Jeremiya 32:17 - Bhibhiliya Nya Guage

¹⁷ Oh! Uwe Pfhumu Nungungulu wangu, khuwe u giridego ndzadzini ni mafuni khu tshivba yago nya yikhongolo ni libogo lago nya guthawuluge; avbo gwago gimwalo gi si kodzegigo.

Jeremiya 32:17 Iomraidhean Croise

Genesi 18:14

Ina gyomo gilo a gi tandregago Pfhumu Nungungulu, gani? Khu matshigu nya nga aya, mwaga wutago, nyi na wuya gambe khavba, Sara a na bani nari ni gyanana nya gikhwathana.

2 Dzipfhumu 19:15

A di ya lombelela mbeli ga Pfhumu Nungungulu waye, khuye: “Pfhumu Nungungulu wa Israyeli, u khalago vbatshani nya dzikerubhimi, uwe kamwe, khuwe u gu Nungungulu nya mifumo yatshavbo ya mafuni, uwe u giride ndzadzini ni mafuni.

2 Dzipfhumu 3:18

Aholu khandri iso basi mahoni ga Pfhumu Nungungulu, a na mi ningani gambe mandzani gwanu Mowabhi.

Nehemiya 9:6

Uwe Pfhumu khuwe basi, u giride gupindruga gwa ndzadzini gu khusegidego ngudzu, ni mabutho yatshavbo nya sivangwa saye, mafu ni satshavbo si guromo umo, yiphwa ni satshavbo si manegago umo; khuwe u vbanyisago sivangwa satshavbo, ni sivangwa sa ndzadzini si ngu gu khozela.

Joba 42:2

“Nyi ngu dziti gwadi gukheni khu padwi khu gilo, ni gimwegyo nya makungo yago kha gi thindrekiswi.

Dzindzimo 102:25

U tiyiside mafu gukhugela guhegulani; ni ndzadzini i thumo nya mandza yago.

Dzindzimo 136:12

a va dzegiside khu tshivba nya yikhongolo na khusedzide mandza, kholu lihaladzo laye li ngu simama kala gupindruga;

Ekisodha 20:11

Kholu, khu livbandre na limwedo matshigu, Pfhumu Nungungulu giride ndzadzi ni mafu, linene ni satshavbo si guromo umo, a gu hefemula khu litshigu nya livbandre na mavili. Khu kotani nya kharato, Pfhumu Nungungulu kategiside litshigu nya Sabhadho a li agisa.

Isaya 42:5

Khiso a ganelago Nungungulu, Pfhumu Nungungulu a giridego ndzadzini a gu ladza, a wumbidego litigo, ni mihandro yatshavbo yi dugago khumo; uye a ningago guvbanya vathu va guromo umo, ni hefemulo ga vathu va khalago umomo.

Isaya 44:24

Pfhumu Nungungulu, Mudzegisi wago, Oyu a gu wumbidego rumbuni ga mayi wago, a ngu ganela kharati, khuye: Eni kheni Pfhumu Nungungulu, nyi girago silo satshavbo, nyi giride ndzadzini, nyiri nyonga nyi ladza mafu, nyiri nyonga.

Isaya 45:12

Kheni nyi vangidego mafu nyi bwelo khavbo nyi vanga muthu, a vbanya umo; nyi thawuludzide ndzadzini khu mandza yangu, nyi ninga nayo mabutho yaye yatshavbo.

Isaya 59:1

Wonani nya gukhenu gyandza gya Pfhumu kha gya khwenyela nya gu tandrege guvbanyisa; ambari ndzeve yaye kha ya segega, nyamba kodza gupwa.

Jeremiya 1:6

Khavbo avbo, eni nyi di hakha, kheni: “Oh! Pfhumu Nungungulu! Wona nya gukhuwe kha nyi kodzi gu ganela; kholu eni nyi ngari gyanana.”

Jeremiya 14:13

Khavbo avbo, eni nyi di mu phindrula, kheni: “Oh! Pfhumu Nungungulu, wona nya gukhuwe vaprofeti va gu va embela, gukhavo: Gima kha mu na sasedwa khu matshari, ni gu wona ndzala; aholu a na mi resela gurula nya gutiye wulangani wowu.”

Jeremiya 21:2

“Hi ngu lomba gukhethu u hi wudzisela ga Pfhumu Nungungulu, kholu Nabhukodhonosori, mufumeli wa Bhabhiloni, a ngu soma nyimbi a hi sasela, mwendro saye Pfhumu Nungungulu a na hi girela siliwugiso gasi nala a khuge vbakari gwathu.”

Jeremiya 27:5

Eni nyi giride khu tshivba nya libogo langu, nyi vanga litigo, vathu ni sirengo si wonegago tigoni, nyi ngu si ningela ga wule nyi mu golago.

Jeremiya 32:27

“Wona nya gukhuwe Eni Pfhumu Nungungulu nya vathu vatshavbo; ina gyomo gilo nyi tandrwago khigyo gu gira, gani?”

Jeremiya 33:3

Nyi rane, eni nyi na gu ninga phindrulo, nyi na gu tivisa silo si sihadego, esi u si sitigo.

Jeremiya 4:10

Khavbo avbo, eni nyi di ganela, kheni: “Ah! Pfhumu Nungungulu! Khu lisine U kanganyiside vathu vava gumogo ni Jerusalema, khuwe: Va na mana gurula; nga wona olu matshari ma va payago kala vbamonyotunu.”

Jeremiya 51:15

Pfhumu Nungungulu, khuye a vangidego mafu khu tshivba yaye; khu guti gwaye a vangide litigo, khu mapimo yaye a fenengedzide ndzadzini.

Jeremiya 51:19

Aholu Nungungulu wa Jakobe, kha fanani ni vanungungulu vovo, kholu uye khuye Muvangi nya silo satshavbo, Israyeli lihundzu nya thomba yaye, lina laye khuye Pfhumu Nungungulu nya Tshivba Yatshavbo.

Ezekiyeli 11:13

Gikhati eni nyi nga bani nyi profeta, Pelatiya, mwamana wa Bhenaya, a difa. Khavbo avbo, nyi di khidzima nyi kuha mafu khu khovbe, nyi lila khu lito nya gukhugege, kheni: “Ah! Mune Pfhumu Nungungulu! Ina u na mbembisa mitshaledwa yatshavbo ya Israyeli, gani?”

Ezekiyeli 9:8

Gikhati va nga bani va gu songetela vathu, eni nyi di tshala nyenga. Nyi thega khu khovbe vbavbatshi, nyi lila, nyi ganela, kheni: “Uwe! Mune Pfhumu Nungungulu! Ina wa guvbweta gu guhula likhulo lago vbatshani ga Jerusalema, u vbedzisa mitshaledwa ya Israyeli, gani?”

Dhaniyeli 2:22

Uye a ngu tugudzisa silo nya guete niso si sihadego; khuye atigo iso si guromo gidemani guwonegela gwa gu khala avbo gwaye.

Dhaniyeli 6:20

Avbo a nga vbohago vbaphalatunu, a di rana Dhaniyeli khu lito nya wuvi. Mufumeli a di rana Dhaniyeli, khuye: “Dhaniyeli! Githumi gya Nungungulu a vbanyago! Ina Nungungulu u mu thumelago gikhati gyatshavbo a gu vbulugiside ga dzinghala, gani?”

Zakariya 12:1

Mahungu ya Pfhumu Nungungulu khu mahungu ya vathu va na Israyeli; Pfhumu Nungungulu a ladzago Ndzadzini, a wuya a emisa siseketelo nya mafu, a wumba hefemulo ndrani nya muthu, a ngu ganela kharati, khuye:

Zakariya 8:6

Pfhumu Nungungulu nya Tshivba Yatshavbo, a ngu ganela kharati, khuye: “Silo sesi a gu bani nari sa gusamadzisa guwonani ga mitshaledwa nya vathu vava khu matshigu yoyo, si na khala gambe gisamadziso mahoni gwangu, gani?” A ngu ganela Pfhumu Nungungulu nya Tshivba Yatshavbo.

Mitengo 11:23

Khu guralo, Pfhumu Nungungulu a di phindrula Mosi, khuye: “Ina tshivba ya Pfhumu Nungungulu yi di vbunguga, gani? Olu u na wona wabune gukhuwe esi nyi gu embelago si na girega mwendro kha si na girega.”

Matewu 19:26

Jesu a di khedzisa gwadi vatshavbo, a va embela, khuye: “Ga vathu kha si kodzegi, aholu ga Nungungulu satshavbo si ngu kodzega.”

Marko 10:27

Khavbo avbo, Jesu a di va khedzisa a gu va hakha, khuye: “Ga vathu kha si kodzegi, aholu ga Nungungulu si ngu kodzega, kholu, gwaye gimwalo gi si kodzegigo.”

Luka 1:37

kholu ga Nungungulu gi mwalo gi si kodzegigo.”

Luka 18:27

Jesu a di hakha, khuye: “Iso si si kodzwigo gu girwa khu vathu, si ngu kodzega ga Nungungulu.”

Mithumo 14:15

“Madhota, khu ginani mu gira esi! Ethu nethu hi vathu kha nga enu, hi na ni mavbanyelo mamowo ni enu, ha gu mi tivisa Ivhangeli gasi mu vbindrugedza mavbanyelo mu diga vanungungulu nya liphanga, mu khodwa ga Nungungulu a vbanyago, Uye a nga gira mafu ni ndzadzi, ni yiphwa ni satshavbo si guromo umo.

Mithumo 15:18

a ngu ganela Nungungulu a nga tulelago gu tidwa silo sesi khu myaga ya gale.’

Mithumo 17:24

Nungungulu a vangidego mafu ni satshavbo esi si guromo mafuni, a gu uye Pfhumu ya ndzadzini ni mafuni. Kha khali dzinyumbani nya gugirwe khu mandza nya vathu.

Gutuledwa 4:11

“Pfhumu Nungungulu wathu, u ngu yedwa khu gu hakha gidhumo, ni rungudzo ni tshivba, kholu khuwe Muvangi nya silo satshavbo; khu gudzina gwago u si vangide ni gu si tumbulugisa.”