Tơdrông Tơ'bôh 13:10 - Sơ̆p Hlabơar Nơ̆r 'Bok Kei-Dei

¹⁰ Bơngai bu trŏ kơ đe wă tah sư tơ lăm hnam phak sư athei chu kơ đe tah đĕch. Bơngai bu trŏ kơ đe pơlôch păng đao sư athei chu lôch kơ pla đao đĕch. Iĕm băt kơ thoi noh boih, na lu bơngai mă lui athei adrin gơnang kơ 'Bok Kei-Dei đĕch.

Tơdrông Tơ'bôh 13:10 Iomraidhean Croise

Êsai 14:2

Lu kon pơlei teh đak tơmoi gô năm ba lu đe Isơrael brŏk tơ dêh lu sư kơdih; adrĕch Isơrael gô iŏk lu sư, pơm đam drŏ-nglo drŏ-kăn lăm teh đak Kră Yang. Lu sư gô rôp lu bơngai đêl rôp lu sư pơm bơnă, păng pơgơ̆r lu bơngai mă đêl pơgŏ pơđep lu sư.

Êsai 26:21

Lăng to, Kră Yang lĕch đơ̆ng anih Sư jur wă phak kon bơngai oei kơpal teh âu, yua kơ tơdrong yoch lu sư. Kơplah noh kơnh teh gô pơdah tơ'bôh pham đêl lu đe pơlôch păng ưh kơ gơh ôn dơ̆ng lu bơngai đêl đe pơlôch.

Êsai 33:1

Răm-'băm dêh kơ ih, ơ bơngai pơrăm đe, đe ưh tam mă đei pơrăm ih, ơ bơngai blơ̆ blĕch đe, đe ưh tam đei blơ̆ ih! Kơplah mă ih pơdơh pơrăm đe, đe gô pơrăm ih dơ̆ng. Kơplah ih ưh pă blơ̆ blĕch đe gô blơ̆ ih.

Je 15:2

Tơdah lu sư apinh ih: ‘Lu nhôn gô năm tơ yơ?’ Ih khan kơ lu sư: 'Nâu Kră Yang khan: “Bu Inh pơkă ăn kơ sư lôch kơ hơbuh, gô chu lôch kơ hơbuh, Bu Inh pơkă wă pơlôch hăm đao gưm, gô lôch kơ đao gưm. Bu Inh pơkă wă ăn kơ sư lôch pơngot rơwĕt, gô lôch kơ pơngot rơwĕt. Bu Inh pơkă wă ăn pơm bơnă, sư gô pơm bơnă.”

Je 43:11

Pơtao noh gô năm blah iŏk dêh char Êyiptơ, gô pơlôch lu bơngai mă trŏ kơ pơlôch, rôp pơm bơnă lu bơngai mă trŏ rôp kơ pơm bơnă, lu bơngai mă trŏ wă pơlôch hăm đao gưm đe gô pơlôch hăm đao gưm.

Nhom 3:26

'Lơ̆ng dêh bơngai bu chang gô păng kĕ ĕnh gô tơdrong dŏng pơklaih đơ̆ng Kră Yang.

Habakuk 2:3

Yua kơ tơdrong tơ'bôh gô 'blep trŏ lăm năr đêl pơkă, gô keh thoi noh, ưh kơ đei pơngiĕl ôh; tơdah sư hiơ̆ 'biơ̆, ih kư̆ gô; yua kơ gô truh tơpă, ưh kơ hiơ̆ ôh.

Mathiơ 26:52

Na Yêsu khan kơ sư: “Tah lê̆ đao ih tơ anglop bĕ. Bu yua đao, sư gô lôch yua kơ đao mơ̆n.

Mathiơ 7:2

Iĕm jô̆ kơ đe thoi yơ, 'Bok Kei-Dei jô̆ kơ iĕm thoi noh mơ̆n.

Luka 21:19

Dah iĕm adrin tơpă lei iĕm huay kơ hiong tơdrong arih ling-lang ôh.”

Kôlôsê 1:11

Na nhôn apinh tơdrong mơsêh mơyang 'Bok Kei-Dei ăn kơ iĕm jơhngơ̆m pran adrin kiơ̆ tôm tơdrong Sư, wă kơ iĕm huay kơ achăng lê̆ Sư, mă đe pơm pơmat kơ iĕm dang yơ, ăn kơ iĕm oei hiôk oei kơjăp lăm tơdrong lui khŏm khŏm.

Hêbrơ 6:12

Nhôn ưh kơ wă kơ iĕm alah ôh; nhôn wă kơ iĕm adrin lui kiơ̆ mă trŏ thoi lu đe kră sơ̆, lu sư lui khŏm khŏm tơpă, na 'Bok Kei-Dei ăn tơpă tôm tơdrong mă Sư đêl pơkă.

Tơdrông Tơ'bôh 1:9

Mă gah inh âu, anăn inh Yôhan 'nhŏng oh iĕm. Đĭ-đăng kơ bơ̆n pôm đon hăm Yêsu Krist, đĭ-đăng kơ bơ̆n mă iĕm mă inh tă ngăl đei tơdrong gleh truh, đĭ-đăng kơ bơ̆n đei minh 'nu Yêsu Krist pơgơ̆r wei-lăng. Bơ̆n adrin lui kơjăp mă khan đe areh kơ bơ̆n, thoi lĕ kơ inh đe phak oei tơ bŏl đak mă đe anăn bŏl đak Patmôs, yua kơ inh ră roi kơ đe nơ̆r 'Bok Kei-Dei păng tơdrong Yêsu.

Tơdrông Tơ'bôh 11:18

Lu bơngai ala teh mă ưh kơ lui hil areh kơ Ih, mă-lei dang ei kư̆m truh boih tơdrong Ih hil areh kơ lu sư wă phak lu sư păng wă sek tơlang lu bơngai lôch. Gah lu đĭch đam mă pơtruh nơ̆r Ih, lu kon Ih, lu băt lui yom hli kơ Ih, Ih gô apah lu sư mă sư pơm tih pơm iĕ. Gah lu bơngai mă ưh kơ lui chă pơrăm đe tơ ala teh, Ih gô pơrăm lu sư mơ̆n.”

Tơdrông Tơ'bôh 14:12

Yua kơ thoi noh boih na lu bơ̆n bơngai lui kơ Yêsu păng kiơ̆ tơdrong 'Bok Kei-Dei pơkă, bơ̆n athei adrin lui khŏm khŏm 'nĕ kơ achăng lê̆ Sư, mă đe pơmat bơ̆n dang yơ.

Tơdrông Tơ'bôh 16:6

yua kơ lu sư pơlôch tuh pham lu kon Ih, păng lu bơngai pơtruh nơ̆r Ih, na dang ei Ih pơkăl ăn kơ lu sư huch pham 'noh trŏ tơpă.”

Tơdrông Tơ'bôh 17:11

Gah sem brem mă sơ̆ arih hiôk, dang ei lôch ưh pă 'bôh boih noh, sư pơm pơtao mă tơhngam, sư păl lu tơpơh 'nu noh, ning-mônh 'Bok Kei-Dei gô phak sư kơtang kơtĭt.

Tơdrông Tơ'bôh 17:8

Sem mă ih 'bôh noh hei, sơ̆ sư arih hiôk, mă dang ei sư lôch ưh pă 'bôh boih. Ning-mônh sư arih mơ̆n, mă ưh pă arih hiôk boih, yua kơ ning-mônh sư tŏk đơ̆ng sơlŭng jrŭ năm tơ anih 'Bok Kei-Dei phak pơrăm. Pôm lu bơngai mă Kră Yang Yêsu ưh kơ đei chih anăn sư lăm hla bơar tơdrong arih đĕch ư-ang kơ sư. Dôm lu bơngai lui tơpă Sư chih anăn sư lăm noh đơ̆ng blŭng-a pơjing plĕnh teh sơ̆. Lu bơngai ưh kơ lui ư-ang kơ sem noh yua kơ sơ̆ sư arih hiôk, dang ei lôch ưh pă 'bôh boih, mă-lei ning-mônh gô iung arih dơ̆ng.

Tơdrông Tơ'bôh 2:19

‘Inh băt tơdrong lui iĕm, iĕm 'mêm kơ Inh hăm 'mêm kơ bôl buăl, iĕm lui kơjăp, iĕm jang tơdrong Inh ling-lang, iĕm đei tơdrong gleh truh iĕm oei adrin khŏm khŏm, tơdrong lui iĕm tŏk rai đunh rai kơjăp mơ̆n.

Tơdrông Tơ'bôh 2:2

‘Inh băt mơ̆n tơdrong lui iĕm, Inh băt mơ̆n iĕm jang gleh, Inh băt mơ̆n đe areh kơ iĕm, iĕm oei lui kơjăp. Inh băt mơ̆n iĕm kuă kơ lu bơngai kơnê̆ oei hơdai iĕm. Lu sư hơlĕnh khan sư pơm jơ̆ng 'bang Inh mă-lei iĕm pơlong lăng lu sư boih, na iĕm băt boih kơ sư bơngai hơlĕnh.

Tơdrông Tơ'bôh 3:10

Inh 'bôh iĕm đei tơdrong gleh pơmat-tat, mă-lei iĕm kư̆m oei adrin kiơ̆ thoi Inh sơ̆. Yua kơ thoi noh na Inh 'mêm kơ iĕm, wei-lăng iĕm kơplah 'Bok Kei-Dei ăn tơdrong gleh truh kơ rim 'nu bơngai jơ̆p kơ teh đak wă pơlong lăng kon bơngai thoi yơ.

Tơdrông Tơ'bôh 3:3

Thoi noh na iĕm athei 'blŏk hơdơ̆r kơ dôm tơdrong iĕm kơtơ̆ng đe bơtho iĕm sơ̆ thoi yơ, iĕm athei pơm kiơ̆ thoi noh păng tơbral kơdih dôm tơdrong yoch mă iĕm juăt kơ pơm. Dah iĕm ưh kơ adrin pơjăng 'biơ̆, lei Inh gô năm tơ iĕm thoi bơngai tơtông kơmăng, pơm kơ iĕm đei tơdrong gleh truh kơplah iĕm ưh kơ lêng ê.