Mikeya 1:1 - Bhibhiliya Nya Guage

¹ Aya khu magana ya Pfhumu Nungungulu ma ngata ga Mikeya, wa Morasita, matshiguni ya Jotamo, vafumeli va Judha, na ma guta khu giwoniso a wonisidwego khu kotani ya Samariya ni Jerusalema.

Mikeya 1:1 Iomraidhean Croise

2 Dzipfhumu 15:32

Khu mwaga nya wuvili nya gufume ga Peka, mwamana wa Remaliya, mufumeli wa Israyeli, a di phela gufuma Jotamo, mwamana wa Uziya, mufumeli wa Judha.

2 Dzipfhumu 15:5

Pfhumu Nungungulu a di veta mufumeli Azariya, a dwala khu sokono kala litshigu a ngafago; a diya vbanyela vbavbandze nya nyumba nya vadwali nya sokono; aholu Jotamo, mwamana wa mufumeli, a di fumela ndranga ya mufumeli a lamula vathu va tigoni.

2 Dzipfhumu 16:1

Khu mwaga nya likhumi na livbandre na mivili nya gufume ga Peka, mwamana wa Remaliya, a di phela gufuma Akazi, mwamana wa Jotamo, mufumeli wa Judha.

2 Dzipfhumu 18:1

Khu mwaga nya wuraru nya gufume ga Ozeya, mwamana wa Ela, mufumeli wa Israyeli; a di phela gufuma Ezekhiya, mwamana wa Akazi, mufumeli wa Judha.

2 Dzikoronika 28:1

Akazi a diri ni magumavili myaga gikhati a phedego gufuma. Fumide likhumi na livbandre na moyo myaga Jerusalema. Kha nga thuma mithumo ya yadi mbeli ga Pfhumu Nungungulu, kha nga babe waye Dhavhidhe,

2 Dzikoronika 29:1

Ezekhiya a diri ni tanga nya magumavili na livbandre myaga gikhati a nga phelago gu fuma, fumide magumavili na livbandre na mina myaga Jerusalema. Mayi waye a di ranwa gupwani khu Abhiya, nyamahegyane wa Zakariya.

Isaya 1:1

Giwoniso gya Isaya, mwamana wa Amosi, a gi wonidego khu kotani ya Judha ni Jerusalema, matshiguni ya Uziya, Jotamo; Akazi; ni Ezekhiya; vafumeli va Judha.

Isaya 1:2

Yingisani, enu dzindzadzi, tula ndzeve, uwe litigo, kholu Pfhumu Nungungulu a ngu ganela, khuye: “Nyi velegide sanana nyi si dandrisa, aholu sa gu nyi wugela.

Isaya 7:1

Khu matshiguni ya Akazi, mwamana wa Jotamo, mwamana wa Uziya, mufumeli wa Judha. Rezimi, mufumeli wa Siriya, ni Peka, mwamana wa Remaliya, mufumeli wa Israyeli, va di gwela Jerusalema guya li dhumela. Aholu va diya tandrega gu li wandra.

Isaya 7:9

Samariya tsindza wa Efrayimi, mufumeli wa Samariya, khu mwamana wa Remaliya, aholu mwa gumba khodwa, khu lisine, kha mu na simama mu vbanya, gima kha mu na tiya.”

Jeremiya 26:18

Na nga gu fuma Ezekhiya, mufumeli wa Judha, muprofeti Mikeya wa Morasi, a hi profetide a ganela ga vathu vatshavbo va Judha, khuye: Pfhumu Nungungulu nya Tshivba Yatshavbo ganede kharati, khuye: Siyoni a na limwa nga lithembwe, Jerusalema a na vbindrugedza a khala litala nya marumbi, lina nya Nyumba ya Nungungulu li vbindrugedza li khala gigomo gi bhiyidwego khu likhabi.

Hoseya 1:1

Aya khu magana Pfhumu Nungungulu a nga embela Hoseya, mwamana wa Bheyeri, matshiguni ya Uziya, Jothamo, Akazi ni Ezekhiya, vafumeli va Judha, matshiguni ga Jerobhowamo, mwamana wa Jowasi, mufumeli wa Israyeli.

Hoseya 4:15

Uwe Israyeli, wa guvbweta gu gira wuphuphulu, u nga rwegi nandru va na Judha! Mu ngati Giligali, ambari gu gwelani muya Bheti-Avheni, na mu gu sambanya, khenu: Hi ngu sambanya khu Pfhumu Nungungulu a vbanyago.

Hoseya 8:14

Kholu Israyeli divaledwe khu Muvangi waye, a dzi vbahela dzinyumba nya dzikhongolo nya wufumu, Judha, a di engedzela madhoropa nya makhokhola; aholu eni nyi na rumela nilo madhoropani gwawe wu ya dagaredzisa dzinyumba dzawe dzatshavbo nya wufumu.”

Amosi 1:1

Magana ya Amosi, a nga bani nari moyo nya vahavisi va Tekowa, a ma wonidego khu giwoniso mayelano khu Israyeli, matshiguni ya Uziya, mufumeli wa Judha, ni matshiguni ya Jerobhowamo, mwamana wa Jowasi, mufumeli wa Israyeli, myaga mivili gu si gu manegi girevareva.

Amosi 6:1

Libango ga avo va vbanyago Siyoni na va khadzisegide, va dzipwago na va tiyide gigomoni gya Samariya, vathu nya guthavisege vbakari nya mayigo nya guhegule, mayigo ma tumbwago khu va na Israyeli!

Mikeya 1:5

Satshavbo si na girega khu kotani nya guyeyise ga Jakobe ni sighoho sa nyumba ya Israyeli, khu gevbini gighoho gya Jakobe? Ina khandri Samariya? Khu wevbini wulanga nya miphaso nya vanungungulu nya malipha va Judha? Khandri Jerusalema, gani?

Mikeya 3:9

Nga yingisani esi olu, enu vathangeli nya nyumba ya Jakobe, nenu vakhongolo nya litigo la Israyeli, mu nyenyago lisine mu hambanisa iso si lulamidego,

Habhakuka 1:1

Rwalo wu tuledwego gu wonwa khu muprofeti Habhakuka.

2 Pedro 1:21

Kholu, ma mwalo magana nya vaprofeti ma nga lowago khu gudzina nya muthu, aholu, vathu va di kutsedzedwa khu Liphuvbo nya Guage, va ganela Mahungu nya gute khu ga Nungungulu.