Dzindzimo 30:11 - Bhibhiliya Nya Guage

¹¹ U vbindrugedzide gililo gyangu khu gutsaka; U nyi tshude gilendra, u nyi ambagisa mwendra nya gutsake.

Dzindzimo 30:11 Iomraidhean Croise

Genesi 37:35

Sanana saye satshavbo nya vama ni vanyamayi si di dzi garadza khu gu vbweta gu mu tangadzisa, aholu uye a di bomba gutangadziswa, a ganela, khuye: “Ahihi! Nyi na lila gyanana gyangu kala nyi ya manana nagyo thowoni!” Khu kharati, babe waye a di simama a mu lila.

Genesi 45:28

Israyeli a di nengela a ganela, khuye: “Gyanana gyangu Josefa gi ngu vbanya! Basi, nyi eneledwe. Nyi na ya mu wona na nyi si gufi.”

2 Samuweli 6:14

Dhavhidhe a di hana khu tshivba yaye yatshavbo mbeli ga Pfhumu Nungungulu na ambade efodhe nya seda.

2 Dzikoronika 20:12

Oh, Pfhumu Nungungulu wathu! Ina kamwe khu na va lamula, gani? Kholu ethu hi mwalo tshivba nya gu dwane ni mwandra yoyu nya wukhongolo wutago guta hi dwanisa; olu ni gilo nya gugire kha hi giti; maho yathu ha gu ma vega mbeli gwago.”

2 Dzikoronika 20:3

Josafati a di khala hwanga, aya lombelela ga Pfhumu Nungungulu, a laya va na Judha vatshavbo gukhuye va hala, nyamba hodza gilo.

2 Dzikoronika 20:9

Ha gu dugeledwa khu libango nya gukari, nya nga nyimbi, gutsayiswa, tungu, mwendro ndzala, satshavbo hi nata si bikela nyumbani momu mbeli gwago, kholu lina lago lomo nyumbani momu, gutshanisekani gwathu hi na ta lila avbo gwago Uwe U hipwa, U hi vbanyisa.

Nehemiya 8:10

Nehemiya a di va embela gambe, khuye: “Indrani mu ya hodza dzinyama nya gunone, mu sela ni wadwa nya gutshambe ni gulombela, mu rumela navo guhodza vale va ngamba dzi dongisela; kholu litshigu leli nya likhongolo li agisedwe Pfhumu Nungungulu; mu nga garadzegi kholu; litsako la Pfhumu khilo li gu tshivba yathu.”

Esiteri 9:22

Khayo matshigu yaya Vajudha va nga dzi tshudzisago khayo ga valala vawe, khuye ngima, gutshaniseka gwawe ni gulila gu vbindrugedzidego gu khala matshigu nya mibuzo ni gutsaka; va leletiswa gupwani matshigu yaya va ma gira mari ya mibuzo nya gunengele ni gutsaka, ni gu rumelana dzisagwati khu gyawe, ni gu ninga giphaso sisiwana.

Dzindzimo 149:3

Va na dhumise lina laye khu gu hana, va embelela na va gu womba sitendre ni dzingoma.

Dzindzimo 150:4

Mu dhumiseni khu dzingoma ni guhana; mu dhumiseni khu mihwambi ni misengele.

Dzindzimo 27:7

Yingisa Pfhumu Nungungulu lito nya nombelo wangu, nyi pwele gambe wuhindzi u nyi hakha.

Dzindzimo 30:5

Kholu likhulo laye kha li hweli guvbindra; makategwa yaye ma gu pindruga gikhati gyatshavbo, vbasilambotunu, gu manega gililo, vbadzimindrutunu, gu wuga gutsaka.

Dzindzimo 4:7

U thede gutsaka nya gungi monyoni gwangu guvbindra avo va gu nago; va fumago sivbila ni vbinyu.

Muhevbudzi 3:4

gikhati nya gulile, ni gikhati nya guhege; gikhati nya wuvi, ni gikhati nya gughiye khu gutsaka;

Isaya 25:3

Khidzo kharato, vathu nya dzitshivba va na gu dhumisa; lidhoropa nya tsindza wa va nya mayigo nya dzihanyi li na gu ninga githawo.

Isaya 25:8

A na fuvisa gufa kala gupindruga; Mune Pfhumu Nungungulu a na bavbula marongo dzikhovbeni gwatshavbo, a na dusa dzitshoni ga vathu vaye mafuni gwatshavbo, kholu Pfhumu Nungungulu ganede kharato.

Isaya 61:10

Nyi na nengela ngudzu ga Pfhumu Nungungulu, hefemulo wangu wu na tsakela Nungungulu wangu; kholu a nyi ambagiside guambala nya guvbanyise, a nyi fenengedza khu mwendra nya gululame. Gukhwatshi khu mudzegi a dzi mburisedego khu gihugu nya buzo, kha nga nyamayi nya khundzwa a dzi mburiselago khu dziphera nya ndralama.

Isaya 61:3

Ni gu degudza vatshavbo vale va lilago va Siyoni, ni gu va ambagisa gihugu wulangani nya nguma, ni mafura nya gutsake, wulangani nya gililo, ni ngandzu nya wuzundzo, wulangani nya wuvi; gasi va ranwe gupwani misimbo nya gululame, yi yadwego khu Pfhumu Nungungulu gasi gu dzi dhumisa khiyo.

Jeremiya 31:4

Eni nyi na gu vbahedza nyaluphye, uwe likendzi la Israyeli! U na wusedzwa! U bwelo khavbo u mburisedwa khu dzingoma dzago, u duga ni dzindzimo u ya hana ni avo va tsakago.

Jeremiya 52:33

A di mu tshula dzingandzu nya wubotshwa waye, a di hodza vbamezatunu gumogo ni mufumeli, matshigu yatshavbo nya guvbanye gwaye.

Luka 15:22

Aholu babe wule a di ruma sithumi saye, khuye: ‘Resani khu guvbiredza ngandzu yile nya gumbure ngudzu muta mu ambagisa; mu ambagiseni phera nyalani ni silato migondroni gwaye.

Johane 16:20

Khu lisine, nyi ngu mi embelani, kheni: Mu na lila ni gusaniseka, aholu litigo li na tsaka. Gani olu gusaniseka gwanu gu na vbindrugedza gu khala litsako.

Gutuledwa 21:4

Uye a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi, kholu dzitshanisa dza gale dzi vbindride.”