Dzindzimo 17:15 - Bhibhiliya Nya Guage

¹⁵ Gasi eni, khu lisine, nyi na wona khovbe yago; gikhati nyi wugago nyi na khura khu gu wona giyemo gyago.

Dzindzimo 17:15 Iomraidhean Croise

Joba 14:12

kharato nugo muthu a ngu lala a si wugi, ndzadzini gu si manegi gambe, uye kha na khendzuga, ambari gu wuga khu ligovbeni gwaye.

Dzindzimo 11:7

Kholu Pfhumu Nungungulu lulamide, a gu gola gululama; va nya myonyo nya yadi, va na wona khovbe yaye.

Dzindzimo 119:111

Milayo yago yi khade thomba yangu kala gupindruga, kholu yi ngu tsakisa monyo wangu.

Dzindzimo 16:11

U na nyi yeyedza ndzila nya guvbanye, nyi na tala khu gutsaka mbeli gwago, nyi napwa gutshamba nyamudye gwago kala gupindruga.

Dzindzimo 49:14

Va gu fanana ni dzinvuta dzi dongisedwago lithowo; muhavisi wawe khu lufu, va na vbiredza gu relela thowoni avbo givili gyawe gi na guya tsagudzedwa; avo va na vbanyela thowoni.

Dzindzimo 5:7

Gasi eni, khu lihaladzo lago nya likhongolo, nyi ngu bela nyumbani gwago; nyita khidzima nyi gu khozela khu githawo nyumbani gwago nya gukatege.

Dzindzimo 65:4

Kategide muthu u mu hathago a hidzimela vbafuvbi gwago, gasi guta vbanya nyumbani gwago, ethu nethu hi ngu nengela khu esi nya sadi sa Nyumbani gwago nya guage.

Isaya 26:19

Vafi vago va na bwelo khavbo va vbanya, si na duga khu marowoni sirumbi sa vathu vago, wugani mu ghiya, enu mwatshavbo mu ladego umo nya kudzudzwane nya mafu, kholu thondrwane yago uwe Pfhumu Nungungulu, ya gu fanana ni thondrwane nya guvbanyise mitongwe, kholu mafu ma na bwelo khavbo ma dusa vale va fudego.

Jeremiya 31:26

Khu guralo, nyi di khendzuga nyi wona, ligovbe langu li di nyi tsakiside ngudzu.

Mitengo 12:8

Uye nya gu ganela naye likana khu likana, khovbe ni khovbe, nasiri khu sipimaniso; kholu uye a ngu wona mufananiso wa Pfhumu Nungungulu. Olu, khu ginani mu ngamba thava gu lemba githumi gyangu Mosi, na?”

Matewu 5:6

Va kategide vale va gu ni ndzala ni lidora nya ndruda, kholu va na khuriswa.

2 Vakorinto 3:18

Ethu hatshavbo na hi funungude khovbe, hi khedza libona nya wudhumo wa Pfhumu hi ngu vbindrugedza khu wuzundzo ni wudhumo, hi fanana Naye, hi khedziga gikhati gyatshavbo khu tshivba nya Liphuvbo la Pfhumu.

Vafilipi 3:21

Uye a na vbindrugedza givili gyathu nya gusolege a gi gira gi fanana ni givili gyaye nya gungangamele, khu tshivba a fumago khiyo siloni satshavbo.

Josuwa 24:15

Aholu mwa gu si wona siri sadi gu khozela Pfhumu Nungungulu, hathani muhuno khu mani mu yelago gu mu thumela: Vanungungulu va nga khozedwa khu vababe vanu na vari khisikheyi nya tsongo wa Ewufrate, mwendro vanungungulu va Vaamori mu vbanyago tigoni gwawe. Gasi eni ni ndranga yangu hi na khozela Pfhumu Nungungulu.

Gutuledwa 21:23

Lidhoropa lakone khali vbweti lidambo, ambari ngima gu wenengedza, kholu la gu wenengedzwa khu wudhumo wa Nungungulu, wenengedzo waye khu Nvutana.