Yo 9:16 - Sơ̆p Hlabơar Nơ̆r 'Bok Kei-Dei

¹⁶ Lu bơngai Pharisi mơ'nah khan: “Bơngai pơm thoi noh Sư ưh kơ sĭ lĕch đơ̆ng 'Bok Kei-Dei ôh, yua kơ Sư ưh kơ răk năr pơdơh Sa'bat.” Lu mơ'nah khan dơ̆ng: “Yah lei, bơngai yoch ưh kơ gơh pơm tơdrong mơsêh mơyang thoi Sư noh ôh.” Thoi noh na lu sư tơklah băl đon gah tơdrong Yêsu.

Yo 9:16 Iomraidhean Croise

Mathiơ 12:10

Lăm hnam akŭm noh đei minh 'nu bơngai ti kue minh pah, na lu sư răp lăng Yêsu hăm ming pơklaih ti sư dah ưh, yua kơ năr noh năr pơdơh Sa'bat. Dah Sư pơklaih lei lu sư wă jô̆ Sư bơngai yoch yua kơ lu sư khan lăm năr pơdơh Sa'bat ưh kơ gơh jang păng ưh kơ gơh pơklaih bơngai jĭ jăn ôh. Na lu sư jet Yêsu khan: “Kiơ̆ tơdrong juăt bơ̆n hăm gơh ming pơklaih đe jĭ jăn lăm năr pơdơh Sa'bat dah ưh?”

Mathiơ 12:2

Lu bơngai Pharisi 'bôh thoi noh na khan kơ Yêsu: “Ih lăng, lu bơngai pơhrăm păng Ih pơm ưh kơ trŏ lăm năr pơdơh, năr pơdơh khan jang.”

Luka 13:14

Kră wei-lăng hnam akŭm ei 'bôh thoi noh na sư hil dêh yua kơ Yêsu pơklaih đe lăm năr pơdơh Sa'bat wă khan năr giĕng. Na 'bok ei khan kơ lu kon pơlei pơla mă oei akŭm 'bơ̆t ei thoi âu: “Lăm minh 'măng giĕng đei tơdrâu năr bơ̆n gơh jang, iĕm athei năm tơ âu ming akâu iĕm lăm tơdrâu năr ei đĕch. Iĕm ưh kơ gơh ming akâu iĕm lăm năr pơdơh Sa'bat ôh.”

Yo 10:19

Yêsu bơtho thoi noh lu bơngai Juđê tơklah băl đon gah tơdrong Yêsu.

Yo 14:11

Inh wă kơ iĕm lui kơ 'Bă Inh oei lăm Inh, nhi 'Bă Inh minh jơhngơ̆m minh đon. Dah iĕm ưh kơ lui, khan nơ̆r Inh pơma đĕch, lei iĕm athei lui kơ dôm tơdrong mơsêh mơyang mă đêl Inh pơm.

Yo 15:24

Đơ̆ng sơ̆ ưh kơ đei bu pơm tơdrong mơsêh mơyang dang Inh. Dah Inh ưh kơ pơm tơdrong mơsêh mơyang 'bơ̆t anăp lu sư wă tơbăt ăn kơ lu sư Inh đơ̆ng 'Bok Kei-Dei thoi krô hmă, lei lu sư ưh kơ hil kơ Inh ôh. Na dang ei lu sư 'bôh Inh păng 'bôh dôm tơdrong Inh pơm boih, na lu sư hil areh kơ Inh păng hil areh kơ 'Bă Inh mơ̆n. Lu sư chă tơdrong yoch tơpă.

Yo 2:11

Tơdrong mơsêh mơyang âu boih Yêsu pơm tơ'bôh kơ đe mă hơdrol. Sư pơm tơ Pơlei Kanna, dêh Galilê. Thoi noh boih na lu bơngai pơhrăm păng Sư lui kơ Sư đơ̆ng 'Bok Kei-Dei tơpă.

Yo 3:2

Sư năm ngôi tơ Yêsu kơmăng, na sư khan kơ Yêsu: “Ơ 'Bok Thây, nhôn băt kơ Ih 'Bok Thây đơ̆ng 'Bok Kei-Dei wơh. Dah 'Bok Kei-Dei ưh kơ tơgŭm Ih, lei Ih ưh kơ gơh pơm tơdrong mơsêh mơyang thoi Ih pơm ahrei ôh.”

Yo 5:10

Thoi noh boih na lu bơngai Juđê khan kơ bơngai 'nao klaih ei khan: “Năr âu năr giĕng lah. Ih 'nĕ tung anhăk sơkok ih.”

Yo 5:36

Mă-lei Inh đei minh 'nu tih hloh kơ Yôhan, Sư tơbăt ăn kơ iĕm tơdrong Inh. Na dôm tơdrong mơsêh mơyang đơ̆ng Sư ăn kơ Inh, na Inh bơ̆jang ahrei âu, dôm tơdrong noh wă kơ iĕm băt 'Bă Inh wơh Inh tơpă.

Yo 6:52

Kơlih kơ Yêsu pơma thoi noh na lu bơngai Juđê pơma pơjah pơjăng dih băl. Lu sư khan: “Lơliơ bơngai âu gơh ăn kơ bơ̆n sĕch akar Sư wă kơ bơ̆n sa?”

Yo 7:12

Lu kon pơlei pơla pơma 'bơm gah tơdrong Yêsu. Lu mơ'nah khan Sư bơngai 'lơ̆ng tơpăt; lu mơ'nah khan Sư ưh kơ 'lơ̆ng ôh, khan Sư chă hơlĕnh kơ kon pơlei pơla đĕch.

Yo 7:23

Iĕm jang kăt tơdra akar đe lăm năr pơdơh kư̆m gơh; liơ iĕm hil kơ Inh pơklaih bơngai jĭ jăn lăm năr pơdơh mơ̆n? Inh pơklaih bơngai jĭ jăn lăm năr pơdơh Sa'bat, noh trŏ hloh kơ iĕm kăt tơdra akar đe lăm năr pơdơh Sa'bat.

Yo 7:43

Thoi noh na lu kon pơlei pơla tơklah băl đon gah tơdrong Yêsu.

Yo 9:24

Na lu sư krao bơngai đêl măt tol ei minh 'măng dơ̆ng na jet sư: “Ih bơnê kơ 'Bok Kei-Dei đĕch hŏ măt ih gơh 'bôh hơdah boih. Gah nhôn băt kơ Yêsu bơngai yoch tơpă.”

Jang 14:4

Lăm kon pơlei pơla lu mơ'nah oei kiơ̆ gah đe Juđê, mơ'nah oei kiơ̆ gah jơ̆ng 'bang Yêsu Krist.