Yo 4:23 - Sơ̆p Hlabơar Nơ̆r 'Bok Kei-Dei

²³ Ning-mônh, kư̆m thoi dang ei mơ̆n, lu bơngai mă kơkuh kơ 'Bă bơ̆n 'Bok Kei-Dei mă trŏ ưh kơ sĭ sư kơkuh păng jơ̆ng dah păng ti sư đĕch ôh. Sư kơkuh lăm jơhngơ̆m đon sư. Sư kơkuh mă tơpă na 'Bok Kei-Dei lăp đon kơ lu bơngai mă kơkuh kơ Sư thoi noh.

Yo 4:23 Iomraidhean Croise

I Ho 29:17

Ơ Kră Yang 'Bok Kei-Dei inh, inh băt kơ Ih 'bôh nhen lăm jơhngơ̆m klơm klak kon bơngai păng Ih hiôk gah tơdrong 'lơ̆ng tơpăt. Gah inh kư̆m kiơ̆ tơdrong 'lơ̆ng tơpăt lăm jơhngơ̆m hiôk pơyơ̆r ăn kơ ih lu tơmam 'nâu. Dang ei inh hiôk dêh inh 'bôh kon pơlei Ih oei tơ âu kư̆m đei pơyơ̆r ăn kơ Ih hăm jơhngơ̆m hiôk.

Horiso 147:11

Mă-lei Kră Yang lăp đon kơ bu mă hli yom kơ Sư, păng lu bơngai mă chang hơmĕng kơ tơdrong Sư 'mêm.

Horiso 17:1

Ơ Kră Yang! Apinh Ih mơ̆ng tơdrong tơpăt, Mơ̆ng pơnhen nơ̆r inh krao chă; Apinh pơgling đon Ih mơ̆ng nơ̆r inh krao khan. Đơ̆ng 'bơ̆r ưh kơ hơlĕnh.

Horiso 32:2

Pŭn dêh kơ bu mă Kră Yang huay kơ jô̆ kơnê̆, Păng lăm jơhngơ̆m ưh kơ đei hơlĕnh!

Horiso 51:6

Âu, Ih wă kơ 'bôh đei tơdrong tơpăt tơ lăm jơhngơ̆m Ih pơhrăm inh đei tơdrong hơgei mă hlơp lăm jơhngơ̆m.

Tơdrông Pơđơk 15:8

Tơmam soi lu bơngai kơnê̆ pơm 'mê̆ krưp kơ Kră Yang; Mă-lei đei nơ̆r krao khan đơ̆ng lu bơngai tơpăt Kră Yang lăp đon.

Hơri Hiôk 2:14

Ơ sem kơtơp inh, tơ sơlam tơmo, Păng lăm hơgơp kông. Tơ'bôh bĕ kơ inh muh măt ih. Asong bĕ inh mơ̆ng nơ̆r ih, Yua kơ nơ̆r pơma ih hơbôn rơngơp. Muh măt ih 'lơ̆ng hơiă.

Êsai 10:20

Lăm năr noh, dôm lu bơngai Isơrael mă oei oei. Dôm lu bơngai lăm adrĕch Jakôp oei klaih, gô ưh pă gơnang kơ bơngai mă pơrăm lu sư. Mă-lei gô gơnang sĭt kơ Kră Yang, Tơ'ngla 'Lơ̆ng Rơgoh Isơrael.

Êsai 29:13

Kră Yang khan: Kon pơlei âu năm jê̆ Inh hăm 'bơ̆r lu sư đĕch; kơkuh kơ Inh hăm hơkŭng, mă-lei jơhngơ̆m lu sư ataih đơ̆ng Inh. Tơdrong lu sư hli yom kơ Inh jơ̆ kiơ̆ tơdrong tơtă kon bơngai đĕch păng đơ̆ng kon bơngai bơtho ăn.

Êsai 43:21

Inh pơjing bơih lu kon pơlei âu, ăn kơ Inh, lu sư gô ră roi bơnê kơ inh.

Êsai 58:2

Rim năr lu sư chơchă Inh; păng chơt hiôk băt kơ trong Inh. Thoi kon pơlei pơm tơdrong 'lơ̆ng tơpăt, păng ưh kơ đei layơ hiơt kơ khôi juăt Kră Yang 'Bok Kei-Dei lu sư kơdih, lu sư krao apinh Inh sek tơlang ăn tơpăt jơhngơ̆m lu sư hiôk năm jê̆ Kră Yang 'Bok Kei-Dei.

Je 3:10

Mă-lei, đơ̆ng tơdrong noh, oh sư bơngai Juđa pơm kơnê̆, sư kư̆m ưh kơ wih brŏk tơ Inh đĭ jơhngơ̆m, chă hơlĕnh đĕch, Kră Yang khan.

Je 4:2

Tơdah iĕm pơkă sĭt hăm tơdrong tơpăt hơnơ̆ng, tơdrong trŏ thoi Kră Yang arih sĭt lei teh đak gô đei pŭn hiôk đơ̆ng Sư, Păng lu sư gô ư-ang kơ Kră Yang,”

Êsêkiên 22:30

Inh chă lăng minh 'nu bơngai lăm lu sư, wă man pơdơ̆ng ming dur, wă kơ tơplih kơ pơlei, lăm teh đak păng dơ̆ng chĭt bơlôh dur 'bơ̆t anăp Inh, wă kơ Inh huay kơ pơrăm teh đak lu sư; mă-lei Inh chă ưh kơ đei bu.

Yo 1:17

Môis ată kơ bơ̆n tơdrong juăt đơ̆ng nơ̆r 'Bok Kei-Dei, na Yêsu Krist pơklaih bơ̆n đơ̆ng tơdrong yoch păng tơbăt ăn kơ bơ̆n tơdrong 'Bok Kei-Dei tơpă.

Yo 12:23

Na Yêsu pơma hloi gah tơdrong Sư wă lôch iung arih thoi âu: “Dang ei trŏ năr 'Bok Kei-Dei wă pơư pơang Inh Kon Bơngai tơpă boih.

Yo 16:2

Ning-mônh lu sư gô pơpuh iĕm đơ̆ng hnam akŭm lu sư. Ning-mônh mơ̆n lu sư khan pơlôch iĕm khan trŏ kơ 'Bok Kei-Dei wă.

Yo 16:32

Mă-lei pă 'biơ̆ kơnh, wă jê̆ truh boih, đĭ-đăng kơ lu iĕm kơdâu sơlah gah kơdih kơdih brŏk tơ hnam tŭk kơdrô̆ Inh đĕch. Mă tơpă Inh ưh kơ oei kơdrô̆ Inh ôh. 'Bă Inh oei hơdai păng Inh.

Yo 4:21

Yêsu khan kơ sư: “Ơ duch, Inh wă khan kơ ih tơpă, ning-mônh đe huay pă năm kơkuh kơ 'Bă bơ̆n 'Bok Kei-Dei tơ kông âu dah tơ Pơlei Jêrusalem dơ̆ng boih.

Yo 5:25

“Inh khan tơpăt kơ iĕm dơ̆ng, ning-mônh kư̆m thoi dang ei mơ̆n, lu bơngai lôch gô kơtơ̆ng nơ̆r Kon 'Bok Kei-Dei krao sư, na bu mă mơ̆ng Sư krao, sư 'noh gô iung arih.

Yo 5:28

Na Inh bơtho iĕm thoi noh, iĕm 'nĕ tơchĕng hlĭch kơ đon. Ning-mônh đĭ-đăng lu bơngai lôch oei lăm bơsat kơtơ̆ng 'bơ̆r Inh krao sư,

Rom 1:9

Inh adrin jang tơdrong 'Bok Kei-Dei, bơtho tơdrong 'nao 'lơ̆ng Kon Sư Yêsu Krist, na 'Bok Kei-Dei Sư 'bôh inh krao khan kơ Sư, Sư băt kơ inh krao khan tơgŭm iĕm ling-lang tơpă.

Rom 8:15

Ưh kơ sĭ 'Bok Kei-Dei ăn Yang Bơhngol 'Lơ̆ng wă kơ bơ̆n jing bơngai đĭch, dah wă kơ bơ̆n oei hli ôh. Sư ăn kơ bơ̆n Yang Bơhngol 'Lơ̆ng wă kơ bơ̆n jing kon Sư. Thoi noh na bơ̆n gơh krao kơ 'Bok Kei-Dei Aba, 'Bă bơ̆n.

Rom 8:26

Bơ̆n kơdih ưh kơ gơh, mă-lei đei Yang Bơhngol 'Lơ̆ng tơgŭm bơ̆n. Bơ̆n ưh kơ băt wă krao khan kơ 'Bok Kei-Dei thoi yơ, mă-lei Yang Bơhngol 'Lơ̆ng Sư tơgŭm bơ̆n gơh krao khan hăm đĭ jơhngơ̆m.

Galati 4:6

Bơ̆n băt boih bơ̆n jing kon Sư tơpă, yua kơ Sư wơh Yang Bơhngol 'Lơ̆ng đơ̆ng Kon Sư jur oei păng bơ̆n, Sư bơtho bơ̆n krao kơ 'Bok Kei-Dei Aba, 'Bă.

Êphêsô 6:18

Păng bơ̆n 'nĕ hiơt krao khan kơ 'Bok Kei-Dei, wă kơ bơ̆n hưch hanh kơ tơdrong krao khan ling-lang, gô mơ̆ng kơ Yang Bơhngol 'Lơ̆ng wă kơ bơ̆n krao khan tơdrong kiơ, krao khan tơgŭm băl tơduă lu kon 'Bok Kei-Dei dah krao khan kơ tơdrong kiơ nai.

Philip 3:3

Lu bơ̆n âu boih kiơ̆ kơ tơdrong 'Bok Kei-Dei pơkă tơpă. Mă-lei bơ̆n ưh kơ kăl kơ tơdrong kăt tơdra akar chă pơpơm kơdih păng ti thoi noh ôh. Bơ̆n kăl kơ Yang Bơhngol 'Lơ̆ng đĕch; bơ̆n athei gơnang kơ Sư wă kơ bơ̆n gơh kiơ̆ 'Bok Kei-Dei trŏ thoi Sư wă. Tơdrong kăt tơdra akar chă pơm kơdih păng ti đĕch na bơ̆n 'nĕ kơ kiơ̆ ôh hli kơ bơ̆n gơnang kơ tơdrong bơ̆n pơm kơdih, bơ̆n athei gơnang kơ Yêsu Krist đĕch.

Jôsuê 24:14

Thoi noh dang ei, athei chu yom bĕ kơ Kră Yang păng pơm kiơ̆ kơ Sư hăm đĭ jơhngơ̆m păng tơnăp, hŭt lê̆ bĕ lu yang mă 'bok lu iĕm kơkuh tơ gah hơlĕch kơ đak Krong Tih păng tơ lăm char Êyiptơ; athei chu yom bĕ kơ Kră Yang.

I Pet 2:9

Mă-lei gah bơ̆n, Sư rơih iŏk bơ̆n wă kơ bơ̆n jing adrĕch adrung Sư, bơ̆n kư̆m thoi lu bơngai soi kơ 'Bok Kei-Dei Pơtao bơ̆n, bơ̆n dang pơlei pơla Sư, teh đak Sư boih. Sư ăn kơ bơ̆n jing kon Sư wă kơ bơ̆n ră roi kơ đe dôm tơdrong 'lơ̆ng Sư pơm. Sư boih krao iŏk bơ̆n đơ̆ng anih măng mu oei tơ anih hơdah Sư dang ei.

I Sam 12:24

Athei băt hli yom kơ Kră Yang đĕch, đĭ jơhngơ̆m bơ̆jang kơ Sư; lu iĕm athei 'blŏk dôm tơdrong Sư pơm tih dêh kơ lu iĕm ưh kơ băt dang yơ!