Tit 2:2 - Sơ̆p Hlabơar Nơ̆r 'Bok Kei-Dei

² Ih athei bơtho khan kơ lu 'bok kră 'nĕ pă et sik suai, 'nĕ kơ pơm kư̆ kă. Athei sư iŏk đon iơ̆m dim păng ih athei sư lui mă kơjăp, băt 'mêm kơ 'Bok Kei-Dei hăm bôl buăl. Mă đei tơdrong gleh pơmat dang yơ athei sư adrin khŏm khŏm đĕch.

Tit 2:2 Iomraidhean Croise

Jop 12:12

Bơngai kră jơnei đei tơdrong hơgei, bơngai arih sot đei tơdrong hlôh wao.

Horiso 92:14

Mă khan truh tơ kră, lu sư oei đei pơkao plei. Sư jing păng hơdrih ling-lang,

Tơdrông Pơđơk 16:31

Sŏk ko jing môk ư-ang, 'Bôh đơ̆ng tơdrong jang sư tơpăt na gơh đei.

Êsai 65:20

Tơ noh ưh pă đei bơngai hơ'lơ̆p nge lôch hrôih, kư̆m ưh kơ đei bơngai kră ayơ mă ưh kơ arih sot tôm kơ sơnăm Yua kơ lôch kơplah minh-hrĕng sơnăm noh wă khan lôch oei mơlôh păng bơngai arih đei lăp minh-hrĕng sơnăm noh lăng thoi đei hiap pơtê̆.

Lêwi 19:32

Lu iĕm athei iung dơ̆ng 'bơ̆t anăp bơngai sŏk ko, lu iĕm athei pơyom kơ bơngai kră păng hli yom kơ 'Bok Kei-Dei Inh boih Kră Yang.

Markôs 5:15

Lu sư năm tơ Yêsu na 'bôh bơngai mă đêl yang kơnê̆ mơ̆t ei oei ngôi 'bơ̆t ei. Sư hrŭk hơbĕn ao thoi lĕ bơngai hmă boih, ưh pă wơnh dơ̆ng. Na lu sư khan: “Bơngai 'nâu boih yang kơnê̆ pơm kơ sư wơnh dêh ki.” Na lu sư hli kơ Yêsu.

Luka 8:35

Na lu kon pơlei pơla năm lăng tơdrong noh lơliơ. Lu sư năm tơ Yêsu na 'bôh bơngai mă đêl yang mơ̆t ei oei ngôi 'bơ̆t jơ̆ng Yêsu. Sư hrŭk hơbĕn ao thoi lĕ bơngai hmă boih, ưh pă wơnh dơ̆ng. Na lu đe ei hli kơ Yêsu.

Jang 24:25

Pôl bơtho tơdrong bơ̆n athei pơm 'lơ̆ng tơpăt, bơ̆n athei kơchăng kơdih hli kơ pơm tơdrong kơnê̆, hăm tơdrong 'Bok Kei-Dei gô sek tơlang kơ bơ̆n ning-mônh. 'Bok Phêlik kơtơ̆ng Pôl bơtho thoi noh, sư hli, na sư khan kơ Pôl: “Dang ei asong ih brŏk tơ anih ih; gô layơ dơ̆ng inh đei jơ rơwơn na inh krao ih wă mơ̆ng ih bơtho dơ̆ng.”

Rom 12:3

'Bok Kei-Dei ăn kơ inh pơm jơ̆ng 'bang Sư wă kơ inh bơtho ăn kơ iĕm tơdrong Sư, Sư wă kơ iĕm huay kơ pơang kơ đe khan iĕm bơngai hơgei hloh kơ bơngai nai. 'Bok Kei-Dei ăn kơ iĕm hơgei pơm kiơ, gơh jang tơdrong kiơ, iĕm kư̆ kơ jang đĕch kăl kiơ pơang kơ đe.

I Kor 15:34

Iĕm athei tơbral tơdrong yoch na jing 'lơ̆ng 'nĕ pă pơm tơdrong yoch đơ̆ng âu tơ anăp. Lu iĕm mơ'nah ưh kơ hlôh wao tơdrong 'Bok Kei-Dei thoi yơ na iĕm mơlâu ưh?

I Kor 9:25

Lu bơngai mă wă pơđuơ băl kơdâu lu sư adrin pơm jơhngơ̆m chơ̆n pơtơ̆p rim năr 'mơ̆i na wă kơ kơdâu pran đei tơdrong apah agăl pơkao mă đe pơyơ̆l tơ kơ̆l yua kơ jei sư, dơning dơmônh kư̆m jô kro. Mă-lei gah bơ̆n athei adrin jang chă tơdrong apah mă ưh kơ layơ hiong tôch.

II Kor 5:13

Tơ̆ng đe khan nhôn bơngai wơnh kư̆m bưh, noh yua kơ nhôn jang tơdrong 'Bok Kei-Dei; tơ̆ng đe khan nhôn bơngai 'lơ̆ng, 'nă hal loi, yua kơ đe pơư nhôn jang tơgŭm iĕm.

Galati 5:23

iŏk đon ala, gơh gơ̆t, dôm tơdrong 'lơ̆ng 'noh yua kơ đơ̆ng Yang Bơhngol 'Lơ̆ng tơgŭm bơ̆n ngăl. Tơdrong juăt 'Bok Kei-Dei ưh kơ đei găn khă ôh dôm lu tơdrong 'lơ̆ng noh.b

Philip 4:8

Ơ lu 'nhŏng oh, iĕm kơtơ̆ng boih tơdrong noh na iĕm athei tơchĕng tơdrong kiơ 'lơ̆ng, tơdrong kiơ tơpăt, tơdrong kiơ trŏ, tơdrong kiơ kăl, tơdrong kiơ đe ư-ang, tơdrong kiơ hơiă, tơdrong kiơ kon bơngai lăp đon, tơdrong kiơ đe tơ'mêm băl.

I Tes 5:6

Yua kơ bơ̆n huay pă oei lăm măng mu boih, na bơ̆n 'nĕ kơ tep hiơt thoi lu bơngai ưh kơ lui. Bơ̆n lui boih, bơ̆n thoi lĕ iung đơ̆ng tep na bơ̆n athei kơchăng ling-lang. Bơ̆n athei pơm thoi bơngai hơdrăl ưh kơ et sik; 'noh wă khan bơ̆n athei lui kơjăp mă tơpă.

I Tes 5:8

Na dang ei bơ̆n oei lăm hơdah măt 'năr boih bơ̆n athei kơchăng thoi bơngai hơdrăl. Lu linh tơblah sư hrŭk ao mam wă kơ hơđơ̆ng kơ akâu sư kơdih. Bơ̆n kư̆m thoi lu đe noh mơ̆n athei lui mă kơjăp, băt 'mêm kơ 'Bok Kei-Dei păng bôl buăl bơ̆n, thoi noh na bơ̆n hơđơ̆ng akâu bơ̆n kơdih. Kư̆m thoi lu linh yơ̆l môk kơlăm wă kơ pĕng lăm kơ̆l sư na sư huay kơ hli, âu wă khan 'Bok Kei-Dei pơklaih bơ̆n đơ̆ng tơdrong yoch na wă atŏk bơ̆n oei păng Sư, thoi âu boih bơ̆n huay kơ hli dang ei, thoi âu boih tơdrong hơđơ̆ng bơ̆n.

I Tim 1:10

lu bơngai ngôi pơyô kư̆ kă, lu bơngai tơduă drŏ-nglo tơngôi băl, lu bơngai chă rôp tĕch đe, lu bơngai chă hơlĕnh kơ đe, lu bơngai jâu pơlơ̆m kơ đe, hăm dôm lu bơngai hŭt lê̆ tơdrong 'lơ̆ng tơpăt.

I Tim 1:14

Kră Yang bơ̆n Yêsu Krist 'mêm mơnat kơ inh tơpă ăn kơ inh lui kơ Sư păng ăn kơ inh 'mêm kơ Sư hăm đĭ-đăng bơngai. Sư kư̆m ăn kơ đĭ-đăng bơngai lui lei-lăi mơ̆n.

I Tim 1:5

Inh athei ih khă lu sư thoi noh wă kơ lu sư đei đon 'lơ̆ng tơpăt, hăm lui mă trŏ, thoi noh na sư gơh 'mêm kơ 'Bok Kei-Dei hăm bôl buăl tơ ala teh âu mơ̆n.

I Tim 3:11

Lu bơngai drŏ-kăn wă jang lăm hnam 'Bok Kei-Dei, sư kư̆m athei pơm mă 'lơ̆ng tơpăt mơ̆n; 'nĕ kơ pơma plĕch kơ đe, 'nĕ kơ et sik suai. Sư athei pơm tôm tơdrong 'lơ̆ng tơpăt ngăl.

I Tim 3:4

Sư pơgơ̆r hnam dơnŏ sư gơh tơpă na hnam dơnŏ sư, kon akăn sư chu yom.

I Tim 3:8

Dah bơngai lui wă jang lăm hnam 'Bok Kei-Dei, sư athei pơm mă 'lơ̆ng tơpăt adrol 'mơ̆i, ưh kơ et sik suai, ưh kơ hăt sa jên lơ păng trŏ tơdrong sư jang sư 'nĕ kơ pơgŏ iŏk jên đe.

I Tim 5:1

Ih khă lu bơngai kră mă 'lơ̆ng, ih athei pơma lung sư yua kơ sư kră hloh kơ ih; păng ih lăng sư thoi lĕ kơ 'bă ih. Ih lăng lu bơngai drŏ-nglo 'lơ̆p kơ ih kư̆m thoi oh ih mơ̆n.

Tit 1:13

Sư bơtho khan thoi noh trŏ tơpă. Na ih athei khă lu sư 'nĕ pă bơtho tơdrong kư̆ kă, wă kơ lu sư jah lui mă kơjăp.

Tit 1:8

Bơngai bu pơm kră bơngai lui, năr tơmoi truh tơ sư, sư tơkan sơng iŏk atŏk tơ hnam sư. Păng sư lăp đon kơ tơdrong 'lơ̆ng tơdrong kiơ̆ trŏ. Sư pơm đon chơ̆n. Sư đei đon 'lơ̆ng tơpăt păng 'Bok Kei-Dei hăm bôl buăl mơ̆n,

Tit 2:7

Păng ih kơdih athei pơm 'lơ̆ng tơpăt lăm tôm tơdrong wă kơ lu bơngai lui pơm kiơ̆ thoi ih. Ih bơtho đe mă trŏ pơm mă khuơ̆ khuơ̆ wă kơ đe lăng bơ̆n bơtho tơpă.

Phil 1:9

Kơlih inh băt kơ ih đei đon 'mêm mơnat kơ bôl buăl boih na inh roi kơ ih thoi noh đĕch. Mă-lei ih băt kơ inh kră boih păng inh oei lăm hnam phak yua kơ inh lui kơ Kră Yang Yêsu.

I Pet 1:13

Thoi noh na iĕm athei pơgơ̆t 'biơ̆ jơhngơ̆m iĕm hăm kơchăng hli kơ pơm yoch; păng athei tơchĕng ling-lang gah tơdrong Yêsu Krist wă ăn kơ iĕm tơdrong hiôk jơnap lăm năr Sư jur kơnh păng iĕm athei lui kơ tơdrong Sư wă ăn noh.

I Pet 4:7

Khei 'năr wă jê̆ tôch boih na iĕm athei tơchĕng đon mă hơgei wă kơ kơchăng kơ tơdrong krao khan pơnam.

I Pet 5:8

Bơ̆n athei chơ̆n jơhngơ̆m păng kơchăng kơdih, yua kơ yŏng pơgơ̆r yang kơnê̆ mă ayăt kơ bơ̆n, sư nơnăm jơ̆p-jang arum thoi kiĕk wă rôp sa bơ̆n.

II Pet 1:6

Dah iĕm pơhrăm iŏk boih, iĕm gô đei tơdrong pơgơ̆t, đơ̆ng tơdrong pơgơ̆t iĕm gô đei jơhngơ̆m chơ̆n. Dah jơhngơ̆m iĕm chơ̆n tơpă, noh iĕm gơh pơm kiơ̆ dôm tơdrong 'Bok Kei-Dei boih.