhovedza, khu mirwalo nya gulemele, ambari na hi garade kha va hi digi hi hefemula.

Dhaniyeli 4:37

Gasi olu, eni Nabhukodhonosori, nyi ngu rungudza, nyi khusedza ni gu dhumisa Mufumeli nya dzindzadzi. Kholu mithumo yaye yatshavbo khya lisine, ni dzindzila dzaye dzi lulamide. Uye a na ni tshivba nya guthese vbavbatshi avo va dzi khusedzago.

Amosi 2:14

Muthu nya mazambo kha na vbuluga, ambari muthu nya tshivba a na vbeledwa khu tshivba, ni ndrena kha yi na vbulugisa womi waye.

Amosi 3:1

Upwani magana yaya Pfhumu Nungungulu a ganedego gwanu, enu va na Israyeli, ni ga lihundzu latshavbo leli a li dusidego khu tigoni ga Egipito wari khuye:

Amosi 3:2

Ga mafumbo yatshavbo ya mafuni, nyi hathide enu basi; khu guralo, nyi na mi tsayisa khu kotani nya guvivba gwanu gwatshavbo.

Amosi 5:13

Khu guralo, oyu a gengedego, a na degule, kholu gikhati gi na bani givivbide.

Mikeya 2:1

Libango, ga vale va na gu bani va lade malawuni gwawe, va luga makungo nya wuvivbi, gikhati gugyago va tadzisa esi va hungidego, kholu somo tshivbani nya mandza yawe.

Varoma 16:4

Avo va di dzi ningela ni womi wawe khu gufela gu nyi vbanyisa. Khavbo avbo, nyi ngu va bonga ngudzu. Nasiri eni basi, aholu ni mabandla yatshavbo nya vakhodwa nya va nya mayigo va ngu va bonga.

Vaefeso 5:16

Sayisani gwadi gikhati mu gu nagyo. Kholu matshigu ya muhuno ma vivbide.

Dhewuteronome 28:48

Khu guralo, u na thumela valala avo Pfhumu Nungungulu a na gu va rumela avbo gwago, va ta gu tshanisa khu ndzala, lidora, wuhagadzo ni wusiwana nya wukhongolo ngudzu; avo va na gu rwega kanga nya dzisimbi nya gulemele thamoni gwago, kala va gu mbembisa.

Jakobe 2:13

Gikhati Nungungulu a na gu lamulago, kha na tsetselela ava va ngamba tsetselela vakwawe, aholu, ava va nga tsetselelago vakwawe, kha va na ningwa nandru Litshigu nya Gulamudwe.