Josuwa 1:5 - Bhibhiliya Nya Guage

⁵ Matshigu yatshavbo nya guvbanye gwago mwalo a na tiyago gu ema mbeli gwago; kha nga idzo nyi giridego ga Mosi, nyi na gira gambe kharato avbo gwago; gima kha nyi na gu diga, ambari gu gu tshiya hwane.

Josuwa 1:5 Iomraidhean Croise

Genesi 39:2

Pfhumu Nungungulu a diri ni Josefa, a di mu gira a katega ga mithumo yaye tatshavbo, a gu hakhwa gwadi nyumbani ga mune waye nya Mugipiti.

1 Dzipfhumu 1:37

Kha nga olu Pfhumu Nungungulu a nga bani nari ni mufumeli, mune wangu, uye a na khale gambe ni Solomoni gasi uye a mane mufumo nya wudhumo, guvbindra mufumo wa mune wangu, Dhavhidhe.”

1 Dzipfhumu 11:38

Wa gu yingisa satshavbo nyi na gu rumago, u gimbila khu dzindzila dzangu, u thuma mithumo nya gululame mbeli gwangu, u sayisa milayo ni sileletelo sangu, kha nga idzo a giridego githumi gyangu Dhavhidhe, Eni nyi na bani nyiri nago, nyi na gu vbahela nyumba yi tiyidego, kha nga nyi vbahedego Dhavhidhe, ni gu gu ninga Israyeli.

1 Dzipfhumu 6:13

Nyi na vbanya vbakari ga sanana sa Israyeli, gima kha nyi diga vathu vangu va na Israyeli.

1 Dzipfhumu 8:57

Uwe Pfhumu Nungungulu wathu khala ni ethu, kha nga u khadego ni vababe vathu; Uwe u nga hi digi ambari gu hi divala!

1 Dzikoronika 28:20

Dhavhidhe a di embela mwanaye Solomoni, khuye: “Tiya longo u nga thavi gilo ni gu pilega hwambo, phara thumo; kholu Pfhumu Nungungulu wangu, a na bani ari nago, gima kha na nga gu diga ambari gu gu divala, kala u vbedza thumo watshavbo nya guvbahe Nyumba ya Pfhumu Nungungulu.

Dzindzimo 46:11

Pfhumu Nungungulu nya Tshivba Yatshavbo womo vbakari gwathu; Nungungulu wa Jakobe khuye wuthavelo wathu.

Ekisodha 3:12

Nungungulu a di mu hakha, khuye: “Khu lisine eni nyi na bani nyiri nago. Egi khu giwonegiso nya gupwani kheni nyi gu rumelago; hwane nya gu bani nu duside vathu vangu khu tigoni ga Egipito, mu nata khozela Nungungulu gigomoni momu.”

Isaya 42:16

Nyi na gimbidzisa sikhumu khu ndzila si si yitigo, nyi va gimbidzisa khu sindzilana nya gu gima kha sa nga gimbila khiyo, mbeli gwawe nyi na vbindrugedza gidema gi khala guwonegela, ni dzindzila nya sikhidinga dzi na guledzedwa. Silo sesi nyi na si gira satshavbo nyamba tshiya ni gimwegyo.

Jeremiya 1:8

U nga va thavi, kholu eni nyi nago gasi gu gu vbulugisa, a ngu ganela Pfhumu Nungungulu.

Dhaniyeli 11:16

Khu guralo, uye a natago guta mu sasela a na gira iso a si golago; nyamba himbedzwa khu muthu. A na bela Tigoni nya tshivba a li sasela.

Matewu 28:20

Va hevbudzeni gu landrisa satshavbo iso nyi nga mi hevbudzani. Gasi eni nyi na bani nyiri nanu gikhati gyatshavbo, kala guhegisani nya litigo.”

Varoma 8:31

Hi na khethu ginani khu silo sesi? Nungungulu a gu ema ni ethu, khu mani a na hi wugelago?

Varoma 8:37

Aholu ga satshavbo sesi, ethu hi pade khu tshivba ya wule a nga hi haladzago.

Dhewuteronome 20:1

Wa gu hongola litungatunu nya guye dwana nyimbi ni valala vago u wona dzikavalu, dzikareta ni vathu nya tengo nya wungi guvbindra uwe, u nga va thavi; kholu Pfhumu Nungungulu wago a nga gu dusago khu tigoni ga Egipito, a na ni uwe.

Dhewuteronome 20:4

kholu Pfhumu Nungungulu wanu, khuye a mi dwanelago ga valala vanu, gasi a mi vbulugisa.

Dhewuteronome 31:23

Khavbo avbo, Pfhumu Nungungulu a di leletela Josuwa, mwamana wa Nuni, a mu embela, khuye: Tiya longo u si vbeli tshivba; kholu khuwe u na vbohisago sanana sa Israyeli ga litigo nyi sambanyidego gu va ninga; gasi eni nyi na bani nyiri nago.

Dhewuteronome 4:31

khu guralo, Pfhumu Nungungulu wago, a gu Nungungulu nya wuhindzi, kha na diga gu gu tangadzisa, kha na gu mbembisa, gambe Uye kha na divala gidzumeledzwano a sambanyidego ga vababe vago.

Dhewuteronome 7:24

A na ningela gambe mandzani gwago vafumeli vawe, gasi uwe u fuvise malina yawe mafuni; mwalo ni moyo a na tiyago gu ema mbeli gwago, kala u va mbembisa.

2 Thimoti 4:17

Aholu, Pfhumu yi diri ni eni yi nyi ninga tshivba nya gutivise Mahungu maphya nya Yadi ma hakhwa khu va nya mayigo. Khu kharato, nyi vbulugide kanani nya nghala

Vahebheru 13:5

Guvbanyani gwanu mu nga dzi digi mu gu fumwa khu makolo nya dzitsapawu; nengelani khu esi mu gu naso, kholu Nungungulu ganede, khuye: “Eni gima kha nyi na mi diga.”

Josuwa 1:17

Hi na gu yingisa ga silo satshavbo, kha nga idzo hi giridego khidzo ga Mosi. Igyo hi gi vbwetago basi khu gukhethu Pfhumu Nungungulu wago a na khale ni uwe, kha nga idzo a khadego khidzo ni Mosi.

Josuwa 1:9

Gasi kha nya gu ruma, gani? Gukheni tiya longo ni gutimisela; u si thavi ambari guthuruga kholu Pfhumu Nungungulu wago, a na bani ari nago gwatshavbo umo u na gimbilago khumo.”

Josuwa 10:8

Pfhumu Nungungulu a di embela Josuwa, khuye: “U nga khali hwanga kholu vatshavbo nyi na va ningela mandzani gwago; mwalo na moyo wawe a na tiyago guta mbeli gwago.”

Josuwa 21:44

Pfhumu Nungungulu a di ninga gurula khu maphuvbo yatshavbo gukhedza khidzo a nga sambanyago khidzo ga vababe vawe; mwalo ni moyo ya valala vawe a nga bani na gu tiya mbeli gwawe; Pfhumu Nungungulu a di va ningela vatshavbo mandzani gwawe.

Josuwa 3:7

Pfhumu Nungungulu a di embela Josuwa, khuye: “Muhuno nyi na phela gu gu khusedza mbeli ga vatshavbo va na Israyeli, gasi va dziti nya gukhavo, kha nga nyi nga bani nyiri ni Mosi, kharato gambe nyi na bani nyiri nago.

Josuwa 6:27

Pfhumu Nungungulu a diri ni Josuwa, ndruma yaye yi di phalalega ni litigo latshavbo.

Valamuli 2:18

Gikhati Pfhumu Nungungulu a nga bani a va wusela valamuli, Uye a di gu khala ga moyo ni moyo nya mulamuli, a vbulugisa vathu vaye mandzani ga valala vawe, gikhatini gyatshavbo nya guvbanye ga mulamuli yoyo; kholu Pfhumu Nungungulu a di gupwa gisiro khu avo, khu tshanisa va nga bani va giredwa khu vatshanisi vawe.

Valamuli 6:16

Pfhumu Nungungulu a di mu hakha, khuye: “Eni nyi na bani nyiri nago, u na pala va na Medhiyani vatshavbo nga khwatshi wa gu pala muthu moyo basi.”

1 Samuweli 10:7

Avbo u na dugedwago khu siwonegiso sesi, gira satshavbo si lombwago gu girwa khu gikhati gyogyo, kholu Nungungulu a na ni uwe.