Rom 8:32 - Sơ̆p Hlabơar Nơ̆r 'Bok Kei-Dei

³² Sư 'mêm kơ bơ̆n tơpă na Sư mah ăn Kon pôm Sư lôch tang kon bơngai. Thoi noh bơ̆n băt Sư wă tơgŭm bơ̆n tôm tơdrong nai hai mơ̆n.

Rom 8:32 Iomraidhean Croise

Bl 22:12

Linh jang 'lơ̆ng khan thoi âu: “Lê̆ kơ hơ-ô ti ih tơ akâu kon hơ'lơ̆p âu păng kư̆m 'nĕ kơ pơrăm sư yua kơ dang ei Inh băt boih ih hli yom kơ Inh, na huay mah kơeng kơ kon ih wă pơyơ̆r kơ Inh.”

Horiso 84:11

Kră Yang 'Bok Kei-Dei jơ̆ măt 'năr păng khêl; Kră Yang ăn tơdrong mơnat păng ư-ang, Sư ưh kơ đei sơngah ôh ăn tơdrong 'lơ̆ng rŏ. Kơ bu mă oei arih sa tơpăt.

Êsai 53:10

Mă-lei Kră Yang lăp đon ăn kơ sư đe teh pơjuă păng pơjĭ. Đang kơ sư pơyơ̆r akâu jăn sư pơm tơmam soi huai iŏk đơ̆ng yoch. Sư gô 'bôh adrĕch adrung sư; lu năr sư gô rai sot kơjung, păng jơhngơ̆m đon Kră Yang wă na gơh jing đơ̆ng Sư.

Mathiơ 3:17

Păng kư̆m đei nơ̆r pơma đơ̆ng plĕnh khan: “Âu boih Kon Inh mă 'mêm kơeng tơpă, Inh lăp đon kơ Sư tôm tơdrong.”

Mathiơ 7:11

Iĕm bơngai kơnê̆ ră mă-lei iĕm kư̆m băt chă ăn kơ kon iĕm tơmam sa 'lơ̆ng, pơma kiơ kơ 'Bă bơ̆n tơ plĕnh ti, Sư asong ăn kơ bơ̆n tơmam 'lơ̆ng tơpă dôm lu bơngai mă krao khan apinh Sư, Sư ưh kơ kret ôh.

Yo 3:16

'Bok Kei-Dei 'mêm mơnat tơpă rim 'nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai 'noh sư gô oei hơdai hăm 'Bok Kei-Dei arih ling-lang.

Rom 11:21

Lu bơngai Isơrael mơ'nah kuă kơ lui tơpă na 'Bok Kei-Dei chre hŭt dơng lu sư. Mă iĕm kư̆m lei-lăi, tơ̆ng iĕm kuă kơ lui Sư kư̆m chre hŭt iĕm mơ̆n 'bônh loi yua kơ iĕm dơng đơ̆ng nai.

Rom 4:25

Yêsu lôch tang yua kơ tơdrong yoch bơ̆n, 'Bok Kei-Dei tơiung arih Sư, wă ăn kơ bơ̆n jing 'lơ̆ng tơpăt hăm Sư.

Rom 6:23

Bu jang chă tơdrong yoch, apah sư tơdrong lôch. Mă-lei gah lu bơ̆n, dang ei 'Bok Kei-Dei ăn đĕch kơ bơ̆n arih ling-lang yua kơ bơ̆n lui kơ Kră Yang bơ̆n Yêsu Krist.

Rom 8:28

Bơ̆n 'bôh bơngai bu mă 'mêm kơ 'Bok Kei-Dei, bơngai noh 'Bok Kei-Dei rơih iŏk lui kơ Sư, lu bơngai thoi noh boih, mă sư tơ'bơ̆p tơdrong kiơ, bơ̆n băt kơ 'Bok Kei-Dei ăn kơ sư hiôk ngăl.

I Kor 2:12

Mă-lei bơ̆n bơngai lui ưh kơ wă iŏk ôh tơdrong tơchĕng ala teh âu. Bơ̆n đei Yang Bơhngol 'Lơ̆ng jur tơ bơ̆n, wă kơ bơ̆n băt tôm tơdrong 'Bok Kei-Dei pơkă khan wă ăn kơ bơ̆n.

II Kor 4:15

Dôm tơdrong nhôn adrin jang wă pơyua iĕm păng wă kơ tơdrong 'Bok Kei-Dei 'mêm mơnat kơ kon bơngai rai jơ̆p teh, wă kơ kon bơngai bơnê hăm pơang anăn Sư rai lơ.

II Kor 5:21

Yêsu Krist ưh kơ đei tơdrong yoch kiơ, mă-lei 'Bok Kei-Dei athei Sư pŭ tơdrong yoch bơ̆n. Thoi noh na bơ̆n athei gơnang kơ Yêsu, na 'Bok Kei-Dei jô̆ kơ bơ̆n bơngai 'lơ̆ng hăm Sư.

II Kor 6:10

Đe lăng nhôn đei tơdrong sơ'ngon, mă-lei nhôn hiôk chơt ling-lang; đe lăng nhôn bơngai dơnuh, mă-lei đei lơ bơngai mơdrŏng yua kơ nhôn; đe lăng nhôn hoh-hoy kơbĭ đei kiơ, mă-lei nhôn đei tôm tơdrong tơmam.

I Yo 4:10

Âu boih tơdrong 'Bok Kei-Dei 'mêm mơnat kơ bơ̆n: Sư 'mêm mơnat kơ bơ̆n mah ăn Kon pôm Sư lôch tang bơ̆n, pơklaih bơ̆n đơ̆ng tơdrong yoch. Bơ̆n 'mêm kơ Sư ưh kơ đei dang noh ôh.

Tơdrông Tơ'bôh 21:7

Bu adrin tơblah păng yang kơnê̆ jei sư, sư gô đei tôm tơdrong noh, Inh jing Kră Yang sư, sư jing kon Inh.