1 Samuweli 20:13 - Bhibhiliya Nya Guage

¹³ Babe wangu a gu vbweta gu gu girela guvivba, eni nyi si gu tivisi, nyi si gu digi u hongola khu gurula, Pfhumu Nungungulu a na nyi tsayise khu tshivba ni tshivba. Pfhumu Nungungulu a na khale ni uwe kha nga idzo a khadego khidzo ni babe wangu.

1 Samuweli 20:13 Iomraidhean Croise

2 Samuweli 19:13

Embelani Amasa khenu gasi uwe khundri marambo yangu, ni nyama yangu, gani? Nungungulu a na nyi tsayise ngudzu, uwe wa gumba emiswa gu khala muthangeli nya nyimbi mbeli gwangu kala gupindruga, wulangani wa Jowabhi.”

2 Samuweli 3:35

Khavbo avbo, vathu vatshavbo va di ta khongotela Dhavhidhe gukhavo a na hodze guhodza na gu ngari mihani; aholu mufumeli a di sambanya, khuye: “Pfhumu Nungungulu a na nyi tsayise khu tshivba nya gu hodza gibaba, mwendro gilogyogyo, na li si gu pfoli lidambo.”

2 Samuweli 7:15

aholu kha nyi na dusa lihaladzo langu avbo gwaye, kha nga idzo nyi giridego ga Sawule, nyi mu dusidego mbeli gwangu.

1 Dzipfhumu 1:37

Kha nga olu Pfhumu Nungungulu a nga bani nari ni mufumeli, mune wangu, uye a na khale gambe ni Solomoni gasi uye a mane mufumo nya wudhumo, guvbindra mufumo wa mune wangu, Dhavhidhe.”

1 Dzipfhumu 19:2

Khavbo avbo, Jezabheli a di rumela mwango guya embela Eliya, khuye: “Vanungungulu va na nyi songe, gya gu vboha gikhati gegi mindru na nyi si gu giri womi wago nya nga edzi uwe u giridego uwo wa vaprofeti.”

1 Dzipfhumu 20:10

Bheni-Hadhadhi a di engedza a rumela myango guya embela Akabi, khuye: “Vanungungulu va na nyi vete khu tshivba nya yikhongolo, kudzudzwane wa Samariya wa gu enedza gu tadza mandza ya vadwani nya nyimbi va nyi landrelago.”

1 Dzikoronika 22:11

Gasi olu mwanangu, Pfhumu Nungungulu a na khale ni uwe, gasi u katega, u kodza gu vbaha Nyumba ya Pfhumu Nungungulu wago, kha nga idzo a gu tumbisidego khidzo.

1 Dzikoronika 22:16

Ndralama, parata, sugu ni simbi nyamba sayedwa tengo somo mandzani gwago, phara thumo, Pfhumu Nungungulu a na khale ni uwe!

Matewu 28:20

Va hevbudzeni gu landrisa satshavbo iso nyi nga mi hevbudzani. Gasi eni nyi na bani nyiri nanu gikhati gyatshavbo, kala guhegisani nya litigo.”

Vafilipi 4:9

Guvbanyani gwanu thumisani esi mu hevbudego gwangu, esi mu nyi pwidego na nyi gu ganela ni esi mu nyi wonego na nyi gu gira, kharati, gurula ga Nungungulu gu na khala ni enu.

Josuwa 1:5

Matshigu yatshavbo nya guvbanye gwago mwalo a na tiyago gu ema mbeli gwago; kha nga idzo nyi giridego ga Mosi, nyi na gira gambe kharato avbo gwago; gima kha nyi na gu diga, ambari gu gu tshiya hwane.

Rute 1:17

Avbo u na felago avbo, a neni nya gu vbweta gufela avbo, nyi dzingwa avbovbo neni. Pfhumu Nungungulu a na nyi tsayise ngudzu, gambe a engedzela nya gukala nyi dzumela silo nya nga esi, gu nyi hambanisa nago vbavbandze nya lufu.

1 Samuweli 10:7

Avbo u na dugedwago khu siwonegiso sesi, gira satshavbo si lombwago gu girwa khu gikhati gyogyo, kholu Nungungulu a na ni uwe.

1 Samuweli 14:47

Avbo Sawule a nga dzega mufumo wa Israyeli, a di dwana ni valala vaye vatshavbo va nga bani va mu randrede a gu ava: Vamowabhi, Vaamoni, Vaedhomi, vafumeli va Zobha ni Vafilisitiya; gwatshavbo umo a nga bani a gimbila a dwana a di wuya na dugelede.

1 Samuweli 17:37

Pfhumu Nungungulu a nyi vbulugisidego mandzani nya nghala ni mandzani ga gikankanka, a na nyi vbulugisa gambe mandzani ga Mufilisitiya yoyo.” Khavbo avbo, Sawule a di embela Dhavhidhe, khuye: “Gimbila, Pfhumu Nungungulu a na khale ni uwe.”

1 Samuweli 18:12

Khavbo avbo, Sawule a di phela gu thava Dhavhidhe, kholu Pfhumu Nungungulu, a di mu digide, a ema ni Dhavhidhe.

1 Samuweli 19:3

Eni nyi na duga gumogo ni babe wangu hita ema vbafuvbi ni khabini u na gu bani u sihade umo. Nyi na ganela khu mahungu yago, esi nyi na gu si pwago khavbo gwaye nyi na gu tivisa.”

1 Samuweli 20:12

Jonatane a di embela Dhavhidhe, khuye: “Nyi ngu sambanya khu Pfhumu Nungungulu wa Israyeli, kheni nyi na vbwetedzela babe wangu, libwagewo, khu gikhati nya nga egi, nyi na tugula gukheni mipimiso yaye khyadi, mwendro khandri yadi avbo gwago, nyi na rumela mwango u ta tiviswa.

1 Samuweli 20:14

Nya gu bani nyi nga gu vbanya, u na yeyedza avbo gwangu wuhindzi wa Pfhumu Nungungulu, gasi nyi si songwi.

1 Samuweli 25:22

Nungungulu a na nyi tsayise khu tshivba, nya gukala nyi diga mwama moyo basi a vbanya vbakari nya avo kala gugya mindru.

1 Samuweli 3:17

Khu guralo, Eli a di mu wudzisa, khuye: “Ginani a nga gu embela Pfhumu Nungungulu?” U nga nyi siheli gilo. Pfhumu Nungungulu a na gu tsayise khu tshivba ni tshivba wa gu tshiya gilo nya gukari nya satshavbo esi Uye a gu embedego.