Ya 2:8 - Sơ̆p Hlabơar Nơ̆r 'Bok Kei-Dei

⁸ Dah iĕm rok kiơ̆ tơdrong juăt 'Bok Kei-Dei mă đe chih tơ lăm sơ̆p hla bơar Sư, Sư athei bơ̆n 'mêm kơ bôl buăl thoi bơ̆n 'mêm kơ akâu kơdih, tơ̆ng iĕm pơm thoi noh tơpă lei 'lơ̆ng boih.

Ya 2:8 Iomraidhean Croise

I Pot 8:18

Mă-lei Kră Yang khan kơ 'bă inh Đawit: “Yua kơ ih tơchĕng wă pơm hnam akŭm kơ anăn Inh ih đei jơhngơ̆m 'lơ̆ng dêh.

II Pot 7:9

Kơplah ei, lu sư pơma dơnuh băl khan: “Bơ̆n pơm thoi âu ưh kơ trŏ; năr âu đei tơdrong 'lơ̆ng tơdrong 'nă hal, dah bơ̆n wă thĕng đĕch, dĭng 'brưch pơgê hơdah, lei lu bơ̆n gô glăi, bĕ bơ̆n jah năm roi tơdrong 'nâu kơ pơtao.”

Lêwi 19:18

'Nĕ kơ pơm 'mong răk rong mong găr hăm rông 'bôt kơtum kơtŏng 'nhŏng oh ih, athei 'mêm kơ lu sư thoi ih 'mêm akâu ih kơdih, Inh boih Kră Yang.

Lêwi 19:34

Bơngai tơmoi mă chă oei pơdơh hơdai lu iĕm, athei lăng sư thoi kon pơlei iĕm kơdih. Athei 'mêm kơ lu sư thoi iĕm 'mêm akâu kơdih; yua kơ lu iĕm kư̆m đêl jing bơngai tơmoi oei tơ char Êyiptơ sơ̆. Inh boih Kră Yang 'Bok Kei-Dei lu iĕm.

Jôna 4:4

Kră Yang tơl sư thoi âu: Ih blĕk hăm trŏ ưh?

Jôna 4:9

Kră Yang 'Bok Kei-Dei khan kơ Jôna thoi âu: Ih hăm trŏ kơ hil blĕk yua kơ tơnơm hla hro 'nâu? Sư tơl: Inh blĕk 'nâu trŏ, inh blĕk trŏ kơ lôch.

Mathiơ 22:39

Tơdrong juăt mă 'bar dơ̆ng kư̆m thoi noh mơ̆n: ‘Bơ̆n athei 'mêm kơ bôl buăl thoi bơ̆n 'mêm akâu kơdih.’

Mathiơ 25:21

Na yŏng sư khan: ‘Ơ dăm, ih jang kơ inh 'lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang 'lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.’

Mathiơ 25:23

Na yŏng sư khan: ‘Ơ dăm, ih jang kơ inh 'lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang 'lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.’

Mathiơ 7:12

Thoi noh na mă dôm tơdrong kiơ iĕm wă kơ đe pơm tơgŭm iĕm, iĕm athei pơm tơgŭm đe lei-lăi thoi noh. 'Noh trŏ kơ tơdrong juăt Môis păng tơdrong lu bơngai pơtruh nơ̆r 'Bok Kei-Dei sơ̆.

Rom 13:10

'Noh na tơ̆ng bơ̆n 'mêm kơ bôl buăl, bơ̆n ưh kơ pơm kơnê̆ kơ bôl buăl ôh. Tơ̆ng bơ̆n 'mêm kơ bôl buăl bơ̆n gô răk đĭ dôm tơdrong 'Bok Kei-Dei pơkă kơ bơ̆n noh.

Galati 5:14

Yua kơ 'Bok Kei-Dei pơkă boih kơ bơ̆n thoi âu: “Bơ̆n athei 'mêm kơ bôl buăl thoi bơ̆n 'mêm akâu kơdih.” Bơngai bu răk tơdrong noh sư dang kiơ̆ tôm dôm tơdrong juăt 'Bok Kei-Dei pơkă.

Galati 6:2

Iĕm gơh tơgŭm dih băl thoi noh trŏ tơpă, thoi Kră Yang Yêsu Krist pơkă.

Philip 4:14

Mă-lei inh bơnê kơ iĕm, băt băi kơ tơgŭm inh kơplah đe pơm pơmat kơ inh âu.

I Tes 4:9

Gah tơdrong 'mêm mơnat tơduă bôl bơngai lui nhôn huay kơ kăl chih roi kơ iĕm ôh, yua kơ 'Bok Kei-Dei bơtho iĕm boih tơdrong 'mêm mơnat dih băl 'noh.

Ya 1:25

Na gah tơdrong mơ̆ng đe bơtho tơdrong 'Bok Kei-Dei pơkă, bơngai bu mơ̆ng hăm pơm kiơ̆, ưh kơ hiơt dôm tơdrong đe bơtho, bơngai noh hiôk tơpă boih, yua kơ tơdrong 'Bok Kei-Dei 'lơ̆ng tơpă ăn kơ kon bơngai bơ̆n klaih rơngei đơ̆ng tơdrong yoch.

Ya 2:12

Tôm tơdrong juăt 'Bok Kei-Dei pơkă wă kơ bơ̆n kiơ̆, Sư wă kơ bơ̆n klaih đơ̆ng tơdrong yoch jing rơngei. Yua kơ thoi noh na bơ̆n athei pơma rĕng đon păng pơm kiơ̆ tôm tơdrong Sư pơkă noh ling-lang, yua kơ ning-mônh Sư wă sek tơlang lu bơ̆n kiơ̆ kơ tơdrong Sư pơkă noh tơpă.

Ya 2:19

Lu iĕm mơ'nah khan lui đĕch kư̆m klaih mơ̆n hă? Iĕm kư̆ kơ lui đei minh pôm Kră Yang 'Bok Kei-Dei đĕch, trŏ boih, lu yang kơnê̆ kư̆m lui thoi noh mơ̆n, lu sư hli tơrơ kơ 'Bok Kei-Dei tơpă.

Ya 4:11

Ơ 'nhŏng oh, iĕm 'nĕ kơ pơma bâu roi bôl buăl. Bơngai bu bâu roi 'nhŏng oh sư păng jô̆ kơ 'nhŏng oh sư pơm yoch, bơngai noh dang sek tơlang tơdrong juăt 'Bok Kei-Dei pơkă, khan tơdrong 'Bok Kei-Dei pơkă ưh kơ 'lơ̆ng. 'Bok Kei-Dei athei bơ̆n 'mêm dih băl, mă sư khan ưh kơ trŏ. Dah iĕm khan tơdrong 'Bok Kei-Dei ưh kơ trŏ, lei iĕm jing ưh pă kiơ̆ tơdrong Sư pơkă boih, noh dang iĕm wă pôk akâu iĕm kơdih sek tơlang tơdrong Sư.

I Pet 2:9

Mă-lei gah bơ̆n, Sư rơih iŏk bơ̆n wă kơ bơ̆n jing adrĕch adrung Sư, bơ̆n kư̆m thoi lu bơngai soi kơ 'Bok Kei-Dei Pơtao bơ̆n, bơ̆n dang pơlei pơla Sư, teh đak Sư boih. Sư ăn kơ bơ̆n jing kon Sư wă kơ bơ̆n ră roi kơ đe dôm tơdrong 'lơ̆ng Sư pơm. Sư boih krao iŏk bơ̆n đơ̆ng anih măng mu oei tơ anih hơdah Sư dang ei.