Dzindzimo 5:7 - Bhibhiliya Nya Guage

⁷ Gasi eni, khu lihaladzo lago nya likhongolo, nyi ngu bela nyumbani gwago; nyita khidzima nyi gu khozela khu githawo nyumbani gwago nya gukatege.

Dzindzimo 5:7 Iomraidhean Croise

1 Dzipfhumu 8:35

Ndzadzini gwa gu segega, ndzadzi yi siwi, khu kotani nya gughohe gwawe, avo va guta lombelela ga wulanga wowu, va dhumisa lina lago, va diga sighoho va giridego khu gu bani u va tsayiside,

1 Dzipfhumu 8:38

nombelo watshavbo ni gulila gwatshavbo u na giredwago khu moyo mwendro khu vathu vatshavbo va na Israyeli, muthu ni muthu a giti gighoho a giridego khu monyoni gwaye, a khusedza mandza yaye ma khedza nyumbani momu;

Dzindzimo 101:7

Muthu nya gidambane kha na mana wulanga nyumbani gwangu, ni oyu nya guganele malipha, kha na ema mbeli gwangu.

Dzindzimo 130:4

Aholu avbo gwago u ngu kodza gu divalela avo va gu ningago githawo.

Dzindzimo 132:7

Hi na bele nyumbani gwaye nya guage; hi na khidzime mbeli nya gigandredzelo nya migondro yaye.

Dzindzimo 138:2

Nyi na khidzima nyumbani gwago nya guage nyi rungudza lina lago khu wuwadi ni lisine lago; kholu u dandriside situmbiso sago vbatshani nya sigiro satshavbo.

Dzindzimo 28:2

Yingisa lito langu nya gudilele gikhati nyi lilago avbo gwago, gikhati nyi khusedzago mandza, Pfhumu Nungungulu nyi nonedze wulanga wago nya guage ngudzu.

Dzindzimo 34:17

Va nya gululama va gu lila, Pfhumu Nungungulu a gu yingisa, a va tshula sigaradzoni sawe satshavbo.

Dzindzimo 51:1

Nyi pwele wusiwana, Nungungulu, khu lihaladzo lago; futa sighoho sangu, khu wuhindzi wago nya wukhongolo.

Dzindzimo 52:8

Gasi eni, nyi na gira kha nga ngure nya gunyuge, Nyumbani ga Nungungulu; nyi ngu tumba wuhindzi wa Nungungulu matshigu yatshavbo kala gupindruga.

Dzindzimo 55:16

Khu guralo, eni nyi na lombelela ga Nungungulu, Pfhumu Nungungulu a na nyi vbulugisa.

Dzindzimo 69:13

Gasi eni, Pfhumu Nungungulu, nya guta gwago khu nombelo; nyi hakhe uwe Nungungulu khu wuhigo wago nya wukhongolo; nyi vbulugise kha nga u nyi tumbisidego,

Dzindzimo 69:16

Uwe Pfhumu Nungungulu, nyi hakhe, kholu lihaladzo lago khyadi ngudzu; nyi wone khu wuwadi wago nya wungi.

Mavingu 6:16

Somo livbandre na gimwegyo silo a si vengago Pfhumu Nungungulu, nya livbandre na sivili si gorosago hefemulo waye, a gu esi:

Mavingu 6:17

Maho nya gu dzi gugumugise, lidimi nya guganele malipha, mandza ma vbaladzago novba nyambana nandru,

Isaya 55:7

Muthu nya guvivbedwe khu monyo a na dige ndzila yaye nya guwegele, ni oyu nyamba lulama a na dige mipimiso yaye; a na vbindrugedze mavbanyelo a wuya ga Pfhumu Nungungulu, uye a na mu pwela gisiro, wuyani ga Nungungulu wathu, kholu tade khu wuhindzi ni gutsetselela.

Isaya 64:11

Nyumba yathu nya wumburi nya guage, umo vababe vathu va nga bani va gu dhumisa umo, yi vbisidwe; sombo sathu satshavbo nya lisima si khungumuledwe.

Dhaniyeli 6:10

Avbo Dhaniyeli a ngapwago gupwani gu hungidwe nayo yoyu, a di hongola gaya gwaye, aya bela makhuvini gwaye, nyumbani ga gitezi, na gu tudwe sihogo si nga bani si khedzide phuvbo ga Jerusalema, a di lombelela nyondro tharu khu litshigu na khidzimide khu dzikhungumudzi, a bonga Nungungulu waye, nga idzo a nga bani na gu gira khu gale.

Hoseya 3:5

Khu hwane nya ugo, va na Israyeli va na wuya va vbindrugedza va vbweta Pfhumu Nungungulu wawe, ni Dhavhidhe mufumeli wawe. Khu matshigu nya guhegise va na hidzimela na va gu ndrendremela ga Pfhumu Nungungulu, va hakha sikategiso nya wuwadi waye.

Mithumo 9:31

Libandla li di gu vbanya khu gu rula Judheya gwatshavbo, ni Galileya ni Samariya; Li diya na li gu dandra ni githawo ga Nungungulu, na li gu tiyiswa khu tshivba nya Liphuvbo nya Guage.

Vahebheru 4:16

Khavbo avbo, hongoleni hi tiye hi hidzimela vbagikhalotunu nya wufumu wa Nungungulu nya gutale khu wuhigo, avbo hi na ya manago guvbanya ni gu phasedzedwa hi gu vbwetago gikhati gyatshavbo.

Josuwa 24:15

Aholu mwa gu si wona siri sadi gu khozela Pfhumu Nungungulu, hathani muhuno khu mani mu yelago gu mu thumela: Vanungungulu va nga khozedwa khu vababe vanu na vari khisikheyi nya tsongo wa Ewufrate, mwendro vanungungulu va Vaamori mu vbanyago tigoni gwawe. Gasi eni ni ndranga yangu hi na khozela Pfhumu Nungungulu.