Rom 8:39 - Sơ̆p Hlabơar Nơ̆r 'Bok Kei-Dei

³⁹ Mă 'bok kiơ tơ kơpal plĕnh, dah tơ ala teh âu, mă hăm tơdrong kiơ kiơ wă pơrơ̆ng tơgar iŏk bơ̆n đơ̆ng tơdrong 'Bok Kei-Dei 'mêm, lu noh ưh kơ kĕ 'mơ̆i.

Rom 8:39 Iomraidhean Croise

Horiso 64:6

Lu sư chă wă pơm tơdrong kơnê̆; Lu sư khan: “Lu bơ̆n pơđâu boih wă pơm.” Đon tơchĕng păng jơhngơ̆m kon bơngai kơnê̆ tơpă.

Tơdrông Pơđơk 20:5

Tơdrong chă đon lăm kon bơngai thoi đak jrŭ. Mă-lei bơngai hơgei đei đon hlôh wao gô sŏ iŏk tơ noh.

Hơri Hiôk 3:4

Lăp inh weh ataih đơ̆ng lu sư, Blư 'bôh hloi bơngai mă inh hơyuh. Inh thar rôp kuăr hloi, ưh pă achăng sư bơih, Chông ba sư dĭng truh tơ hnam mĕ inh. Mơ̆t lăm anih bơngai mă anăp kơ inh.

Êsai 10:33

'Nâu, Kră Yang Tih Hloh, gô yua tơdrong mơsêh pran kơtang krưp Sư chre dơng 'long. Lu tơm 'long tih kơjung gô kăl tơpăk đĭ; 'long kơjung gô păk tơ ala teh.

Êsai 24:21

Năr noh kơnh Kră Yang gô phak lu linh jang kơnê̆ tơ kơpal plĕnh ti păng phak lu yŏng pơgơ̆r kơnê̆ lăm teh âu.

Da 4:11

'Long noh rai tih rai kơjăp; kơnhŏng wĕch sư hơtŭt kơ plĕnh păng mă đe oei tôch kơ teh kư̆m oei tơmang 'bôh sư.

Mathiơ 24:24

yua kơ năr noh kơnh đei lơ bơngai pơm Krist, đei lơ bơngai khan sư bơngai pơtruh nơ̆r 'Bok Kei-Dei. Lu sư kư̆m gơh pơm tơdrong mơsêh wă kơ lu bơngai mă 'Bok Kei-Dei rơih boih lui kơ lu sư pơhlŭ.

Yo 16:27

kơlih kơ 'Bă Inh 'mêm mơnat kơ iĕm tơpă. Sư 'mêm kơ iĕm yua kơ iĕm 'mêm kơ Inh păng lui kơ Inh jur đơ̆ng 'Bă Inh 'Bok Kei-Dei.

Yo 17:26

Inh tơhlôh kơ lu sư dôm tơdrong Ih. Păng Inh oei tơhlôh kơ lu sư wă kơ lu sư băt tơpă Ih 'mêm kơ lu sư, kư̆m thoi Ih 'mêm kơ Inh; păng Inh gô oei lăm lu sư mơ̆n.”

Yo 3:16

'Bok Kei-Dei 'mêm mơnat tơpă rim 'nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai 'noh sư gô oei hơdai hăm 'Bok Kei-Dei arih ling-lang.

Rom 1:7

Na dang ei inh chih kơthơ ăn kơ iĕm bơngai Rôm mă 'Bok Kei-Dei 'mêm kơeng. Iĕm boih 'Bok Kei-Dei krao wă kơ iĕm jing kon Sư. Inh krao khan apinh Sư 'Bă tơm bơ̆n hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

Rom 11:33

'Bok Kei-Dei pơm thoi noh bơ̆n băt kơ Sư 'mêm kơ bơ̆n tơpă păng bơ̆n kư̆m băt kơ Sư hơgei dêh. Na bơ̆n kon bơngai ưh kơ băt ôh tơdrong tơchĕng Sư thoi yơ.

Rom 5:8

Na kơplah bơ̆n oei pơm yoch, lăp minh 'nu Yêsu Krist đĕch lôch tang bơ̆n. 'Noh boih bơ̆n băt kơ 'Bok Kei-Dei 'mêm kơ kon bơngai bơ̆n tơpă.

Rom 6:23

Bu jang chă tơdrong yoch, apah sư tơdrong lôch. Mă-lei gah lu bơ̆n, dang ei 'Bok Kei-Dei ăn đĕch kơ bơ̆n arih ling-lang yua kơ bơ̆n lui kơ Kră Yang bơ̆n Yêsu Krist.

Rom 8:1

Yua kơ thoi noh na dôm lu bơ̆n bơngai mă lui kơ Yêsu Krist, 'Bok Kei-Dei ưh pă wă phak lu bơ̆n dơ̆ng boih.

Rom 8:35

Mă bơ̆n tơ'bơ̆p tơdrong kiơ kiơ, Yêsu Krist Sư wei-lăng bơ̆n, mă bơ̆n đei tơdrong truh pơmat, mă đe areh kơ bơ̆n, mă bơ̆n pơngot rơwĕt, mă bơ̆n bơngai dơnuh, mă bơ̆n đei tơdrong hli, mă đe năm blah bơ̆n, Yêsu Krist ưh kơ lê̆ bơ̆n ôh, Sư 'mêm kơ bơ̆n tơpă.

II Kor 11:3

Inh hli kơ lu bơngai mă pơjăm inh pơhlŭ iĕm jing jrok trong ưh pă 'mêm kơ Yêsu Krist, thoi yă bơ̆n Ewơ lui kơ 'bih hơlĕnh pơdăr kơ sư sơ̆.

II Kor 2:11

Na dang ei đĭ-đăng kơ bơ̆n 'nĕ pă jô̆ yo kơ bơngai mă yoch noh, hli kơ sư hiong lăm tơdrong yang Satan, yua kơ bơ̆n băt kơ yang Satan sư pơhlŭ hơgei dêh.

Êphêsô 1:4

Adrol kơ 'Bok Kei-Dei tam mă pơjing plĕnh teh sơ̆, Sư rơih iŏk bơ̆n boih, yua kơ Yêsu Krist wă lôch tang bơ̆n. Sư rơih iŏk bơ̆n wă kơ bơ̆n jing 'lơ̆ng tơpăt huay kơ đei tơdrong yoch 'bơ̆t anăp Sư.

Philip 3:12

Mă-lei tôm tơdrong inh ưh tam mă pơm 'blep thoi 'Bok Kei-Dei ôh. Mă-lei lăm jơhngơ̆m klơm klak inh adrin tôch bơneh thoi bơngai kơdâu pơjei ră. Inh adrin khŏm khŏm wă kơ pơm tôm tơdrong đêl Yêsu pơkă kơ inh kơplah Sư iŏk inh sơ̆.

Philip 3:3

Lu bơ̆n âu boih kiơ̆ kơ tơdrong 'Bok Kei-Dei pơkă tơpă. Mă-lei bơ̆n ưh kơ kăl kơ tơdrong kăt tơdra akar chă pơpơm kơdih păng ti thoi noh ôh. Bơ̆n kăl kơ Yang Bơhngol 'Lơ̆ng đĕch; bơ̆n athei gơnang kơ Sư wă kơ bơ̆n gơh kiơ̆ 'Bok Kei-Dei trŏ thoi Sư wă. Tơdrong kăt tơdra akar chă pơm kơdih păng ti đĕch na bơ̆n 'nĕ kơ kiơ̆ ôh hli kơ bơ̆n gơnang kơ tơdrong bơ̆n pơm kơdih, bơ̆n athei gơnang kơ Yêsu Krist đĕch.

Philip 3:8

Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist,

II Tes 2:4

Bơngai kơnê̆ ei, sư pơang akâu sư kơdih khan sư tih hloh kơ 'Bok Kei-Dei, hăm tih hloh kơ đĭ-đăng lu yang nai. Sư mơ̆t lăm hnam akŭm 'Bok Kei-Dei tơm na khan kơ đe: “Inh boih Kră Yang iĕm, na iĕm athei kơkuh kơ inh.”

I Yo 4:16

Bơ̆n băt kơ Sư 'mêm mơnat kơ bơ̆n tơpă. 'Bok Kei-Dei Sư gah tơdrong 'mêm mơnat đĕch, na bơngai bu 'mêm mơnat kơ đe tơpă, bơngai 'noh pôm đon păng 'Bok Kei-Dei păng 'Bok Kei-Dei oei lăm sư.

I Yo 4:19

Bơ̆n 'mêm kơ 'Bok Kei-Dei kơlih kơ Sư 'mêm kơ bơ̆n adrol.

Tơdrông Tơ'bôh 12:9

Na đe tơhuŏng sư păng đĭ lu linh sư tơ teh. Prao noh boih 'bih so sơ̆ mă đe anăn yŏng yang sơmăt păng yang Satan. Sư pơhlŭ đe jơ̆p kơ teh đak. Đe blah tơhuŏng sư păng lu linh sư đơ̆ng plĕnh tơ teh.

Tơdrông Tơ'bôh 13:14

Sem ei pơm tơ'bôh kơ đe tơdrong hlĭch kiơ̆ sem mă mônh ăn, thoi noh na sư pơhlŭ lu kon pơlei pơla oei tơ ala teh âu pơm minh pôm rup sem mă mônh, sem mă đei rơka đêl đe 'bet mă oei arih.

Tơdrông Tơ'bôh 19:20

Na gah sem brem mă kơnê̆ ei păng sem brem mă 'bar mă gơh pơm tơdrong hlĭch chrơp, wă kơ kon pơlei pơla lui kơ tơdrong sư pơm noh na chơ̆m đŏng yâu sem brem kơnê̆ tơ klĕng lu bơngai mă kơkuh kơ rup sư noh, gah bre sư 'Bok mă hao aseh păng lu linh Sư blah rôp tơhuŏng hloi bre sư oei arih tơ dơnâu ŭnh.

Tơdrông Tơ'bôh 2:24

‘Iĕm bơngai Pơlei Thiatir păng lu bôl iĕm mơ'nah kuă kơ kiơ̆ tơdrong yă Jesebel tơpă. Sư khan tơdrong sư bơtho tơdrong jrŭ, tơdrong hơgei, mă-lei iĕm kuă kơ pơhrăm iŏk hơya tŏ sĕt tơdrong noh yua kơ iĕm băt tơdrong noh tơdrong yang Satan đĕch. Bĭ mă Inh kư̆m ưh kơ đei pơthim kơ iĕm kiơ̆ tơdrong kiơ mă anat ôh.

Tơdrông Tơ'bôh 20:3

na tơhuŏng sư tơ lăm sơlŭng jrŭ, tang 'măng khuă đơ̆ng kơpal păng pơklep tơdra 'măng 'noh hli kơ sư lĕch năm chă pơhlŭ đe jơ̆p kơ teh đak. Phak sư lăm sơlŭng jrŭ noh lăm minh-rơbâu sơnăm, klaih kơ noh achăng sư dơ̆ng, mă-lei ưh kơ đunh ôh.

Tơdrông Tơ'bôh 20:7

Tôch minh-rơbâu sơnăm ei 'mơ̆i na achăng yang Satan lĕch đơ̆ng sơlŭng jrŭ đe chĭt sư noh.