Yo 6:40 - Sơ̆p Hlabơar Nơ̆r 'Bok Kei-Dei

⁴⁰ 'Bă Inh wă thoi âu: Ăn dôm lu bơngai mă 'bôh Inh Kon Sư na lui hloi kơ Inh, lu sư gô đei arih ling-lang. Inh tơiung arih lu sư năr tôch ning-mônh.”

Yo 6:40 Iomraidhean Croise

Êsai 52:10

Kră Yang tơ'bôh ăn bơih tơdrong jang ti rơgoh Sư 'bơ̆t anăp măt rim kơ teh đak; đĭ-đăng teh đak gô 'bôh tơdrong dŏng pơklaih Kră Yang 'Bok Kei-Dei lu bơ̆n!

Êsai 53:2

Sư wơ̆ kơjung 'bơ̆t anăp Kră Yang thoi lĕ minh pôm 'long 'lơ̆p chăt bluh đơ̆ng rơh lăm teh hrĕng kro. Sư ưh kơ đei 'lơ̆ng hơbŏ rŏ; wă kơ lu bơ̆n lăng tơ sư, sư ưh kơ đei tơdrong 'lơ̆ng gah 'nguaih wă kơ lu bơ̆n lăp.

Jo 21:9

Thoi ei, Môis pơm minh dăng rup 'bih tang hling hăm kong, na tơ'băk tơ tơ̆r 'long gơgiĕr; bơngai bu mă 'bih choh sư boih, sư lăng tơ 'bih kong noh lei sư arih.

Mathiơ 10:15

Inh khan kơ iĕm tơpă, truh năr 'Bok Kei-Dei wă sek tơlang ning-mônh Sư gô phak kon pơlei Sôđôm păng kon pơlei Gômôrơ hơiơch 'biơ̆ kơ pơlei mă ưh kơ sơng iŏk iĕm, mă khan 'bar tŏ pơlei noh pơm kơnê̆ dêh ră sơ̆.

Mathiơ 25:46

Đơ̆ng noh 'Bok Kei-Dei phak lu sư tơ dơnâu ŭnh ling-lang ưh kơ layơ păt. Gah lu bơngai lui kơ 'Bok Kei-Dei 'lơ̆ng tơpăt, lu sư tŏk oei hơdai hăm 'Bok Kei-Dei ling-lang kư̆m ưh kơ layơ tôch.”

Markôs 16:16

Bơngai bu lui păng iŏk 'batem, bơngai 'noh sư gơh klaih đơ̆ng tơdrong yoch. Bơngai bu ưh kơ chu lui sư gô pŭ tơdrong phak.

Luka 2:30

na dang ei inh 'bôh boih bơngai mă Ih wơh wă dŏng pơklaih đĭ-đăng kơ khŭl kon bơngai nhôn.

Yo 1:14

Yêsu Krist dang nơ̆r 'Bok Kei-Dei, Sư jur jing kon bơngai. Sư oei hơdai păng kon bơngai bơ̆n. Bơngai bơ̆n 'bôh Sư gơh pơm tơdrong mơsêh mơyang; Sư 'noh boih Kon pôm 'Bok Kei-Dei tơpă; Sư 'mêm mơnat kơ bơ̆n, pơklaih bơ̆n đơ̆ng tơdrong yoch păng tơbăt ăn kơ bơ̆n tơdrong 'Bok Kei-Dei tơpă.

Yo 10:28

Inh ăn kơ triu Inh arih ling-lang, sư ưh kơ layơ lôch răm ôh. Ưh kơ đei bu kĕ tơgar iŏk sư đơ̆ng ti Inh.

Yo 11:24

Mathê khan: “Inh băt mơ̆n sư gô iung arih năr tôch ning-mônh.”

Yo 11:25

Yêsu khan kơ sư: “Inh boih tơiung arih bơngai đơ̆ng lôch păng ăn tơdrong arih ling-lang. Bơngai bu lui kơ Inh, bơngai 'noh sư lôch bưh mơ̆n, mă-lei Inh tơiung arih sư dơ̆ng.

Yo 12:45

Păng bơngai bu 'bôh Inh, sư dang 'bôh 'Bă Inh mă wơh Inh mơ̆n.

Yo 12:50

Inh băt tơdrong Sư pơkă ăn kơ kon bơngai noh gô ăn kon bơngai arih ling-lang. Dôm tơdrong Inh bơtho đơ̆ng 'Bă Inh ăn kơ Inh ngăl.”

Yo 14:17

Lu bơngai oei ala teh âu mă ưh kơ lui, lu sư ưh kơ gơh sơng iŏk Sư ôh, kơlih kơ lu sư ưh kơ gơh 'bôh Sư păng ưh kơ băt kơ Sư. Mă-lei iĕm, iĕm băt kơ Sư, kơlih kơ Sư oei păng iĕm, Sư kư̆m gô oei lăm jơhngơ̆m iĕm mơ̆n.

Yo 14:19

Pă 'biơ̆ dơ̆ng lu bơngai tơ ala teh âu ưh pă 'bôh Inh boih. Pôm lu iĕm đĕch 'bôh Inh. Inh gô oei hơdai hăm 'Bă Inh arih ling-lang, lu iĕm gô arih ling-lang thoi noh mơ̆n.

Yo 17:2

Thoi Ih ăn kơ Inh pơgơ̆r đĭ-đăng bơngai, Inh gơh ăn kơ kon bơngai mă Ih pơjao kơ Inh gô arih ling-lang păng ba.

Yo 3:36

Bơngai bu lui kơ Kon Sư, bơngai 'noh sư gô oei hơdai hăm 'Bok Kei-Dei arih ling-lang. Bơngai bu ưh kơ lui yom kơ Kon Sư, bơngai 'noh sư ưh kơ đei arih ling-lang ôh. 'Bok Kei-Dei hil kơ sư tơpă păng sĭt gô phak sư ning-mônh.”

Yo 4:14

Bơngai bu nhă đak đơ̆ng Inh ăn, kơnh sư huay pă rơhing boih. Đak mă Inh ăn kơ sư thoi lĕ đak mơlĕch, sư ro jur suŏn lăm to bơngai mă nhă 'noh, pơm kơ bơngai noh gơh arih ling-lang.”

Yo 5:24

Inh khan kơ iĕm tơpă, bơngai bu mơ̆ng Inh bơtho păng lui hloi kơ 'Bok Kei-Dei mă wơh Inh, bơngai 'noh ning-mônh sư gô oei hơdai hăm 'Bok Kei-Dei arih ling-lang păng Inh huay pă sek tơlang tơdrong sư boih. Sơ̆ sư kiơ̆ tơdrong lôch mă-lei dang ei sư kiơ̆ tơdrong arih.

Yo 6:27

Iĕm 'nĕ chă tơmam sa mă jing ôm hach. Iĕm athei adrin chă tơmam sa sot, săt 'lơ̆ng ling-lang, ưh kơ đei layơ ôm hach, wă 'me iĕm arih ling-lang. Tơmam sa ei, Inh mă jur jing kon bơngai, Inh asong ăn kơ lu iĕm. 'Bă Inh 'Bok Kei-Dei pơjao ăn kơ Inh thoi noh păng Sư kư̆m tơbăt ăn kơ kon bơngai tơdrong noh ră mơ̆n.”

Yo 6:39

'Bă Inh mă wơh Inh Sư wă kơ Inh huay kơ tơhiong dôm lu bơngai mă Sư pơjao ăn kơ Inh. Na truh năr tôch ning-mônh Inh gô tơiung arih lu sư.

Yo 6:44

'Bă Inh athei Inh truh tơ âu, na ưh kơ đei bu truh tơ Inh ôh, dah 'Bă Inh ưh kơ ăn lu sư truh. Bơngai bu mă 'Bă Inh ăn truh tơ Inh, lu bơngai 'noh đĕch truh tơ Inh, na Inh gô tơiung arih lu sư năr tôch ning-mônh.

Yo 6:54

Bơngai bu sa sĕch akar Inh păng huch sa pham Inh, bơngai 'noh Inh gô tơiung arih sư ning-mônh na sư gô đei arih ling-lang.

Yo 8:56

'Bă iĕm Abraham hiôk chơt kơlih kơ sư băt sư gô 'bôh năr Inh truh. Sư 'bôh boih na sư hiôk chơt tơpă.”

Rom 5:21

Tơdrong yoch pơm kơ kon bơngai jing lôch, mă-lei 'Bok Kei-Dei Sư 'mêm na jô̆ bơ̆n jing bơngai 'lơ̆ng, ăn kơ bơ̆n arih ling-lang yua kơ Kră Yang bơ̆n Yêsu Krist.

Rom 6:23

Bu jang chă tơdrong yoch, apah sư tơdrong lôch. Mă-lei gah lu bơ̆n, dang ei 'Bok Kei-Dei ăn đĕch kơ bơ̆n arih ling-lang yua kơ bơ̆n lui kơ Kră Yang bơ̆n Yêsu Krist.

II Kor 4:6

Kơplah 'Bok Kei-Dei pơjing plĕnh teh sơ̆ Sư khan kơ măng mu athei đei hơdah na đei hloi. Na Sư kư̆m pơchrang tơdrong hơdah Sư tơ jơhngơ̆m đon nhôn, tơ muh măt Yêsu Krist, wă tơbăt kơ nhôn Sư Kră Yang 'Bok Kei-Dei mơsêh tơpă.

Hêbrơ 11:1

Bơngai đon lui, sư băt tơpă kơ sư gô đei. Tơdrong sư ưh kơ gơh 'bôh sư kư̆m băt kơ đei mơ̆n.

Hêbrơ 11:27

Yua kơ sư đei đon lui, na sư jăk achăng lê̆ dêh Êyiptơ. Sư ưh kơ hli kơ 'bok pơtao hil kơ sư ôh, sư kư̆ kơ năm hloi, yua kơ sư dang lĕ 'bôh akâu 'Bok Kei-Dei mă bơ̆n ưh kơ 'bôh.

I Pet 1:8

Đơ̆ng sơ̆ iĕm ưh kơ 'bôh Yêsu Krist thoi yơ, mă iĕm 'mêm kơ Sư tơpă. Dang ei iĕm kư̆m ưh kơ 'bôh Sư mă iĕm kư̆m lui kơ Sư kơjăp, jơhngơ̆m iĕm hiôk ling-lang măng năr.

I Yo 2:25

Thoi noh bơ̆n gô arih ling-lang, kư̆m thoi Yêsu Krist pơkă sơ̆.

Ju 1:21

Iĕm athei kơchăng kơ akâu iĕm kơdih, na iĕm oei 'bôh tơdrong 'Bok Kei-Dei 'mêm kơ iĕm ling-lang. Păng bơ̆n athei chang gô tơdrong Kră Yang Yêsu Krist wă ăn kơ bơ̆n arih ling-lang ei, yua kơ Yêsu Krist 'mêm kơ bơ̆n.