Sa 10:7 - Sơ̆p Hlabơar Nơ̆r 'Bok Kei-Dei

⁷ Bơngai Êphraim gô thoi bơngai nuih pran kơtang, jơhngơ̆m lu sư chhôk hal thoi suai kơ et sik hơmu; kon sâu lu sư gô 'bôh păng chơt hiôk tơpă, jơhngơ̆m lu sư chơt hiôk lăm Kră Yang.

Sa 10:7 Iomraidhean Croise

Bl 18:19

Inh đei rơih iŏk boih Abraham wă kơ bơtho tơ'bôh kơ kon sâu lăm hnam dơnŏ sư wei tơdrong lui yom kơ Kră Yang, wă pơsĭt nơ̆r mă Kră Yang đei pơkă boih hăm Abraham.”

Bl 43:34

Jôsep athei pôk ăn kơ lu 'nhŏng oh sư tơmam sa dan 'bơ̆t anăp sư. Mă-lei Bênjamin đe ăn tơmam sa lơ hloh kơ lu nai pơđăm wơ̆t. Lu sư sŏng sa 'băt 'lơ̆ng ngôi chơt hơdai hăm Jôsep.

Horiso 102:28

Lu kon sâu đĭch đam Ih oei đei ling-lang. Adrĕch adrung lu sư đei pơjing rai kơjăp 'bơ̆t anăp Ih.

Horiso 104:15

Sik hơmu tơmam pơhiôk jơhngơ̆m kon bơngai. Đak rơmă ôliwơ pơm ăn kơ muh măt hơdah hơdong, Por sŏng wă ăn kơ jơhngơ̆m kon bơngai pran.

Horiso 13:5

Mă-lei inh gơnang kơ tơdrong 'mêm Ih. Jơhngơ̆m inh chhôk hal kơ tơdrong Ih dŏng pơklaih

Horiso 28:7

Kră Yang jơ̆ jơhngơ̆m pran păng thoi khêl inh, Jơhngơ̆m inh gơnang boih kơ Sư, na inh mă gơh klaih, Yua kơ thoi noh jơhngơ̆m inh chơt hiôk tơpă. Inh gô iŏk nơ̆r hơri bơnê kơ Sư.

Horiso 33:21

Jơhngơ̆m lu nhôn chơt hiôk lăm Sư, Yua kơ lu nhôn 'măn boih jơhngơ̆m lui yom lăm Anăn rơgoh Sư.

Horiso 90:16

Apinh Ih tơ'bôh ăn kơ lu đĭch đam Ih tơdrong jang Ih. Păng tơdrong mơsêh ư-ang Ih pơchrang tơ kon sâu lu sư.

Êsai 25:9

Lăm năr noh kơnh, đe gô khan: “Âu bơih Kră Yang 'Bok Kei-Dei bơ̆n, mă lu bơ̆n đei chang gô Sư dŏng pơklaih bơ̆n. 'Nâu bơih Kră Yang mă lu bơ̆n chang gô Sư. Bĕ lu bơ̆n 'nă hal chơt hiôk kơ tơdrong Sư dŏng pơklaih!”

Êsai 38:19

Lu bơngai arih, lu bơngai arih đĕch ư-ang kơ Ih. Thoi inh đei pơm năr âu. Lu bơngai pơm 'bă gô bơtho ăn kơ kon hơ'lơ̆p sư băt tơdrong tơpăt Ih.

Êsai 54:13

Đĭ-đăng kon ih gô đei Kră Yang bơtho tơ'bôh, păng tơdrong hiôk-hian kon hơ'lơ̆p ih gô tih tơpă.

Êsai 66:14

Lu iĕm gô 'bôh dôm tơdrong noh, na lăm jơhngơ̆m hiôk-hian, kơting lu iĕm gô bluh thoi 'nhĕt. Đe gô băt ti Kră Yang gô tơgŭm lu đĭch đam Sư, mă-lei tơdrong Sư hil mĭl gô phak lu bơngai ayăt kơ Sư.

Je 32:39

Inh gô ăn kơ lu sư jing minh đon minh jơhngơ̆m minh trong lei-lăi, wă kơ lu sư hli yom kơ Inh ling-lang, wă kơ lu sư păng kon sâu lu sư đei tơdrong pŭn hiôk.

Êsêkiên 37:25

Lu sư gô oei arih sa lăm char mă Inh ăn kơ Jakôp đĭch đam Inh char mă 'bok yă lu sư oei sơ̆. Lu sư, kon sâu lu sư, gô oei tơ noh ling-lang; đĭch đam Inh Đawit jing pơtao lu sư hlŏng hloi.

Jôel 2:23

Ơ lu kon pơlei Siôn, chơt hiôk bĕ 'nă hal bĕ lăm Kră Yang 'Bok Kei-Dei lu iĕm, yua kơ Sư ăn tơdrong tơpăt jur thoi 'mi jruh lăm bơyan, ăn 'mi hrôih lăm bơyan blŭng-a păng ăn 'mi klui lăm bơyan tuch-luch thoi adrol sơ̆.

Habakuk 3:18

Inh kư̆m oei chơt hiôk lăm Kră Yang; Chhôk hal Kră Yang 'Bok Kei-Dei Tơ'ngla Dŏng Pơklaih inh.

Jêphania 3:14

Ơ kon drŏ-kăn Siôn, hơri bĕ! Ơ adrĕch adrung Isơrael, iŏk chơt hiôk bĕ! Ơ kon adruh Jêrusalem, 'nă hal bĕ.

Sa 12:8

Lăm năr noh, Kră Yang boih Tơ'ngla dŏng tơgŭm kon pơlei oei lăm Jêrusalem păng lăm năr noh lu bơngai mă tơrăn hloh gô pran thoi Đawit, hnam Đawit gô nhen thoi Kră Yang 'Bok Kei-Dei, gô thoi linh jang 'lơ̆ng Kră Yang oei 'bơ̆t anăp lu sư.

Sa 9:15

Kră Yang Tih Hloh gô tơgŭm dŏng lu sư, lu sư gô pơrăm hăm jei kơplah klơ̆m tơmo, lu sư gô huch suai ôr tơjrông tơjrang đơ̆ng sik hơmu pơm kơ lu sư, lu sư phĭ hrăp thoi pơnhan thoi đe hling tơ lu mum jơ̆ng gơ'bang soi.

Sa 9:17

Tơdrong sư pơm 'lơ̆ng rai 'lơ̆ng dêh tơpă! Sik 'ba mi gô pơm ăn kơ lu bơngai tơdăm rai pran păng sik 'nao gô pơm ăn kơ lu adruh hơlai đei pŭn hiôk.

Luka 1:47

jơhngơ̆m inh hiôk yua kơ 'Bok Kei-Dei pơklaih inh.

Yo 16:22

Iĕm kư̆m thoi noh mơ̆n. Dang ei iĕm sơ'ngon. Mă-lei Inh gô tơ'bơ̆p iĕm dơ̆ng na jơhngơ̆m iĕm chhơp hiôk chơt tơpă, ưh kơ đei bu gơh pơm kơ iĕm sơ'ngon dơ̆ng.

Jang 2:26

Yua kơ thoi noh jơhngơ̆m Inh hiôk chơt, Inh roi tơdrong hiôk Inh kơ đe. Akâu Inh lôch, mă-lei akâu Inh gô iung arih dơ̆ng,

Jang 2:39

'Nâu nơ̆r 'Bok Kei-Dei Sư pơkă ăn kơ iĕm, kơ lu kon sâu iĕm păng lu bơngai mă oei tơ ataih đơ̆ng bơ̆n, dôm lu bơngai 'Bok Kei-Dei Kră Yang bơ̆n krao iŏk wă lui kơ Sư.”

Philip 4:4

Hiôk bĕ iĕm yua kơ iĕm lui kơ Kră Yang Yêsu Krist boih. Inh wă khan kơ iĕm dơ̆ng: Hiôk bĕ iĕm.

I Pet 1:8

Đơ̆ng sơ̆ iĕm ưh kơ 'bôh Yêsu Krist thoi yơ, mă iĕm 'mêm kơ Sư tơpă. Dang ei iĕm kư̆m ưh kơ 'bôh Sư mă iĕm kư̆m lui kơ Sư kơjăp, jơhngơ̆m iĕm hiôk ling-lang măng năr.

I Sam 2:1

Hana krao apinh păng khan: Jơhngơ̆m inh chơt hiôk lăm Kră Yang; Kră Yang pơm ăn kơ jơhngơ̆m inh hiôk chơt. 'Bơ̆r inh pơma pơgreh khan kơ lu bơngai ayăt kơ inh. Inh chơt hiôk Ih dŏng pơklaih inh.