Rom 8:15 - Sơ̆p Hlabơar Nơ̆r 'Bok Kei-Dei

¹⁵ Ưh kơ sĭ 'Bok Kei-Dei ăn Yang Bơhngol 'Lơ̆ng wă kơ bơ̆n jing bơngai đĭch, dah wă kơ bơ̆n oei hli ôh. Sư ăn kơ bơ̆n Yang Bơhngol 'Lơ̆ng wă kơ bơ̆n jing kon Sư. Thoi noh na bơ̆n gơh krao kơ 'Bok Kei-Dei Aba, 'Bă bơ̆n.

Rom 8:15 Iomraidhean Croise

Le 20:19

Kon pơlei khan kơ Môis: Apinh Ih jah pơma hăm lu nhôn na lu nhôn gô mơ̆ng 'nĕ ăn kơ Kră Yang 'Bok Kei-Dei pơma hăm lu nhôn, kơnh hli kơ lu nhôn lôch.

Êsai 56:5

Inh gô ăn kơ lu sư hơdai tơ lăm hnam Inh wă khan lăm dur Inh. Minh anih 'blŏk hơdơ̆r păng minh anăn gĭt hloh kơ kon drŏ-nglo, kon drŏ-kăn; Inh gô ăn dơ̆ng kơ lu sư minh anăn mă oei oei ling-lang ưh kơ đei layơ tôch.

Je 3:19

Gah Inh hơpơi: “Rŏ kơ Inh lăng iĕm thoi kon drŏ-nglo Inh, Inh ăn kơ lu iĕm dêh char 'lơ̆ng, teh jang sa 'lơ̆ng hloh kơ đĭ-đăng lu char nai! Inh hơpơi wă kơ iĕm krao Inh ‘'Bă’ Păng ưh pă weh achăng lê̆ Inh.

Jo 17:12

Bơngai Isơrael hli tơrơ khan kơ Môis: Âu 'nâu, lu nhôn gô lôch, lu nhôn lôch răm, lu nhôn gô lôch hiong đĭ-đăng!

Mathiơ 25:25

Yua kơ thoi noh na inh sir 'bŭ jên noh tơ sơlŭng, inh hli kơ hiong kơ inh mơdro sa. Na dang ei he âu iŏk pơdrĕo kơdih bĕ jên ih sơ̆.’

Markôs 14:36

Sư khan: “Aba, ơ 'Bă, Ih gơh pơm tôm tơdrong. Apinh Ih ăn kơ Inh klaih đơ̆ng tơdrong gleh âu. Mă-lei Ih 'nĕ pơm kiơ̆ kơ Inh, pơm kiơ̆ kơ Ih đĕch.”

Luka 11:2

Na Yêsu khan: “Iĕm krao khan thoi âu: ‘Ơ 'Bă, ăn anăn Ih jing ư-ang. Ăn kơ dêh char Ih tĕnh truh.

Luka 22:42

Sư khan: “Ơ 'Bă, dah gơh, lei ăn kơ Inh gơh klaih đơ̆ng tơdrong gleh âu. Mă-lei Ih 'nĕ pơm kiơ̆ kơ Inh, pơm kiơ̆ kơ Ih đĕch.”

Luka 8:28

Lăp sư 'bôh Yêsu, sư ôr na năm 'nap 'bơ̆t anăp Yêsu na Yêsu athei yang kơnê̆ lĕch đơ̆ng akâu sư. Yang kơnê̆ ei pơma pơret khan: “Ơ Yêsu, Kon 'Bok Kei-Dei Kră Yang Tih Hloh, lơliơ Ih wă phak inh dang ei, apinh Ih 'nĕ phak inh hŏ.” Đơ̆ng sơ̆ yang kơnê̆ juăt kơ pơm kơ sư wik. Đe chô̆ ră jơ̆ng ti sư păng glang mam, gak sư ră mă-lei sư hrĕch kơtĕch kơtoch đĭ, na yang kơnê̆ pơpuh sư năm tơ char glă chơngue.

Luka 8:37

Đơ̆ng noh na đĭ-đăng lu bơngai tơring Gerasen ei athei Yêsu jăk tơ nai yua kơ lu sư hli dêh.

Yo 16:8

Lăp Sư jur, Sư tơbăt ăn kơ lu bơngai ala teh âu lu sư đei tơdrong yoch; Sư tơbăt ăn kơ lu sư Inh, Inh 'lơ̆ng tơpăt; păng tơbăt kơ lu sư gah tơdrong 'Bok Kei-Dei wă phak lu bơngai ưh kơ lui kơ Sư.

Yo 20:17

Thoi noh Yêsu khan: “Ih 'nĕ kơ rôp Inh, yua kơ Inh ưh tam mă tŏk wih tơ 'Bă Inh. Ih năm khan kơ lu 'nhŏng oh Inh wă kơ sư băt kơ Inh wă tŏk wih tơ 'Bă Inh, Sư kư̆m 'Bă lu iĕm mơ̆n; tơ Kră Yang Inh, Sư kư̆m Kră Yang iĕm mơ̆n.”

Jang 16:29

Na kră wei-lăng hnam phak ei athei đe tơ̆k kơ sư ŭnh wă kơ hơdah, na sư tơluh năm tơ đe ei, sơtơ̆p kŭl-tăng 'bơ̆t anăp bre Pôl păng Silas. Jơhngơ̆m 'bok wei-lăng ei hli tơrơ tơpă.

Jang 2:37

Kơtơ̆ng tơdrong 'noh boih, lu kon tơring mơn lăm jơhngơ̆m sư na jet Pêtrôs hăm lu bôl sư khan: “Ơ 'nhŏng oh, nhôn athei pơm lơliơ wă klaih đơ̆ng tơdrong yoch?”

Rom 8:16

Yang Bơhngol 'Lơ̆ng, Sư oei lăm bơ̆n, Sư tơbăt ăn kơ bơ̆n hlôh gah tơdrong bơ̆n jing kon 'Bok Kei-Dei tơpă.

Rom 8:23

Ưh kơ sĭ dôm lu tơmam 'Bok Kei-Dei pơjing noh đĕch ôh pơmat-tat. Lu bơ̆n bơngai mă đei Yang Bơhngol 'Lơ̆ng kư̆m hang nuih pơmat-tat thoi lu tơmam noh mơ̆n. Na dang ei chang jah truh khei 'năr 'Bok Kei-Dei pơkă khan wă ăn kơ bơ̆n jing kon Sư ei đĕch hiôk, wă kơ bơ̆n dah tơplih jing akâu 'nao thoi Yêsu. Bơ̆n băt kơ Sư wă ăn kơ bơ̆n hiôk ning-mônh, yua kơ Sư ăn kơ bơ̆n Yang Bơhngol 'Lơ̆ng Sư dang ei.

Rom 8:26

Bơ̆n kơdih ưh kơ gơh, mă-lei đei Yang Bơhngol 'Lơ̆ng tơgŭm bơ̆n. Bơ̆n ưh kơ băt wă krao khan kơ 'Bok Kei-Dei thoi yơ, mă-lei Yang Bơhngol 'Lơ̆ng Sư tơgŭm bơ̆n gơh krao khan hăm đĭ jơhngơ̆m.

Rom 9:4

Lu sư boih đe anăn bơngai Isơrael, lu sư boih 'Bok Kei-Dei jô̆ khan kon Sư; 'Bok Kei-Dei oei hơdai hăm lu sư, pơkă khan wă tơgŭm lu sư. 'Bok Kei-Dei pơkă kơ lu sư tơdrong juăt wă kơ lu sư kiơ̆ păng bơtho lu sư soi sơmah kơkuh kiơ̆ trŏ thoi Sư wă.

I Kor 2:12

Mă-lei bơ̆n bơngai lui ưh kơ wă iŏk ôh tơdrong tơchĕng ala teh âu. Bơ̆n đei Yang Bơhngol 'Lơ̆ng jur tơ bơ̆n, wă kơ bơ̆n băt tôm tơdrong 'Bok Kei-Dei pơkă khan wă ăn kơ bơ̆n.

II Kor 11:4

Yua kơ inh băt kơ iĕm bơngai 'bônh kơ put đe, inh hli kơ đe bơtho iĕm tơdrong Yêsu Krist ưh pă thoi inh bơtho, mă iĕm wă lui hloi; đe bơtho iĕm tơdrong nai, ưh kơ thoi tơdrong Yang Bơhngol 'Lơ̆ng bơtho mă iĕm sơng iŏk sơ̆, mă iĕm wă mơ̆ng hloi; đe khan wă bơtho iĕm tơdrong 'nao 'lơ̆ng mă tơdrong noh ưh pă thoi iĕm lui sơ̆, mă iĕm wă chu hloi.

Galati 2:4

Đei mơ̆n lu bơngai nai đĕch athei nhôn kăt tơdra akar Tĭt. Mă-lei lu bơngai noh ưh kơ trŏ bơngai lui tơpă ôh. Lu sư mơ̆t akŭm hơdai hăm nhôn, lăng sư thoi bơngai lui mơ̆n, mă tơpă lăm to sư ưh ôh. Bơ̆n bơngai rơngei yua kơ bơ̆n lui kơ Yêsu Krist. Bơ̆n ưh kơ kăl kiơ̆ dôm tơdrong juăt lu bơngai Juđê mă đơ̆ng Môis pơkă kơ sư. Lu sư mơ̆t akŭm hơdai nhôn wă chă lăng tơdrong bơ̆n lui thoi yơ, lu sư wă kơ bơ̆n kiơ̆ dôm tơdrong juăt lu bơngai Juđê. Tơdrong juăt bơngai Juđê anat tơpă, dah bu wă kiơ̆, bơngai 'noh sư dang jing đĭch.

Galati 5:1

Kră Yang Yêsu Krist ăn kơ bơ̆n rơngei đơ̆ng dôm tơdrong juăt kon bơngai boih. Thoi noh bơ̆n gơh rơngei tơpă. Na iĕm 'nĕ ăn kơ đe pơhlŭ pơlung iĕm gơnang kơ akâu iĕm kơdih wă kiơ̆ tôm tơdrong juăt Môis dơ̆ng. Dah iĕm pơm thoi noh iĕm wih jing đĭch dơ̆ng.

Êphêsô 1:5

Sư 'mêm kơ bơ̆n đơ̆ng blŭng-a sơ̆ boih, Sư khan lu bơ̆n gô jing kon Sư yua kơ Sư ăn Yêsu lôch tang bơ̆n tơ 'long pơglang.

II Tim 1:7

'Bok Kei-Dei ăn kơ bơ̆n Yang Bơhngol 'Lơ̆ng Sư. Na Yang Bơhngol 'Lơ̆ng ưh kơ wă ăn kơ bơ̆n jơhngơ̆m lêl ôh, Sư ăn kơ bơ̆n jơhngơ̆m nuih kơtang. Sư ăn kơ bơ̆n gơh 'mêm kơ 'Bok Kei-Dei păng bôl buăl bơ̆n mơ̆n păng ăn kơ bơ̆n jơhngơ̆m chơ̆n tơpă.

Hêbrơ 2:15

Sư pơklaih kon bơngai đơ̆ng pơm đĭch yang sơmăt. Sơ̆ kon bơngai đĭch yang sơmăt ling-lang, lu sư hli dêh kơ tơdrong lôch.

Ya 2:19

Lu iĕm mơ'nah khan lui đĕch kư̆m klaih mơ̆n hă? Iĕm kư̆ kơ lui đei minh pôm Kră Yang 'Bok Kei-Dei đĕch, trŏ boih, lu yang kơnê̆ kư̆m lui thoi noh mơ̆n, lu sư hli tơrơ kơ 'Bok Kei-Dei tơpă.

I Yo 4:18

Bơngai bu 'mêm kơ 'Bok Kei-Dei tơpă, bơngai 'noh huay kơ hli kơ 'Bok Kei-Dei ôh. Thoi noh na bơngai bu oei hli, bơngai 'noh tam mă 'mêm kơ 'Bok Kei-Dei mă tơpă, yua kơ bơngai 'noh sư hli kơ 'Bok Kei-Dei wă phak sư ning-mônh.