1 Samuweli 5:3 - Bhibhiliya Nya Guage

³ Aholu, avbo va nga wugago vathu va Asidhodhi, ni mambagugya khu litshigu li landrelago, va di wona Dhagoni na thegide a tsitsa khu khovbe mafuni, mbeli nya Ngasa ya Pfhumu Nungungulu; va di mu wusa vaya mu vega gambe vbawulangani gwaye.

1 Samuweli 5:3 Iomraidhean Croise

1 Dzipfhumu 18:26

Va di dzega kuzi yoyo va nga ningwago, va yi pilela; va phela gu lombelela khu lina la Bhahali gukhugela ni dzimindru kala ni vbakari nya mihani, khavo: “Bhahali hi ninge phindrulo!” Aholu, kha va ngapwa ni lito, ambari muthu nya gu va ninge phindrulo. Va di hana ni gu ndraga ndraga va dzuwulugela giluvelo va nga bani va giride.

Dzindzimo 115:7

Si na ni mandza, aholu kha si phari gilo; ni migondro si nayo, aholu kha si gimbili; migoloni gwawe gu mwalo lito nya guganele!

Dzindzimo 97:7

Va na thedwe dzitshoni avo va khozelago sifananiso nya guvatwe, avo va dzi khusedzago khu gu khozela sifananiso, va na khidzime mbeli gwaye vanungungulu vatshavbo.

Ekisodha 12:12

Ni wutshigu wowo, nyi na vbindra tigoni ga Egipito, nyi na songa satshavbo sanana nya matiwula ya tigoni ga Egipito, nya vathu ni sifuyo; nyi na lamula vanungungulu vatshavbo va Egipito. Eni kheni Pfhumu Nungungulu!

Isaya 19:1

Gitiviso khu litigo la Egipito: Wonani gukhenu, Pfhumu Nungungulu, a nguta na khilede vbatshani nya lipfhi nya mazambo, ata tigoni ga Egipito. Sifananiso nya vanungungulu va Egipito, si na ndrendremela mbeli gwaye, ni myonyo ya Vagipiti yi na ghavata ndrani gwawe.

Isaya 40:20

Uye a hamugago, a gu hatha simbo nyamba hina a dzi hathela meseri a wutigo gwadi thumo, guta mu vatela gifananiso gi na gumba tsekatseka.

Isaya 41:7

Muvati a gu tiyisela mupfhuli nya ndralama; wule a bethago khu gikhokhotho, a gu tiyisa gilo nya gubethwe. Va gu zundza thumo wowu, khavo: “Wu giridwe gwadi!” Khu hwane, va gu gi tiyisa khu dzikhogo gasi gi si ngudangudi.

Isaya 46:7

Va mu vbagara magatani gwawe, va gu gimbilagimbila naye, ni avbo va mu vegago a gu khala avbo nyamba dzi khuta; ambari va mu girela nombelo, uye kha phindruli gilo; gambe kha vbulugisi ni moyo musigaradzoni gwaye.

Jeremiya 10:8

Aholu vatshavbo va dhadhavade va vbindrugedza va khala sipumbu; kholu vanungungulu vawe va di girwa khu misimbo.

Sofoniya 2:11

Pfhumu Nungungulu a na thisa vbakari gwawe, kholu a na fuvisa vbakari gwawe vanungungulu vatshavbo va mafuni; vatshavbo va nata mu khozela, muthu ni muthu gukhugela tigoni gwawe, ambari sidwa sa hwindzo ni lihundzu lawe.

Marko 3:11

Maphuvbo nya guvivbe nayo, ma gu mu wona, ma di khidzima mbeli gwaye ma gu ganela, khayo: “Uwe khuwe Mwamana wa Nungungulu.”

1 Samuweli 6:1

Ngasa ya Pfhumu Nungungulu yi khade tigoni ga Vafilisitiya gipimo nya livbandre na mivili migima.

1 Samuweli 6:5

Khu guralo, girani sifananiso nya sithunya ni magondzo ma saselago litigo lanu, mu ninga wudhumo ga Nungungulu wa Israyeli; khu guralo, Uye a na dusa gyandza gyaye vbatshani gwanu, ga nungungulu wanu ni ga litigo lanu.