Dzindzimo 24:6 - Bhibhiliya Nya Guage

⁶ Oyu khu melana nya ava va vbwetago Pfhumu Nungungulu, ava va vbwetago khovbe yago, uwe Nungungulu wa Jakobe.

Dzindzimo 24:6 Iomraidhean Croise

Dzindzimo 105:4

Vbwetani Pfhumu Nungungulu ni tshivba yaye; mu vbweta khovbe yaye gikhati gyatshavbo.

Dzindzimo 22:30

Melego wawe wu na mu thumela; va na tivisa Pfhumu ga mimela ni mimelana yi nga gutago.

Dzindzimo 27:8

Monyo wangu wu ngu nyi embela, khuwo: “Vbweta khovbe yaye.” Khu guralo, nyi na vbweta khovbe yago Pfhumu Nungungulu.

Dzindzimo 73:15

Nari pwani nyi di landrisela maganelelo yawe, na nyi khulugiside vathu vago.

Isaya 53:10

Khu guralo, Pfhumu Nungungulu a di tsakiswa khu gu mu lemedza khu sigaradzo; a ningela womi waye gasi gu girwa mhamba nya guhandze sighoho, a na wona livelego laye, ni guvbanya matshigu nya gulaphe; khu mandzani gwaye gu na tadzisega gugola ga Pfhumu Nungungulu.

Johane 1:47

Jesu, na wonide Natanayeli na gu hidzimela, a di khuye: “Oyu khuye a gu wa na Israyeli nya guvbelele, gwaye wu mwalo wukanganyisi.”

Varoma 4:16

Khu kharato, thomba ha gu yi mana khu gukhodwa. Kharati, gitumbiso gi na ni giphaso ga satshavbo sanana sa Abrahama, nasiri basi ga vale va landrisago Nayo, aholu, ga vatshavbo va khodwago ga Nungungulu nga edzi Abrahama a nga khodwago khidzo. Khidzo kharati a gu babe wa ethu hatshavbo khu gukhodwa.

1 Pedro 2:9

Aholu, enu mu lifumbu li hathidwego, mu vaphasi va Pfhumu, mu lihundzu li agisedwego Nungungulu, mu vathu mu lumbago uye. Enu mu hathidwe gasi mu huwelela tshivba ya Nungungulu, a mi ranidego mu duga gidemani, muta wenengedzoni gwaye nya gusamadzise.