Isaya 24:16 - Bhibhiliya Nya Guage

¹⁶ Gukhugela mahegiso nya litigo, hi pwide na gu embeledwa, gupwani: “Wudhumo ga uye a lulamidego!” Aholu eni nyari, kheni: Nyi vbede tshivba, nyi vbede tshivba! Libango langu! Valogovedzi, va ngu nyi logovedza! Kholu va gu logovedza, kha va garali khu nyi logovedza.

Isaya 24:16 Iomraidhean Croise

Isaya 21:2

Gu dita gwangu giwoniso nya gusamadzise ngudzu gi ta nyi embela, khigyo: “Mukanganyisi a ngu kanganyisa, ni muphangi a ngu phanga. Enu va na Elamo indrani mu ya dwana, enu Vamedhiyani, randrelani lidhoropa; dzihuwa dzawe dzatshavbo nyi ngu dzi vbedza.

Jeremiya 5:11

Kholu nyumba ya Israyeli ni ya Judha dzi di nyi wugela, a ngu ganela Pfhumu Nungungulu.

Isaya 33:1

Libango gwago, uwe muphangi, uwe gima u si gu phangwigo, u kanganyisago vakwanu avo gima va sa gu kanganyisago! Avbo uwe u na vbedzago gu phanga, u na phangwa nuwe, avbo u na vbedzago gu kanganyisa, va na gu kanganyisa nuwe!

Jeremiya 3:20

Pfhumu Nungungulu a ngu ganela, khuye: “Libango lanu enu va na Israyeli, kholu mwa gu fanana ni nyamayi a gumba tumbega ga mwama waye, enu nenu kha mwa tumbegani gwangu.

Gutuledwa 15:3

Dzi di embelela ndzimo ya Mosi, githumi gya Nungungulu ni ndzimo ya Nvutana, khidzo: “Pfhumu Nungungulu, nya Tshivba Yatshavbo, sigiro sago sikhongolo, si ngu liwugisa! Dzindzila dzago dzi lulamide, dzi na ni lisine, uwe Pfhumu nya mayigo.

Mithumo 13:47

Kholu Pfhumu a hi rumide, khuye: Eni nyi gu vegide kha nga wenengedzo nya mayigo gasi u khale ndzila nya guvbanyiswe gwawe kala mahegiso nya litigo.

Marko 13:27

A na rumela dzingilozi dzaye gasi guta tombanisa sihathwa sa maphuvbo yatshavbo ya mana, gukhugela mahegiso nya litigo kala mahegiso nya ndzadzi.

Habhakuka 1:3

Khu ginani u nyi yeyedza guvivba, ni gu nyi wonisa tshanisa? Kholu gumbembiswa ni gusasedwa somo mbeli gwangu; vomo gambe va wusago mayunga ni gu ganedzisana.

Mikeya 5:4

Uye a na simama a havisa vathu tshivbani ga Pfhumu Nungungulu, ni wugulu nya tshivba khu lina la Pfhumu Nungungulu waye avo va na khala mugurulani, kholu wugulu waye wu na vboha kala mahegiso nya litigo.

Hoseya 6:7

Avo va pide gidzumeledzwano kha nga Adhamu, va si tumbegi avbo gwangu.

Hoseya 5:7

Kha va tumbega ga Pfhumu Nungungulu; kholu va velegide sanana nya wubhayi. Olu Mibuzo yawe nya Gumege nya Ngima, yi na va mbembisa gumogo ni dzithomba dzawe.

Gililo 1:2

A gu lila khu wuvi wutshigu watshavbo; marongo ma goga khu sigundruni gwaye. Vbakari nya sigodwa saye, mwalo ni moyo a mu tangadzisago, dzipari dzaye dzi vbindrugedzide dzi khala valala vaye. Guimel

Jeremiya 12:6

Kholu ambari ni vandriyago gumogo ni ndranga ya babe wago, avo navo va gu logovedzide; avo kamwe va ngu gu lundra na va gu gira ligwaha nya likhongolo. Ambari va gu gu sengedzela khu silo nya gumbure u nga va tumbi.

Isaya 60:21

Vathu vatshavbo va tigoni gwago va na bani vari vathu nya gululame, va na lumbwa khu litigo kala gupindruga; avo va na bani vari pfhundre nyi wu yadego, thumo nya mandza yangu gasi va fela gu wonegisa wudhumo wangu.

Isaya 52:10

Pfhumu Nungungulu funungude libogo laye nya guage mbeli ga mayigo yatshavbo; ni mahegiso nya litigo va na wona guvbanyisa ga Nungungulu wathu.

Isaya 48:8

Gima u di si gu sipwi, ambari gu si pima, gukhugela gale dzindzeve dzago dzi di bani dzi si gu tulegi; kholu nyi di gu si pima gukheni kha wa tumbega ngudzu, gukhugela rumbuni ga mayi wago, wa gu tidwa pwani u gindragamilayo.

Isaya 28:5

Ga litshigu lolo, Pfhumu Nungungulu nya Tshivba Yatshavbo a na khala gihugu nya wuzundzo ni wumburi ga mitshaledwa nya vathu vaye.

Isaya 26:15

Gambe, uwe Pfhumu Nungungulu, u engedzede vathu vava, u va engedzede va tala va gu ambagiside wudhumo, u andriside mivbingano nya litigo lawe latshavbo.

Isaya 17:4

Khu litshigu lolo, wudhumo wa Jakobe wu na vbungudwa, a na wondra a tshala khu marambo.

Isaya 10:16

Khu guralo, Pfhumu Nungungulu nya Tshivba Yatshavbo, a na rumela tungu ga vathu, wu ta wondrisa sitetema satshavbo sa Asiriya; vbavbatshi nya thomba yawe wu na dzura nilo, kha nga uye a vbiswago khu nilo.

Dzindzimo 106:15

Nungungulu a di va ninga esi va nga lomba, aholu a di va tsayisa khu ngumbe nya gusonge.

Dzindzimo 98:3

Alakanyide lihaladzo ni gutumbega gwaye ga ndranga ya Israyeli, dzitshokani nya litigo gu wonidwe guvbanyisa ga Nungungulu wathu.

Dzindzimo 67:7

Nungungulu a na hi kategise, mafuni gwatshavbo va na gu ninge githawo.

Dzindzimo 58:10

Muthu nya gululame a na nengela a gu wona na va gu phodzedwa va nya guvivba; a na hamba migondro novbani gwawe.

Dzindzimo 2:8

Nyi lombe nyi na gu ninga mayigo ma khala thomba yago, mafu yatshavbo ma na lumba uwe.

Ekisodha 15:11

Khu mani a fananago nago, Uwe Pfhumu Nungungulu vbakari ga vanungungulu vatshavbo? Khu mani nya gungangamele gu fanana ni Uwe, a fanedego gu thawa ni gu rungudzwa? U giride siliwugiso.

Jeremiya 12:1

Uwe Pfhumu Nungungulu u lulamide, kha nyi dzi kodzi gu ganedzisana nago; ambari ulo, nyi na ni mahungu nyi vbwetago gu gu wudzisa, kheni: Khu ginani va nya guvivbedwa khu monyo va andrago mithumoni gwawe? Khu ginani vatshavbo va girago guvivba, gikhati gyatshavbo va vbanyago na va tangade?

Levhi 26:39

Va na gyanu, vale va na gu vbulugago, va na mbembiswa khu manyala yawe ni ya vababe vawe tigoni ga valala vawe.

Dzindzimo 65:8

Ni ava va vbanyago mayigoni ya mahegiso nya mafu, va ngu samala siliwugiso nya mithumo yago; gukhugela Khugadambo kala Muhwadambo, gu pwala mikulungwane nya gutsake.

Dzindzimo 119:158

Nya gu wona vakanganyisi nya gu saniseka ngudzu, kholu, kha va vegisi magana yago.

Isaya 11:12

A na khusedza ngavbya vbakari nya mayigo, a tombanisa avo va nga vbagedwago va Israyeli, a wuyisela avo va nga phalalegago va Judha, gukhugela dzikhonani dzatshavbo dza dzina nya litigo.

Isaya 42:10

Embani ga Pfhumu Nungungulu ndzimo nya yiphya, mu mu dhumisa gukhugela mahegiso nya mafu, enu mu gimbilago vbatshani nya linene ni satshavbo si guromo umo, enu sidwa gumogo ni vavbanyi vaye.

Habhakuka 1:13

Maho yago ma agide ngudzu ma si goligo gu wona guvivba, ma si tsakiswigo khu gu wona dzitshanisa, khu ginani u wonago va nya guvivbedwa khu monyo u degula, avbo uye nya guvivbedwe khu monyo, a midzago oyu a mu vbindrago khu gululama, na?

Isaya 6:5

Khavbo avbo, nyi di ganela, kheni: “Libango langu! Nyi fude! Kholu nyi muthu nya likana nya gunyenyeze, nyi vbanyago vbakari ga vathu nya gunyenyeze, maho yangu ma wonide Mufumeli, Pfhumu Nungungulu nya Tshivba Yatshavbo!”